الموضوع: لا هيونداى بعد اليوم ..............(قد تكون فترة محدودة)

ما كنتش اعرف ان الناس - مبقوقة - للدرجادي من غبور !!

الغريبة اللى مبقوق هما الى معندهمش عربيات هيونداى

سمعة باشا ..لو على اللي عندهم عربيات هيونداي و "مبقوقين " فحدث و لا حرج .....

حضرتك عندك هيونداي و مبسوط منها لأنها عربية كويسة و حتبقى أحسن كمان و كمان إن شاء الله .....بس هل حضرتك راضي عن مستوى الوكيل و خدمات ما بعد البيع ....

طب لو حضرتك راضي عندك إستعداد تشارك أخ ليك همومه و تجاربه السيئة مع الوكيل ...طيب عندك استعداد تكون فرد في جماعة مش هدفها مصلحة شخصية لكن مصلحة عامة و هدفها الضغط على غبور من أجل الصالح العام
مش معنى اني معيش عربية هيونداي اني ما يهمنيش الموضوع و مليش دعوة ....ألانامالية ديه نفسنا كلنا تتنتهي منها ...
يمكن الموضوع ده ما يعملش حاجة و ما يكونش له تأثير على غبور و لا غيره بس على الأقل نبقى اكتسبنا شرف المحاولة.....تقبل تحياتي و إن شاء الله تركب الجينيسيس:)

شكرا على الردود المحترمة يا جماعة الصراحة انا (لحد دلوقتى ) معنديش اى مشاكل خالص مع غبور نهائيا (غير طبعا الكذب فى معاد تسليم العربية) غير كدا انا بقالى سنة (11 شهر الا كام يوم) و مبسوط جدا من العربية و الخدمة فى مركز الصيانة بتاع ابو رواش (برده لحد دلوقتى ) اولا الحجز سهل جدا بالتليفون و بروح اسلم و استلم فى الميعاد و كله تمام و من ناحية النضافة العربية بيملوها اكياس و بيحطوا بلاستيك على الدريكسيون كمان و كل حاجة و كل اللى اتعاملت معاهم محترمين محدش نرفزنى و لا قالى كلمة مستفزة و لا اى حاجة بالعكس منتهى الزوق (برده لحد دلوقتى الله اعلم بعد كده) يعنى معنديش اى مشاكل نهائيا.

يا som3aa باشاا محدش شكك فى هيونداى

مش حضرتك اللى شككت بس ناس كتير شككوا و انا قريت كل الردود و اهى موجودة قدامنا لان الغلط من الاول كلمة مقاطعة هيونداى كان مفروض تبقى مقاطعة غبور.

طب لو حضرتك راضي عندك إستعداد تشارك أخ ليك همومه و تجاربه السيئة مع الوكيل ...طيب عندك استعداد تكون فرد في جماعة مش هدفها مصلحة شخصية لكن مصلحة عامة و هدفها الضغط على غبور من أجل الصالح العام

جدا لو حضرتك قريت ردى انا كتبت انى مستعد اكون اول واحد يقاطع بس بشروط اولا الفكرة يطرحها الاخوة اللى عندهم عربيات هيونداى و اللى يشارك فيها فى الاول اللى عندهم او اشتروا هيونداى و عانوا معاناة فعلية مش كلام فارغ موجود فى كل التوكيلات ساعتها انا موافق 10000% فى انى اقاطع غبور (طبعا و بالتبعية مش هشترى هيونداى) علشان اتاكد ان فى معاناة مش واحد و لا اتنين يعنى فعلا معاناة منغير تهويل و بعد كده تطرح الفكرة على الباقى اللى معندهمش عربيات غبور (كلها مس هيونداى بس يعنى المازدا كمان لو غبور لسه معاه التوكيل) و يطلب منهم مقاطعة غبور علشان المصلحة العامة انما نقول و نصمم على كلمة مقاطعة هيونداى مش غبور و اللى يطرح الفكرة و يوافق عليها اللى معندهمش هيونداى تبقى غريبة اوى , و انا مقدر ان حضرتك فعلا هدفك المصلحة العامة بس فى ناس مبيحبوش هيونداى و هدفهم المزايدة و خلاص.
و على فكرة انا مأيد و بطرح علطول فكرة مقاطعة التوكيلات و اولهم ميتسوبيشى بس الفكرة لو هنقاطع بسبب سوء التوكيل يبقى ناس جربت و عانت هما اللى يطرحوا الفكرة و يقنعوا الناس و بعدين الموضوع يتعمم و يكون على كل عربيات غبور مش الهيونداى بس.
التصميم على كلمة مقاطعة هيونداى دى فى حد ذاتها تحيز رهيب لان غبور عنده توكيل مازدا و طبعا محدش يقدر يكتب نقاطع مازدا.
لو خدت بالك كمان اللى عندهم هيونداى مردوش او ردوا كتبوا مقاطعة غبور يعنى محدش معترض على هيونداى الاعتراض على غبور.
للمرة المليون لو الموضوع جاد من اصحاب هيونداى ناويين يقاطعوا غبور انا اولكم ان شاء الله
و شكرا على الرد المحترم اللى يجبرنى ارد باحترام.

يبقى ما أختلفناش يا أخي الفاضل... الأختلاف على التسمية من لا لهيونداي إلى لا لغبور مش هي لب المشكلة ....الحمد لله ان حضرتك مبسوط من العربية و ربنا يديمها نعمة لكن نظرة سريعة على منتدى هيونداي حتلاقي مهازل يندي لها الجبين

متفق مع حضرتك تماما إن غبور مش هو بس اللي وحش ....كل التوكيلات بشكل أو باخر وحشين و حقوق المستهلك المصري يعنى أنا و حضرتك و كل الأعضاء مهضومة و عشان كده قلت انها خطوة في الطريق الصحيح و إن شاء الله يتبعها خطوات تانية ....لكن زاي ما حضرتك قلت هيونداي ٢٠ و لا ٣٠ ٪ من حجم السوق المصري فطبيعي الأنظار تتجه ليها أكتر

افتكرت جملة قالها أخي الفاضل الباشمهندس أحمد أنور و هو عقلية راجحة و شخصية متزنة و من أكبر المتحمسين لهيونداي ....قال ما معناه إن سياسة غبور في ظبط الجودة هي أطلاق العربيات المصنعة في السوق و بعدين اصلاح العيوب في مراكز الصيانة بعدين ....بقى ده كلام !؟

نقطة أخيرة.... زبون مازدا ...و على حد علمي هي مازدا ٣ بس ....غير زبون هيونداي..... و حجم المبيعات مختلف تماما .......قصدي إن غبور مازدا مش بنفس سوء غبور هيونداي:)

لا لهيونداي بعد اليوم