اسلوب القيادة المثالي

**eldeplomasy** · 29-05-2008 05:43 PM

انا سمعت من ناس كتير وده فعلا منطقي ان طريقه واسلوب السواقه الغلط بيبوظ اسطوانه الدبرياج ويفوت المحرك وبيهدل العربية وبما اني على وشك اركب عربية جديده فكنت عايز اعرف اسلوب القيادة المثالي بداية من تشغيل المحرك والتسخين الى مدة الغيار وسرعة ضغط بدال البنزين والمحافظة على اسطوانة الدبرياج في العربيات المانيوال

وشكرا جزيلا

**Xpert** · 29-05-2008 08:12 PM

طريقه و اسلوب القياده الغلط يبوظ يأما اسطوانيه الدبرياج لو بتدوس دبرياج كتير .. يأما تيل و طنابير الفرامل لو بتدوس فرامل كتير .. و عامه لازم تدوس دبرياج و لازم تدوس فرامل بس حاول تقتصد في الدوس ...علشان واحد يشرحلك طريقه القياده المثاليه دي انساها تماماً دي من المستحيلات ... دي عاوزه الواقع و التدريب و لازم تاخد علي العربيه الاول ..

**khalid_adel** · 29-05-2008 08:31 PM

يااااااااااااااه
انا كل ما اتخيل ان في ناس جايبين عربيات والموتور بتاعها من اول ما استخدم ماعداش 3000 لفه في الدقيقه اقول يا سلاااااااااااااااام
بص يا سيدي اكيد شفت حد كبير او سواق تاكسي كبير وماشي بالهداوه كده وميعديش 90 مهما حصل وبيلمس او بيحسس في الضغط على البنزين وبيدوس فرامل من بدري وبراحه بس اهم حاجه مش بيعلق رجله على الدبرياج خالص ولما يقف يجيب مور ويشيل رجله من الدبرياج على طول
شوفت السواقه دي اهو لو انت عملت كده لايمكن العربيه تبوظ فيها حاجه ابدا غير الاستهلاك الاكتير من الطبيعي كمان ( يعني تيل يقعد 30 الف بدل 20 ) وهكذا

**khalid_adel** · 29-05-2008 08:38 PM

اه نسيت بالنسبه لتدوير المحرك يعني هما مرتين في اليوم كفايه (للحفاظ على المارش ) مره الصبح وانت رايح الشغل ومره وانت راجع البيت
بالنسبه للتسخين لو عربيتك حديثه (انجكشن) وبتحطلها موبيل 1 او شل الترا يبقى ممكن تدور وتمشي وانت كده كده مش بتعدي 3 ار بي ام فمفيش مشكله لحد ما تسخن وبعد ما تسخن :)
واهم حاجه متسيبش العربيه مركونه اكتر من يومين لان ده غلط على العربيه ككل ( احنا جايبينها عشان نستعملها ونتنقل بيها مش نركنها في الجراج)
ولما تبقى واقف في اشاره مدتها اقل من ساعه متبطلش العربيه زي كل اللي جنبك ما بيبطلو عربياتهم لان ده مش صح خالص سيبها دايره احسن
بكده تضمن العمر الطويل جدا لعربيتك في كل مكوناتها والضامن هو الله
ولو حد مسك في خناقك من الشباب اللي مستعجلين دول انا ماليش دعوه :)

**Nader** · 29-05-2008 09:59 PM

يا خالد باشا ياللي اتمسكت في كامين على سرعة 200 كيلوا

بلاش انت تتكلم في الموضوع دة احسن لك J

انا بختلف معاك بس في حتة انك لو واقف في اشارة لمدة

طويلة انك تسيب الموتور داير، لا اقفلة احسن.

اما حكاية تدوير العربية اكتر من مرتين في اليوم فدة

مش غلط، اصلها مش فورميولا وان المواتير الخاصة

بالفورميولا وان هي اللي مش من السهل انها تبطل وتشتغل

كتير في نفس الوقت وبعدين انت بتشبة نفسك بيهم اكيد علشان

الـ 200 ك/س اللي انت بتمشي بيهم يعني ولا ايةJ

بالنسبة للغيارات وبسبب اسعار البنزين فانصحك بالاتي

الاول يمشي العربية

الثاني لحد 40

الثالث لحد 60

الرابع لحد 80

الخامس ربنا معاك بعد ال80 في استهلاك البنزين!

الارقام دي هتخلي الـrpm تحت الـ3000 لفة على

طول ان شاء الله.

والباقي زي ما قال لك الاخوة

**Nader** · 29-05-2008 10:02 PM

بالنسبة للعفشة علشان تحافظ عليها متمشيش في شوارع مكسرة كتير

ودة طبعاً شئ مستحيل في مصر. والحل انك تمشي باقل سرعة ممكنة

وتاخد المطبات بسرعة متعلاش عن 5 كيلو في الساعة، والمطلوب اقل! .