الموضوع: فايدة علبة البيئة وسحب العربية وتجربتي الشخصية

النهاردة روحت لبتاع الشكمانات اللي بتعامل معاه، كان فيه خرم في العلبة الخلفية للشكمان ولسة لاحمها مفيش كام يوم، فك العلبة لقيها متهالكة خالص، مش مستحملة حتى اليد عليها، المهم قال لازم تتغير، طيب يا عم هو كل اللي عندك صناعة أبو اليزيد ولا فيه حاجة غير كده، فقال أنا عندي أبو اليزيد وعندي العلبة الأصلية بتاعة الدايو، وبالفعل جاب العلبة بتاعة الدايو وعليه الختم بتاع الدايو، وقالي بالمرة ننضف العلبة اللي من قدام، ونشيل اللي المادة اللي جواها وحتركب مكانها مصفاة، ولأني أثق فيه، قام فك العلبة الأمامية(اللي هي علبة البيئة طبعاً) واشتغل تكسير في المادة اللي عاملة زي الفلتر، وجاب بعد كده ماسورة ستانلس جامده، وخرمها زي الشبكة وف نصها عملها زي النجمة كأنها مسدودة في النص ، وركبها في العلبة ولحمها من الناحيتين، وبعدين ركب العلبة الجديدة الخلفية اللي بيقول إنها أصلية واللي بالفعل عليها شعار الدايو .
بعد كل القصة الطويلة دي النتيجة كانت صوت أهدى بكتير ، لدرجة إني بعرف العربية شغالة من العدادات.
ثانياً الراجل طلع أمين معاي حبيتين، حسب المادة اللي طلعها دي وقالي أنا بنبيعها لأبو اليزيد وبعملولها إعادة تصنيع وبتنزل في العربيات الجديدة، وبعد كل القصة دي
العلبة الجديدة+ تنضيف العلبة الأمامية+المصفاة اللي عملها+صنعته= 150 جنيه مصري. طبعاً الراجل راعى الصحبة والعشرة والمادة اللي أخدها. على فكرة هو مخدش العلبة كلها هو خد بس المادة اللي داخلها.
دي تجربتي مع الشكمان وعلبة البيئة ، بس في سؤاي محشور في نفسي: إذا كانت العربية من غير علبة البيئة حلوة وصوتها هادي وسحبها حلو، يبقى أيه لزمة العلبة دي رغم غلو تمنها؟
وهل اللي أنا عملته ده ليه تأثير سلبي على الموتور أو العربية بشكل عام؟
آسف جداً للإطالة.
مرة تانية: عربيتي دايو لانوس 99 كوري، 77 ألف ك

اولا انا وجهه نظرى ان هذا الشخص غيير امين بالمره لهذه الأسباب :

1- حضرتك رايحله عشان فى خرم فى العلبه الخلفيه ليه بقى يفتى فيها و يقول ننضف العلبه الأماميه بالمره ؟؟
2- لعلم حضرتك ان شكمان الدايو الأصلى صناعه ابو اليزيد و لا توجد عليه علامه دايو و ليس هناك افضل منه فى مصر يركب للدايو وهو الأصللللى اللى العربيه بتنزل بيه من التوكيل و انا رحت مصنع ابو اليزيد بنفسى فى 6 اكتوبر و لعلمكم ابو اليزيد بيعمل شكمانات البى ام دابليو و المرسيدس التى تجمع فى مصر خلاصه الكلام انه لا يوجد شكمان اصلى للدايو عليه علامه الدايو و اظن هذه اشتغاله الا اذا كان هذا الشخص واصل جادا و بيستورد علب شكمانات اصليه من كوريا مثلا ( خالى بالكو المصنع اتباع ) وبكده يبقى الراجل ده جامد جدا يعنى اقوى من الوكييل
3- الماده الداخليه لفتر البيئه غاليه و استاذ ممدوح فى موضوع سابق على ما اتذكر قال انه باعها من فتره ب حوالى 200 جنيه
4- التحسن اللى حضرتك لاحظته لآن ودنك خدت على الصوت العالى لأن كان عند حضرتك خرم فى العلبه الخلفيه و قمت بتغييرها و اذا كان عمل هذا فقط دون اللعب فى علبه البيئه كنت هتحس بنفس النتيجه و يمكن افضل
5 اذا كانت الماده الموجوده فى فلر البيئه تساوى 200 + 150 جنيه حضرتك دفعتهم = 350 جنيه فى شغلانه من وجهة نظرى الشخصيه لا تساوى اكثر من 100 جنيه بالمصنعيه و الأكراميه و بكده يكون كسبان من حضرتك حوالى 250 جنيه فوق مكسبه الطبيعى و هذه وجهة نظرى الشخصيه