الموضوع: فضفضه من واحد كان ماشي جنب الحيط طول عمره

انا طول عمري ماشي جنب الحيط مليش دعوه بحد و محدش له دعوه بيا و بنضم لحزب الفقراء لله اللي عايزين ياكلوا عيش و يعيشوا في امان ........ بدايه الموضوع من شهر 10 سنه 2010 و الحمد لله ساعتها فتحت شركه استضافه مواقع للانترنت و كان عندي عملاء كتير منهم ناس امريكان و كان عندي عربيه و كنت بكسب فلوس و انا قاعد في المكتب او في البيت يعني من الاخر الحياه المثاليه اللي بيتمناها اي شخص ........... جت الثوره المباركه و طبعا العملاء الامريكان خلعوا و المصريين قفلوا مواقعهم و كنت بعمل شغل اون لاين لشركه امريكيه اجر الشغل ده 80 الف دولار يعني كنت خلاص هعدي و اعرف اشتري شقه و اتجوز البنت اللي بحبها و امشي من بيت ابويا اللي اتخنقت منه بصوره غير طبيعيه بس اقول ايه في اللي قطع النت ........ طبعا قفلت الشركه و قعدت في بيتنا علي اساس انها غمه و هتعدي و طبعا انا بصرف علي نفسي بدون ما اخد جنيه من والدي من سنه 2009 و قعدت الفلوس تنقص تنقص و انا اقول هانت و البلد هتتعدل و اقدر اقف علي رجلي تاني ........ عربيتي اتسرقت و معرفتش ارجعها يعني خسرت شغلي و عربيتي و فلوسي ....... حاليا اخر فلوس معايا هتخلص علي شهر مارس بالكتير و انا بلا عمل تماما و مينفعش اخد جنيه من والدي ....... طبعا بعد البهويه اللي كنت فيها مبخرجش من البيت تقريبا و مش لاقي اي شغل زي شغلي السابق ......... حد يقولي انا ذنبي ايه في اللي انا فيه ؟ خسرت شغلي و فلوسي و عربيتي و كل حاجه بسبب قيام الثوره المجيده ............. الحق احق ان يتبع و كان لازم تقوم ثوره عشان شويه الحراميه اللي كانوا ماسكين البلد يتحاكموا بس اهه جت علي دماغي في الاخر ....... انا عارف ان ناس كتير اصبحوا زيي بعد الثوره بس المشكله ان انا 25 سنه و حاسس ان الدنيا اتقفلت في وشي خلاص و انا ما صدقت ان الدنيا اتفتحت في وشي ............. معلش طولت عليكم