السلام عليكم .. في الاول انا عايز اعتذر يا شباب علي التأخير .. بس عندي زنقه شغل اليومين دول ..

الموضوع ده انا عامله عشان اكتب لكم انطباعاتي اول باول علي تجربتي مع الرينو اللوجان ..


أنا بس ليا ملحوظه قبل ما ابتدي .. انا في انطباعاتي ديه بقارن بعربيات زي الفيرنا و اللانوس و الافيو .. و ده لعده اسباب .. اولا ان العربيات ديه تعتبر في نفس فئه اللوجان .. و ثانيا لان هيا ديه العربيات اللي انا كنت بتفرج عليها و جربتها و بقارن بينها ..


نبتدي علي بركه الله ..


اول انطباع لي مع اللوجان يوم ما جربت العربيه يوم ما استلمتها .. العربيه فعلا واسعه من جوه .. مقارنه بالفيرنا و اللانوس و الافيو .. اللوجان هيا الوحيده فيهم اللي ركبتها من غير ما أرجع الكرسي للاخر .. – اخوكم طويل و مليان شويه :$ - .. و غير كده في مكان واسع و مريح لرجلي عند الدواسات – يعني في اللانوس مثلا حتي بعد ما رجعت الكرسي للاخر برضه رجلي اليمين كانت مزنوقه في الحته اللي هيا امتداد التابلوه ( اللي فيها الكاسيت و التكييف و حامل الأكواب ) و زي الافيو كمان - المشكله ديه مكانتش موجوده في الفيرنا .


الكنبه الخلفيه تشل 3 مستريحين اوي .. يعني مش هيكونوا مزنوقين او تعابنين و في مكان كويس للارجل ..


بالنسبه لي .. شكل التابلوه لذيذ .. ما حسيتش انه قديم او وحش زي ما بعض الشباب قال هنا .. بالعكس التابلوه و خصوصا باليل مع النور البرتقالي اللي طالع منه شكله حلو اوي - بس هنقول ان ديه في الاخر مسأله اذواق ..


تقفيل العربيه من بره حلو اوي .. مفيش بالنسبالي اي مشاكل ظاهره .. بس حسيت ان المرايه ناشفه اوي و حركتها مش سهله – لما بحاول اقفل المرايه اللي ناحيه الشارع بليل –


من جوه هو حلو برضه .. بس ده بالمقارنه مع اللانوس و الفيرنا و نوعا ما الافيو .. عموما هوا واضح فرق التقفيل عن العربيات اللي بتتقفل في مصر .. يعني في اهتمام بالتفاصيل الصغيره ..


التكييف شغلته مره واحده بس – عرفت انه غلط في التليين – بس هوا عموما كان حلو و قوي .. ده بالنسبه للكرسيين الاماميين .. مش عارف بالنسبه للكنبه الخلفيه كان عامل ازاي .. عموما هبقي ارجع للنقطه ديه لما اخلص التليين ..


العربيه فيها راديو سي دي .. و ديه بصراحه حاجه بسطتني جدا .. – كنت عامل حسابي لما اجيب اللانوس اني اجيب سي دي بلاير علي طول :D - و كمان زرار التحكم في المرايات الكهرباء حلو جدا و سهل الاستخدام ..


مكان ازرار الشبابيك الكهرباء بصراحه غريب شويه .. الشباكين الامامين في التابلوه .. تحت الكاسيت .. و الشباكين الخلفيين ورا فرامل اليد .. في الاول حسيت ان الاماكن ديه مش عمليه و مش محطوطه في مكان صح .. بس بعد التعود عليه مبقتش مشكله كبيره .. و ان كان برضه مكانهم غريب :) - متنسوش ان انا بقارن باللانوس و الفيرنا .. -


حامل الأكواب لذيذ جدا و الطفايه ممكن تتشال و تتحط ..


شنطه العربيه تعتبر بجد احد اكبر مميزات العربيه ديه .. بحر .. ممكن تشيل اتنين ركاب غير الخمسه اللي جوه العربيه :) . طبعا ممتازه في السفر و الرحلات ..



و ديه اول مجموعه من ملاحظاتي .. و انتظروا بالباقي تباعا ..