نظرا لما حدث مع مع موزع نيسان السىء اطلب مساعدتك ضرورى ومشكورين جزيلا

**centon** · 18-01-2012 02:37 AM

السلام عليكم ورحمة الله وبركاته

حجزت من شهر 12 نيسان تيدا هاتشباك مع احد الموزعين المعتدمدين لدى نيسان
وحتى الان لم استلم سيارتى ؟

الحكاية من البداية
حجزت معه سيارة تبع بنك وخلص الاستعلام واخدت الموافقة
جيت يا جماعة استلم العربية قاللى اغسلك العربية باليل وتيجى تستلمها الصبح
على التراخيص علشان تروح بدرى وهو عنده سياسة قال مبيجبش العربية قبل يوم الاستلام من المخزن
علشان يحافظ عليها
المهم روحت لقيت العربية فيها خدش ورفضت استلمها قاللى مفهاش مشكلة روح رخص
وخدها مركز الخدمة واعملهالك فى اقل من نصف ساعة طبعا يا جماعة واحد
مشترى العربية الهاى لاين وقسط وفى الاخر يوديها مركز الخدمة ولسه جديدة
دا ايه كمان لقيت الفرش متبهدل ومتشال منه الكيس بتاعه

طبعا رفضت وقاللى هنغيرلك العربية وطلبت لون تانى خفت يجيبلى نفس العربية ويصلحها
لانى لما طلبت منه رقم الشاسيه ضحك وقاللى متخفش احنا مش هنسرقك احنا قال شركة الكبيرة

انتظرت اسبوع عقبال ما الاجراءات اتغيرت
وجيت استلم العربية مع تاكيدى عليه عند تغيرها انه يجيب العربية بكيسها وكل حاجة
اكنها جاية من المصنع بلزقة اللى على الكبوت والسقف وكده جيت لقيت العربية متشال اللزقة من الكبوت
والفرش متشال منه البلاستيك ومتبهدل
اسال اقولهم يا جماعة العربية شيلتو الللزقة ليه ؟ يقولك اصل السواق خاف يكون العربية فيها
حاجة زى المرة اللى فاتت
قلتلهم طيب شيلتو البلاستيك اللموجود جو الكراسى ليه ؟ وده ماله بأم العربية
بصراحة اتنفرزت واتحرق دمى وطلعت على الفرع الرئيسى
وطلبت فلوسى
المهم قابلنى هناك مدير الفرع الرئيسى مقابلة كويسة ونزلنى كمان المخزن بس لاسف مش لقيت
اللون اللى عايزه
وقاللى موجود فى المصنع عربية بس بفتحة سقف
وبعد مشاورات وافقت عليها
بس يا جماعة اللى قالقنى ان فيه عربية بفتحة سقف فى المعرض التانى اللى انا كنت فيه
وخايف يجيبوها هى هى
ويضحكوا عليا وبصراحة حرام واحد يجيب عربية زيرو موجودة فى معرض
كل اللى رايح واللى جى بيركبها ويشغلها واعتقد ده من حقى
المهم يا جماعة مش عارف اعمل ايه انا وافقت وامرى لله نظرا لذوق الراجل جدا
بس
عايز اتاكد فعلا العربية دى من المصنع مش من المعرض تانى
ازاى اعرف رقم الشاسيه للعربية تيدا من برا ؟
وازاى اتاكد فعلا ان عربية لسه جاية من المصنع هوا قاللى احنا
بعتنا الشيك وبعتنا جبناها هل فيه ورق بيتبعت من نيسان ل التوكيل ؟
وهل اللزق اللى على اكبوت والسقف ممكن اى حد يلزقه ويتشال ويتحط
او ممكن حد يشتريه ويلزقه على العربية ولا مينفعش لانىى بصراحة بدات اشك
صراحة يا جماعة بدات اكره العربية وموزع ده لان بقالى شهر فى الموضوع ده
وعايز حل لانى كرهت نفسى وكرهت مشوار وحاسس باحباط من كتر
الكدب والغش وقربت اكره العربيو ونفسى هتسد منها
انا مردتش احط اسم الموزع علشان افتراض النية الحسنة لتالت ولاخر مرة
وحسبى الله ونعم الوكيل

**Dr'AhmZZong** · 18-01-2012 02:58 AM

المشاركة الأصلية كتبت بواسطة centon

عايز اتاكد فعلا العربية دى من المصنع مش من المعرض تانى

بص يا سيدي المصنع هو اللي بيورد للمعارض .. و العربية لو راحت للمعرض مابترجعش غير لو فيها عيب صناعة عشان يتعمل و ترجع للعميل اللي اشتكى من عيب الصناعة مش للمعرض ..

ازاى اعرف رقم الشاسيه للعربية تيدا من برا

رقم الشاسيه بتلاقيه تحت الكبوت

وازاى اتاكد فعلا ان عربية لسه جاية من المصنع هوا قاللى احنا
بعتنا الشيك وبعتنا جبناها هل فيه ورق بيتبعت من نيسان ل التوكيل ؟

أيوه ورق العربية اللي من غيروا متعرفش ترخص العربية ..

وهل اللزق اللى على اكبوت والسقف ممكن اى حد يلزقه ويتشال ويتحط
او ممكن حد يشتريه ويلزقه على العربية ولا مينفعش لانىى بصراحة بدات اشك

اللزق ده لو اتشال من العربية مينفعش ابدا يرجعلها تاني .. لانها خارجة من المصنع بيه

**Dr'AhmZZong** · 18-01-2012 03:00 AM

المشاركة الأصلية كتبت بواسطة centon

صراحة يا جماعة بدات اكره العربية وموزع ده لان بقالى شهر فى الموضوع ده
وعايز حل لانى كرهت نفسى وكرهت مشوار وحاسس باحباط من كتر
الكدب والغش وقربت اكره العربيو ونفسى هتسد منها
انا مردتش احط اسم الموزع علشان افتراض النية الحسنة لتالت ولاخر مرة
وحسبى الله ونعم الوكيل

معلش يا بيه متزعلش إن شاء الله تركب العربية و تتهنا بييها .. و كتيييييييير قوي من الناس عربيتهم جت متجرحة و مخدوش العربية .. و جاتلهم واحدة جديدة ..

توكيلات نيسان كلها محترمة متقلقش .. إنت بس موسوس شوية ..

ربنا يديك خيرها ويبعد عنك شرها

**Ahmed_Rahem** · 18-01-2012 09:38 AM

جزية اللزق الابيض الى على لاكبوت مفيش مشكلة انة يتشال، انما الفرش صعب شوية وبدون مبرر،
انت الاول بص على عداد الكيلو لو قاطعة فوق 50-60 كيلو اتكلم وليك الحق، بص بردة على تاريخ الموديل من ورق نيسان مش المورد، لانها ممكن تكون متخزنة فترة طويلة.
اخر نقطة تيدا مش بتتجمع هنا يبقى ازاى المورد عرف انها فى المصنع؟؟!!
اتسمك بحقك كاملاً ومتخدش حاجة مش عجباك،
تمم على الاستبن، شنطة العدة، الكوريك، مفتاح العجل، ممكن يكون حاطط طفاية الحريق، كل الازرار شغالة وجرب التكييف لحد ميجيب هوا ساقع وجرب كل السرعات وبعدين اقفلة، جرب كل الانزار والكاسيت (سى دى) جربة على اتنين سى دى واحد اوديوا وواحد ام بى ثرى والراديو والمرايات والريموت والمفاتيح تجربها على الابواب والشنطة والكنتاكت (كل مفتاح مش واحد بس)، وكل دة حقك.

وممكن العملية تكون بسيطة وانت مكبرها شوية فخد الوضع بهدوء من غير نرفزة.

والسلام ختام

**centon** · 18-01-2012 01:16 PM

المشاركة الأصلية كتبت بواسطة ahmed_rahem

جزية اللزق الابيض الى على لاكبوت مفيش مشكلة انة يتشال، انما الفرش صعب شوية وبدون مبرر

والسلام ختام

فعلا وده اللى خلانى اشك و اخاف
وبالنسبة لموضوع المصنع هو قصده شركة نيسان نفسها

**Bishoy.Girgis** · 18-01-2012 01:32 PM

المشاركة الأصلية كتبت بواسطة Omar_4ever

انا ليا تعليق على موضوع اللزق ده يا احمد بعد اذنك

لما كنت في الحرفيين برش عربيتي البيكانتو
لقيت هناك النترا 2012 هايلان جديدة بكياسها ومن غير نمر مخبوطة في الباب اليمين والرفرف
وكانت بتترش في نفس الفرن إلي انا فيه قبلي، وكان الصنايعي قاعد جواها ومولع سيجارة حشيش
فسألت السمكري قالي ديه اتخبطت وهي معروضة في المعرض وصاحب المعرض بيجيبها تترش وتتباع على انها جديدة !! قلتله طب ازاي ؟
قالي بتترش بنفس اللون بتاعها عن طريق كود اللون
بيتصفر عدادها حتى لو ديجيتال !
بتتغسل غسلة محترمة وخاصة من تحت
بنزلق عليها المشمع الأبيضع عالأبواب والسقف وكأنها جديدة

اقسم بالله اني شفت المنظر ده بعيني وإلي مش مصدق ينزل الحرفيين ويشوف

طبعا ده المعارض الصغيرة هي إلي بتعمل كده وده مش معناه ابدااا ان توكيل نيسان بيعمل كده ولا اي حاجة، انا بس حبيت اوضح حكاية اللزق ديه

علي فكرة كلامك صح يا عمر و انا نفسي شوفت ده بعيني في توكيل تويوتا لاقيت عربيات زيرو داخلة مركز خدمة سمكرة و دوكو في البراجيل و كان فيهم خبط و خدوش و لما سألت قالولي العربيات فيها مشاكل دهانات و داخلة تتظبط
بس عايز اقول لك علي حاجه يا centon انا عايزك علي الاقل تفلي العربية لما تاخدها و في موضوع انا عايز تقرأه كويس جدا عشان هيفيدك

http://www.nilemotors.net/Nile/212403-a.html

**BassamHafez** · 18-01-2012 04:37 PM

لو عايز تفرق بين عربيه والتانيه من غير ما تفتح الكبوت ورقم شاسيه ووجع دماغ

بص على الvin كود بتاعها

ها تلاقيه الكورنر الشمال من الزجاج الامامي وبقراه من خارج العربيه