الإنتماء غير اختيارى, انت بتنتمى الى اسرة او بلد او جنس او لون ودى حاجة بتتولد بيها ومتعرفش تغيرها,
الولاء اختيارى وبطبيعة الحال بيعتمد على ما تهواه نفسك (الاهواء) وده ليه عوامل كثيره منهم المنطقى ومنهم الغير منطقى,
زى مثلا العاطفه, تحب واحد اكتر من واحد , ودى مش لازم تبقى منطقية,
وزى برده التوافق الفكرى والاجتماعى والدينى - وملهاش علاقة بالعنصرية- وفى معظم الاحوال,
انت لو عامل, طبيعى هتتعاطف اكتر مع العامل الى شبهك اكتر من المهندس الى انت شغال معاه حتى لو كان المهندس ده حبيبك والعكس صحيح,
نفس الكلام بالنسبه للدين ومش شرط يكون حتى دين اخر, فى معظم الاحوال, لوحتى انت مسلم متدين ومربى دقنك هتلاقى نفسك غصب عنك بتتعاطف مع الى شبهك وفكره الدينى قريب منك اكتر من اللى مش شبهك والعكس صحيح ,
و بطبيعة الحال المصالح الشخصية لو ليك مصلحة عند واحد وانت حتى مبتطيقوش, ممكن تلاقى نفسك بتعامله كويس لمجرد انه مديرك فى الشغل مثلا, بس ما بينك وبين نفسك عارف ان انت ولائك ليه بحكم منصبه بس,
وبتختلف على حسب شخصية كل واحد, فى ناس بتعامل الناس كلها كويس حتى لو كان فى حد اقرب لقلبها من الأخر وممكن ميحسسكش بكده,
وفيه ناس من وشك تقولك كلام زى الفل ومن ضهرك نفضل تشتم فيك وفى ناس معندهاش ولاء غير لنفسها, ملهوش عزيز, مصلحتى مع ده النهارده يبقى حبيبى, وبكره ولا اعرفك.
"ولو شاء ربك لجعل الناس أمة واحدة ولا يزالون مختلفين"
صدق الله العظيم.
المفضلات