الموضوع: طرمبة البنزين بعافية

المشاركة الأصلية كتبت بواسطة windsofchange

سيد باشا,,,,حصل معاي نفس المشكلة بعد تركيب عوامة وتجربتها لأن عندي العوامة بايظة وشايلها المهم ان شاء الله الطرمبة مفيهاش حاجة ,,,حصل عندي نفس الموضوع ونزلت خبطت عالتانك من تحت وسمعت الطرمبة بتحضر بنزين لكن ده حل مؤقت لما رحت للكهربائي فكها ولقي ان الصنايعي نسي يركب فيشة صغيرة جوه الطرمبة مش هتشوفها من عندك طبعا إلا لما تفك القربة كلها (جواها قلب الطرمبة والعوامة) وركبت واشتغلت الطرمبة الحمدلله وطلعت سليمة(كنت غيرت قلبها قبل كده متجيبش الصيني اللي ب70 جنيه ديه ابداااا لأن زي ما acoal قال المنطقة دي من العربية اللعب فيها عايز صنايعي وغالبا حاجات بتبوظ من كتر اللعب فيها زي خراطيم دي بلاستيك قاسي من كتر التني الخرطوم بيتقطع وتعمله افيز كاوتش وحوارات او تلحمه طبعا اللي بيتنيه صنايعي المفروض فاهم ويقلك مش هيحصل حاجة لكن بالعقل ده مش خرطوم طري ميحصلوش حاجة التني بيعلم عليه ويعمل تنيات فيه مع الوقت بتسرب بنزين ممكن تغرقه مياه دافيه تطريه شويه قبل الفك والتركيب) غير جوان القربة (دائري حول القربة) لازم يبات في مكانه كويس عشان تفول معاك ومتنزلش بنزين عالتانك ومنه للارض وريحة بنزين تقلبلك العربية قلب الطرمبة انا جبته زي اللي فيها vdo وبالمناسبة هي نفس الشركة اللي مصنعة عدادات العربية وبتاع باسات يعني البار بتاعه ميقلش عن 3.0 وب300 جنيه من الصفا فرمسيس مش فرمسيس الميدان في منطقة محيطة به وهي شكلها اصلي ومبرشمة بس صنع الصين ساعتها كنت جايب قلب بوش لون كرتونته اصفر ب400 جنيه مضروب والبشمهندس رشاد الكهربائي قاللي ارجعه لأنه مش اصلي وجبت الvdo من الصفا رمسيس او الصفوة مش فاكر اسمه بس هو فرمسيس المنطقة المحيطة(هحاول اشفلك الكارت) فمتسترخصش لو احتاجت تغيير قلب الطرمبة عشان كتر اللعب فالمنطقة دي ممكن يبوظلك عوامة او خراطيم بنزين (راجع,رايح,بخر بنزين) بس انا متفائل انها زي عندي سلكة فالته من ترمل كده فالقربة لما تفكها هتشوفها راكبه او لأ ,لو طلعت راكبه يبقي للاسف احتمال كبير الطلمبة ودعت,ده موقع شركة VDO فيه معلومات عن البار اللي محتاجه كل موتور فالطلمبة واكيد هيفيد بعد كده VDO - We are a leading international supplier of automotive electronics & mechatronics.

أقسم بالله انت معلم

انا بشكرك جدا يا ايهاب علي المعلومات دي
الصراحة انا اتعلمت درس في التعامل مع العربيات وخصوصا الألماني في الفترة الأخيرة دي وهي اني اجرب واشوف وانتظر لأخر لحظة وماديش ودني لأي صنايعي اياً كان لأن الصنايعي مهما كان محترف بردو شغال بمبدأ Try and Error او بالعامية "زغرتي يالي مانتيش غرمانة"
فعلا الصنايعي مش غرمان حاجة وبالزات لو واحد عنده في التوكيل قطع غيار بالهبل مرمية وبيجرب بيها مثال علي كدة "عصام" الي انا بتعامل معاه او غيره، عندهم قطع غيار لو شك في حاجة فورا بيجرب من عنده وانا متأكد لو عصام كان عنده واحدة كان جربلي بيها بس هو ماعندوش فقالي اشتني "فكرني بمحمد صبحي في المسرحية لما كان غني وأخنف" كل حاجة يقولك أشتري وهو مش غرمان حاجة هو بياخد مصنعية علي الفك والتركيب والتجربة
انا ماقصدش ازم في عصام او غيره ولكن ربنا ادالي عقل بفكر بيه وابقي غلطان لو ماتعلمتش من الدرس

أخويا كان عنده الطرمبة باظت بس هو لما باظت قطعت تماما
يعني لما فكها وخدها جربها علي البطارية دريك بردو قاطعة
واخويا قالي حاجة من اتنين ياأما هتبقي قاطعة خالص او لو أشتغلت هتشتغل ضعيف

وبالتالي انا مش دي الحالة بتاعتي
انا بتشتغل ساعات وتقطع ساعات

يعني مثلا قطعت تاني النهاردة وللأسف كان معايا اسرتي ونزلت وخدتهم مواصلات بعد ماركبنا ورستقنا نفسنا
كنت كاره نفسي وكاره الطرمبة

الله المستعان
،
،