الموضوع: الى عايز الكيت الجديد يخش هنا ضرورى

المشاركة الأصلية كتبت بواسطة damasry

الله ينور يا احمد ومحدش يقدر ينكر مجهوداتكم فى القسم

طب يعنى انا كده بخ بالنسبة للريموت الكامل :(

عارف والله يادمسرى .. سالتلك قبل كدا على ريموت بشكل مختلف وزى فكرة الاستايل اللى معانا للاوبل .. ملقتش عندهم يا حبى .. فمش نسيتك والله .. وحفضل ادعبس لغاية لو لقيت حاجة اكيد حقولك وابعت اجبهالك على طول بدون نقاش

المشاركة الأصلية كتبت بواسطة moussef

ahmed tv كلام جميل ومتيييييييييييييييين

العفو يا فندم .. وشاكر تقديرك الغالى من اخ عزيز
معلش انا كان كلامى صريح .. واسف ان صراحتى ممكن تزعل حد منى من الاعضاء الجدد فى القسم ..

المرتين اللى فاتوا .. حصل فيها قصور .. وسلبيات ..

من ان نبعت نجيب وناس تحجز بالاسم .. ولو اتاخروا مثلا علينا عشان ياخدوا حاجتهم بنضطر نديها لناس تانية عشان نلم الفلوس فبيزعلوا مننا وياخدوا موقف مننا عشان اتصرفنا فى الحاجة اللى حجزوها باسمهم .. فمعندناش استعداد نزعل حد مننا تانى .. وعشان كدا قولنا نلم الفلوس قبل ما نجيب الحاجة .. عشان تكون محجوزة للعضو .. ووقت ما يحب يستلمها فى اى وقت اهى متشالة باسمه وبفلوسه اللى حجزها

وبردوا المرتين اللى بعتنا وجبنا الحاجة على حسابنا فيها .. فى ناس بتلتزم بكلمتها معانا بس فى ناس بتغير رائيها فى اخر لحظة .. وتصرف نظر .. وطبعا الحاجة مفروض جاية على اسمهم .. فحاجة بتزعلنا بصراحة ..

وكمان النقطة الاهم .. وتهمنى شخصيا وتهم الاعضاء القدامى .. اللى تعبوا معانا فى بناء القسم وهى .. ان فى ناس بتيجى تاخد الحاجة واول مرة نشوفهم جوة المنتدى وبره المنتدى وبعد كدا ولا بنشوفها تانى ولا بره المنتدى ولا جوة المنتدى حتى ..

فاسف .. الخدمة دى بنعملها عشان روح التعاون والمحبة والتشارك فى المنتدى .. لو فاتحين محل .. فاساعتها مش حيفرق معانا غير مصلحتنا واللى يجى يشترى ويمشى خلاص فمش فارقة .. لا طبعااااااا .. مش ده منهجنا ولا اسلوبنا ولا طريقة تفكيرنا
ده معمول بسبب الترابط والتشارك بين الاعضاء .. ولزيادة النشاط فى القسم بمشاركات الجميع المثمرة داخل القسم .. حتى لو ان شاء الله يدخل العضو يقول هاى عاملين ايه فى موضوع الدردشة .. او يدخل يبارك ويهنى فى اى مناسبة لاى عضو فى القسم .. او يحضر مقابلاتنا الجماعية
على فكرة .. فى اعضاء مشاركتها قليلة جداااا .. بس مش بتفوت مقابلة لينا ابدا ..
والروح دى .. اللى ميزت قسم نيسان .. وحتخليه يكون منتدى مش قسم منبثق من موقع نايل موتورز .. وده جه من خلال ترابط الاعضاء مع بعض .. والموضوعات الحيوية اللى فيه .. والسمعة الطيبة اللى وصل ليها

فده خلاصة كلامى للجميع .. واتمنى ان محدش يزعل من الكلام ده .. وياريت تراجعوا الموضوعات القديمة فى القسم بسبب موضوع الريموت ده عشان تتاكدوا من الكلام
واحنا بنقولكم بواقع الخبرة اللى اخدناها .. وبواقع الروح اللى قايمين بيها .. واتمنى ان الشروط ده متزعلش حد فيكم .. وتتقبلوها بصدر رحب

واعتقد كل اعضاء قسم نيسان .. متفهمين لكلامى ده .. ومتفهمين للدور اللى بنقوم بيه جميعا مع بعض فى القسم

تحياتى للجميع
منسق القسم