الموضوع: تجربتي مع " أوتوايجيبت " واسعار بعض قطع الغيار الاصليه

المشاركة الأصلية كتبت بواسطة Manchestrawy

الدهان مبالغ فيه فعلا .. خرط الطنابير انا مبفضلوش صراحه والطنابير عندي لم يتم خرطها قبل كدا

دهان اى عربية مهما كانت فى التوكيل بيكون مكلف اكتر من الورش اللى برة وده راجع لخامات الدهان نفسه بتكون اغلى وطبعا المصنعيات بتبقى اكبر بكتير من برة
وعلى فكرة مفيش اى دهان عربية بالكامل فى التوكيل اقل من 2500ج مهما كان حجمها والمبلغ بيزيد لو فى سمكرة او استبدال اجزاء من بودى

اما خراطة الطنابير فغالبا حضرتك فهمت المقصود بيه غلط لأن اتوايجيبت عندها جهاز خاص بمسح الطنابير بالليزر وبيكون قشرة سطحية لا تتعدى الجزء من المللى متر وده مفروض يتعمل لو ظهرت ريجة فى الطنبورة او عند تغيير التيل واكيد مش قصدنا الخرط برة فى الورش اللى بيبوظها ويأثر على كفاءتها زيه زى ملأ التيل مرة تانية وتكلفة المسح 105ج يعنى اوفر من تغيير الطنابير كل شوية
لمزيد من التوضيح .. اقرا الموضوع التالى:
http://www.nilemotors.net/Nile/266744-a.html

المشاركة الأصلية كتبت بواسطة Manchestrawy

صدقني والله يا استاذ يوسف .. توكيل نيسآن في الامارات ( المسعود للنيسان ) كان بيطلع كل الحاجات دي في الكشف .. لكن ممكن يكون السبب ان الفحص مجآني وعلى العموم حضرتك ادرى

والله مصدقك بس حالة العربية هى اللى بتحكم خاصة لو كانت مؤثرة فى كفاءة اجزاء مهمة من العربية
مش موضوع تسديد خانات وبس واقولك محتاج فيوز وهنا لمبة وهنا مفتاح بيعلق .. الاهم حالة العربية الفنية وسلامة الاجزاء الميكانيكية

المشاركة الأصلية كتبت بواسطة Manchestrawy

هيا ورشه المنتدى بتعمل كل حاجه ولا متخصصه ميكانيكه بس ؟ ولا سمكره بس ؟

ورشة المنتدى فى الحرفيين شغلها الاساسى سمكرة ودهان وليس ميكانيكا وكهرباء

المشاركة الأصلية كتبت بواسطة Ahmed.TV

والنهاردة يوسف فى التوكيل .. بيغير مقصات .. وكلمته قولتله اقعد مع اسلام وافهم منه الشرح اللى شرحهولك .. وحيطلعله التقرير بتاعك عشان نفهم القصة

فعلا انا كنت امبارح (الثلاثاء) فى اتوايجيبت بأغير المقصات الامامية لأنهم كانوا محتاجين جلب .. واستغليت الفرصة وسألت المهندس اسلام اللى استقبلك وسلمك تقرير العربية ووقفت اتكلم معاه اكتر من نصف ساعة بخصوص موضوعك فى حضور احمد محسن اخونا الجميل اللى شاء القدر انى اقابله صدفة وهو رايح بيستلم عربيته الليفينا بعد اصلاحها (ربنا يباركلك فيها يا ابو حميد ويعوضك خير باذن الله ومتشكر على ضيافتك ليا وقت الصيانة)
وخلاصة الحوار وتفاصيل التقرير والكشف الميكانيكى (فقط) فى النقاط التالية:

1. بالنسبة لاستعدال فردة الشاسيه .. م/اسلام بلغك انها محتاجة فعلا استعدال وعشان نعرف المقايسة بالظبط لازم تدخل ورشة السمكرة والاصلاح وليس ورشة الصيانة العادية اللى اتعمل فيها الكشف المجانى واتفقنا على اهمية عملها هى وشغل العفشة فى الاول

2. بالنسبة لملاحظاتك عن الانوار وكاوتشات المساحات والفوانيس .. هو اعتذر على السهو والخطأ واشار الى ان بند انوار التابلوه كان المقصود بيه نور العدادات والعالى والواطى ولمبات التحذير المختلفة وليس ليدات مؤشر بكرة التكييف زى ما قولتلك من قبل اما الفوانيس فهو معلم عليها فى امر الشغل ومحضر استلام العربية على الرسم الكروكى ومحتاجة ل4 فوانيس لأنهم مشروخين

3.بالنسبة للطنابير والتيل .. قال ان عربيتك محتاجة تغيير طنابير امامية فى المقام الاول قبل الخلفية (من الممكن تأجيلها بعض الوقت) ولكن عند تغييرها هاتضطر لتغيير تيل فرامل امامى ايضا رغم انك مغيره من فترة قريبة لأنه لو ركبت طنبورة جديدة على تيل قديم هايطبع عليها وممكن يبوظهالك هى كمان فمن الافضل تبديل الاتنين معا للاستفادة القصوى من طول العمر الافتراضى لها

4. بالنسبة لعلبة الدركسيون .. اتفقنا ان سعرها غالى جدااااا عليك وممكن فعلا يتم اصلاحها خارج التوكيل كحل مؤقت والامور تبقى افضل

5. بالنسبة لبلاستيكات تثبيت الراديتير .. أكدلى انه بلغك اهمية تركيبها بدل المكسورة لأنه مع الفرملة الشديدة من الممكن ان يضغط جسم الراديتير بثقله على البلاستيكة الاخرى ولا قدر الله ممكن تتكسر هى كمان وليس المشكلة فى دورة التبريد او نقص مياه او كفاءة وخلافه (يعنى حاجة وقائية)

6. بالنسبة للزيوت .. انت قولت انك مزود زيوت الفتيس والباور والفرامل وليس مغيرهم بالكامل وطبيعى طالما زودت جديد على قديم يبقى ما عملناش اى حاجة والاصح فى عربية مستهلكة بالشكل ده هو استبدال وليس استكمال السوائل بالكامل أما زيت المحرك فبالكشف الظاهرى عليه وجدوه اسود وفاقد اللزوجة وم/اسلام قالى انك حاطط الزيت ده من 7-8 الاف كم يعنى فى آخر عمره ولو كان موبيل وان (عن تجربة بيسود بعد 2000 كم بالكتير) واساسى تغير فلتر زيت مع كل تغيير للزيت

7. بالنسبة للدهان .. اتفق معايا على ضرورة اصلاح العفشة والشاسيه اولا قبل اى شىء للاستفادة حتى بالكاوتشات الجديدة

8. بالنسبة للسيور .. أكدلى على دقة فحص مركز اتوايجيبت بخلاف اى ميكانيكى برة انت سألته على حالته وقالك محتاج تغيير كامل للسيور والبلية ولكنه كان دقيق اكتر مؤكدا على سلامة الشكل الظاهرى للسيور وعدم الحاجة للتغيير وفقط يلزمك تغيير بلية الشداد (وعشان نحكم صح ياريت تصورلنا السير وترفعلنا صورته وان كنا لا نفهم فى حالتها اكتر من التوكيل خاصة لو كان اتوايجيبت مش اى حد تانى عاوز يغير ويزود قيمة الفاتورة وخلاص)

9. بالنسبة للمقصات .. زى ما قولنا قبل كده الجلب كبس فى المقصات ولازم تتغير كلها ولو قارنا الاصلى ابو 600ج بالتايلاندى ابو 165ج اكيد فيه فرق فى العمر الافتراضى والقرار الاول والاخير ليك

10. بالنسبة للصيانة عامة .. كان رده بالاتفاق على ضرورة اجراء صيانة 40.000 كم زى ما قولتلك من قبل ووضحتلك تكلفتها بالتفصيل الممل

واخيرا يارب اكون قدرت اوضح الرد بشكل يمنع اللغط واحتمال الصواب والخطأ بشكل يفيد جميع الاعضاء من تجربتك