الموضوع: احكيلنا قصه حياتك مع العربيات ركبت كام عربيه

تماااام كده
كله بقي يقوم يعمل كووبايه شاي او ربع كيلو لب و يجي

و اودي حكايتي يا جماعه

انا حكايتي مع السيارات ابتدت من وانا عندي سنة واحدة في 83 في الكويت. وقتها ابويا (زي كل المصريين العاملين بالخليج) كان محتار بين البيجو ال 505 و المازدا ال 626. قام جاب ورقتين و كتب علي وحدة بيجو و التانية مازدا و حطهم قدامي عشان اختار و اخترت البيجو و قد كان و اشتراها ابويا و كانت اوتوماتيك و مكيفة طبعا و كانت برضة اول عربية زيرو يشتريها عشان كدة فضلت موجودة لحد ما بعناها في 2005 بعد ما نزلناها مصر سنة 86.

و لسه فاكر اول حادثه ليا و كان عندي 4 سنين و كانت بعربية والدتي المازدا ال 121 موديل 80 و كنت قاعد قدام جنبها و فرملت فجاة و انا طرت و لبست في البربريز طبعا و قتها حزام الامان و كراسي الاطفال كانوا كماليات .

خلال فترة طفولتي والدي كان شغال في مزرعة مواشي و كانت تعتبر بعيدة و مشوارها طويل عشان كدة كانت الشركة اللي ماسكة المزرعة بتديلو عربيات يستخدمها اذكر منها سوبارو بس مش فاكر اسهمها (غالبا امبريزا) و ايسوزر تروبر اول معرفتي بال 4x4 و في 89 قرر ابويا يجيب عربية لية بدل ما هو معتمد علي عربيات الشركة و جاب فولو 240 و كانت دبابة مش عربية. و في سنة 90 ابويا اترقي و اخد باجيرو موديل السنة لاستخدامة و ده انا فاكرها كويس لانها كان فيها اوبشنش كتير اعزهم علي قلبي وقتها فتحة السقف اللي كانت كبيرة جدا و ممكن اللي في الكراسي الخلفية يستمتعوا بيها و هو ده اللي كنت بعملوا انا و اخواتي باننا نقف علي الكنبة و نطلع روسنا منها. في نفس السنة حصل الغزو العراقي و كانوا العراقيين بياخدو العربيات الجيب من صحابها و عشان كده ابويا خبي العربية لحد ما صاحب الشركة طلب انو ياخدها عشان يهرب بيها عن طريق الصحرا و ادانا بدالها تويوتا كرسيدا موديل 88 و نزلنا بيها هي و الفولفو علي مصر. و في الطريق كنت راكب مع ابن عمي لانو كان لوحدو و اتعلمت السواقة من خلال النظر الية طول السكة من الكويت لحد العقبة في الاردن حيث تم نقل النساء و الاطفال عن طريق القوات المسلحة المصرية بطائرات نقل الجنود الي مطار القاهرة .

بعد الغزو سنة 91 رجعنا الكويت بالفولفو اما الكريسيدا بعناها في مصر و سنة 92 و بعد ما الاحوال اتظبطت قرر ابويا انو حان وقت و داع الفولفو و بدلها ببيجو 405 و كانت فاضية و مانويل علي اساس انو ينزلها مصر و في نفس السنة جبنا لوالدتي نيسان جلوريا و دي كانت موديل 89 لكن كان فيها تكنلوجيا عالية جدا و ده كان اكبر مسبب للمشاكل فيها. و في سنة 95 و بعد ما عرف ابويا انو غلط انو جاب البيجو فاضية و لان تكيفها كان علي قدو قرر انو يغير و كان برضوا محتار بين المرسيدس ال C180 او الباجيرو و كان راي انا و اخواتي انها مش عايزة تفكير اكيد الباجيرو (كنت لسه عيل اهبل) و ده طبعا بسبب الذكريات الجميلة مع سابقتها و بعد الاستخارة جبنا الباجيرو و بعدها بسنة جبنا جالانت لوالدتي بدل النيسان و في سنة 98 سبت الكلام ده كلة و نزلت مصر لدراستي الجامعية و ده فصل جديد

طبعا اللي فات ده كلة ميعتبرش احتكاك حقيقي بالعربيات حيث اني ماكنتش بسوق اي حاجة منهم (الا الباجيرو و الجالانت في وقت لاحق) لكن انا كنت متابع عالم العربيات و كنت بشتري مجلات بانتظام و بقرا كاتلوجات العربيات اللي عندنا من الجلدة للجلدة و عارف كل اوبشن فيهم و طبعا كل ويك اند باخد الجردل و الفوط و بنظفهم من جوة و ده كانت متعة ليا

بعد ما نزلت مصر و لما طلعت الرخصة (المصرية و الكويتية) سنة 2001 ابويا طلعلي البيجو ال 505 (فاكرينها) عشان استخدمها و طبعا العربية مركونة من 86 و مبتتحركش الا شهر كل سنة. طبعا ده كان له تاثير كبيييييير علي العربية و يا ما عملت فيا مواقف بايخة و غيرت فيها حاجات كتير اهمهم الجير كلة لان التروس اتاكتلت بعيد عنكم لكن اكبر مميزاتها ان صاجها كان حديد و متورها كان جامد 2000 سي سي بقي و كانت حلوة و مريحة علي الطريق. طبعا انا ما كانش ليا في الجري ساعتها فمحصلش و جربت الثبات بتاعها فوق ال 120 . طبعا في الاجازات لما كنت بنزل الكويت جاتلي الفرصة اني اسوق الباجيرو و الجالانت و طبعا الفرق بينهم و بين البيجو كان فرق السما من الارض خصوصا الجالانت لانها كانت في نفس فئة البيجو و نفس سعة الموتور لكن فرق النعومة و الراحة و الاوبشن حاجة تانية

و في 2002 و انا فرحان بالبيجو و بفر فيها في شوارع المحروسة و صلني خبر من الكويت زلزل كياني. و صلني ان والدي جاب اودي A6 طبعا انا اول ما سمعت كدة بقيت اعد الساعات عشان انزل الكويت و اسوقها و طبعا اول مانزلت الكويت تقريبا قضيت اول ليلة ليا فيها. ده كانت اول عربية الماني احتك بيها عن قرب و كانت اختراع و سواقتعا كانت متعة خصوصا مع الستريبترونيك و سحبها كان جبار رغم انها كانت 2400 سي سي بس ده غير الفخامة و التقفيل الرائع و لكم ان تتخيلوا لقائي مع البيجو لما رجعت مصر. في صيف نفس السنة ابويا خد البيجو في مشوار و لما رجع راح راميلي المفتاح و قالي خد الكراكة بتاعتك دي و شوفلي عربية حلوة عشان يجيبها طبعا انا كنت هطير من الفرح لان العربية الجديدة اكيد هتبقي تحت ايدي. بعد مسح شامل للسوق وقتها و قع اختياري علي الكرولا لانها كانت افضل ما في فئتها و توكلنا علي الله و جيبناها و يشاء القدر اني اعمل بيها حادثة في اول اسبوع و ده اللي خليها تتركن و اخاف و اكش منها و مقربلهاش و خلتني مع البيجو الاصيلة و المدرعة....

في 2003 ربنا كرم اختي و قبلت في جامعة الكويت و طبعا احتاجت عربية و حيث ان الباجيرو كانت لا تستخدم اخدتها والدتي و ادت الجالانت لاختي. و لان الباجيرو كانت تعتبر نص نقل بالنسبة للجالانت والدتي محبتهاش و تم استبدالها بباجيرو الجديدة اللي بقت انعم و اكتر تحضرا من الموديل اللي كان معانا و عجبت والدتي و طبعا جربتها في اجازتي و صعقت لمدي التغيير اللي حصل بين المودلين لان الجديدة كانت انعم بكتير و سواقتها اسهل.

في 2004 ابتدت البيحو تقل باصلها معايا و قعدت عن الميكانيكي اكتر ما قعدت معايا فقرر ابويا انه كتر خيرها علي كده و بعتها و لسة فاكر تاثر والدي و احنا بنسلمها. و انا استلمت الكرولا و حاربت خوفي و قلقي منها. وفي نقس السنة فوجئت باني والدي قرر ينزل الباجيرو مصر و يجمركها و قد كان. الكرولا طبعا مش محتاجة راي فيها الكل عارفها عربية محترمة جدا جدا و تكيفها خارق و كنت مبسوط اني احسنت الاختار و جبناها و يعيبها انها كانت 1300 سي سي بس فمكنش في فرصه اظهر طيش الشباب بيها ههههه

و في اول اجازة بعد الموضوع ده كنت متشوق عشان اعرف العربية اللي جت بعد الباجيرو و لقيت السيتروين C5 موجودة. الاختار ده كان مفاجاة خصوصا ان الفرنساوي مش منتشر و لا محبوب في الخليج بالاضافة ان العربية شكلها ما كانش عاطفي مع انها كانت مليانة اوبشنز و سواقتها مريحة للغاية و ده اللي كان عاجب والدتي جدا لكن انا كانت الاودي هي رقم واحد. و بما ان الجالانت كانت برضة شبة انتهت علي يد اختي كان ليا مشاركة في تبديلها باللانسر البومة و اللي كانت لسة نازله و كانت عاجباني و طبعا عجبت اختي.

في 2005 و انا في مصر برضوا و صلني خبر اشد صعقا من خبر الاودي الا و هو ان الاودي ابويا رجعها للشركة و جاب بي ام 730li و ده كانت بتشجيع من زميل لية لبناني في الشركة اشترك معاة و جابوا عربيتين زي بعض. طبعا انا كنت عايز اخد اول طيارة نازلة الكويت و حيث اني كنت مش هانزل في الاجازة لان ده كانت سنة التخرج اتقهرت اكتر. المهم اتخرجت من الجامعة و حيث اني كنت هرجع الكويت قررنا نبيع الكرولا لان ركن و تخزين عربيتين كتير و مالوش لزمة. و لما وصلت الكويت كان لي لقاء مطول مع البي ام و قعدت اشتكشف فيها و في ال iDrive فترة طويلة و طبعا السواقة و الفخامة دي عايزة موضوع لوحدة.

ابتدت رحلتي مع الوظيفة و طبعا احتجت لعربية و ابتديت ادور و اجمع معلومات عن العربيات المتاحة في السوق لكن والدي كان ليه راي تاني. شركتة كانت عملت شغل مع توكيل كرايسلر و بدل الفلوس خدوا 10 عربيات كرايسلر كونكورد كانت واحدة منهم من نصيبي و حيث ان الدفع كان بيتم لشركة والدي ما كانش قي فوايد و لا ضمانات و لا كفيل و لا حاجة من الكلام ده و وقفت عليا ب 5000 دينار بعد تخفيض 300 دينار عشان والدي.

الكونكورد ده كانت حكاية كانت طويـــــــــــــــــلة و المساحات الزجاجية فية قليلة و واطية فالقعدة فيها كانت كانك قاعد في غواصة و مبيبانش الا راسك بس. طبعا ده كان اختلاف جذري بينها و بين الكرولا اللي كنت متعود عليها و كنت ببقي مدايق من سواقتها. الحاجة التانية المتور كان 2700 سي سي و ده كان قليل اوي علي العربية لان وزنها تقييييل و طبعا السحب كان ضايع و اللي زاد و غطي ان السرعة القصوي محددة علي 180 بس و ده بالنسبة لشاب شيئ يدعو الي الكئابة. المهم قررت بعد مناوشات و مشاورات مع ابويا ان اروح التوكيل و ابدلها بحاجة تانية و حيث ان توكيل كرايسلر كان هو نفسة توكيل ميتسوبيشي و قع اختياري علي باجيرو البابين لكن تاتي الرياح بما لا تشتهي السفن تم تثمين الكونكورد و كانت عاملة 3000 كم بس ب 2500 دينار يعني نص التمن . و بعد الصدمة دي ققرت اخليها و اتعود عليها بدل ما اخسر فيها كل ده و فعلا قعدت معايا 3 سنين و بعتهافي 2008 ب 2750 دينار لاني سبت الشغل و نزلت مصر اكمل دراستي.

في هذه الاثناء كانت اختي التانيه دخلت الجامعه و طبعا زي اللي قبلها استولت علي الستريون من والدتي و تم شراء نيسان مورانو لوالدتي و دي تعتبر اول معرفتي بفئه الكروس اوفر لانها علي الرغم من علوها عن الارض لمن سواقتها تعتبر زي السيدان لكن بصراحه مش قادر اتقبل الفتيس ال CVT لانه بيقتل الشعور بالتسارع و التقلات لكنها عربيه محترمه جدا و durable جدا.

و خلال نفس الفتره ده و زي ما انتم عارفين سواقه البنات و الستات الستروين كانت انتهت في خلال سنتين من تولي اختي لقيادتها و طبعا لما حان اوان التغيير تدخلت انا و لان اختي كانت عايزه حاجه عاليه زي والدتي وقع اختياري علي الميتسوبيشي اوتلاندر و طبعا ال V6 ههههه و هي عربيه محترمه جدا جدا و سواقنها سهله و ممتعه و خصوصا انك جواها كانك سايق و قاعد في لانسر شارك لانها مشتركه معاها في الطبلون و يمكن ده عيب العربيه الوحيد

في خلال كل اللي فات ده كان في عربية مسيطرة تماما علي تفكيري و بتلوح كل ما اشوفها و كل ما اكون جنب توكيلها لازم ادخل اتفرج عليها و اقعد فيها و هي الفولكس الطوارق و عقدت العزم اني في يوم من الايام و لو ربنا وفقني لازم اجيب العربية دي و زاد هوسي و اعجابي بيها لما نزلوا القيس لفت منها.

الحمد لله خلصت الكورس اللي في مصر و سافرت امريكا عشان امتحن و لما رجعت الكويت و اشتغلت تاني ربنا كرمني و نويت علي الطوارق و طبعا ده بدعم والدي بحكم معرفتة لناس في التوكيل. وفي احدي سفرياتي لامريكا فوجئت لما رجعت انه بيقولي عربيتك الجديدة جاهزة و روح قابل شخص معين عشان استلمها. روحت و الفرحة مش سايعاني و قابلت الراجل و خدني و دخلنا توكيل البورش اللي هو برضوا نفس وكيل الفولكس و لقيتو بيفرجني علي الكايين و بيسالني علي راي. انا طبعا اتفلسفت و قولتلوا ان هي و الطوارق واحد و انهم مشروع مشترك و القصة اللي انتم عارفينها قعد يقنعني ان دي بورش و ان العربيتين غير بعض و انا اعافر و مستغبية و بقول في بالي هو جايبني يزلني و يعيارني و لا اية.
و فجاة لقيتو بيقولي مبروك دي عربيتك انا اقنعت و الدك و خلصت في الكايين و بسعر ميفرقش كتير عن الطوارق. انا كل اللي طلع عليا ابتسامة بلهاء و مستني بتوع الكاميرا الخفية او اديني عقلك يطلعولي و لما لقيت الموضوع بجد تنحت و جالي سهم الله لدرجة الراجل فطس من الضحك و كلم ابويا عشان يجي يلحقني. استلمت العربية و انا مش في وعي و سقتها للبيت و انا مرعوب و مش مصدق نفسي و سيبتها مركونة يومين علي ما فقت و ابتديت اسوقها و اتعود عليها.

و من هنا بقي تبتدي فتره حبي و عشقي و هيامي بالكايين و الدخول في عالم بورش و ده عايز 5 مواضيع اقعد احكي فيهم عنها لكن اهو راحت لصاحب نصيبها و هتفضل العربيه ده اعز واحده في قلبي و ان شاء الله ان شاء الله ربنا يقدرني و اقدر اجيب واحده تانيه

في هذه الاثناء بقي تم بيع البي ام دبليو بتاعت والدي لانها دخلت في الفتره اللي اجزائها ابتدت تحتاح صيانه او تغيير و طبعا ده كان مكلف جدا فوالدي قرر انه كفايه عليها كده و تم شراء مرسيدس S350 موديل 2009 و طبعا كانت ب Kit AMG و ده كان مغير شكل العربيه تماما بالاضافه الي بعض المواصفات الاضافيه و من الاخر العربيه دي عربيه ملوكي و انا شخصيا كنت مسميها بساط الريح لانك جواها معزول تماما عن العالم الخارجي و لا بتحس بدوشه و لا بطريق و لا يحزنون و في 2011 تم بيعها لان والدي قرر انه يعود لمصر و برضه فراقها كان صعب

طبعا قرار العوده لمصر ده و في الظروف اللي البلد فيها كان قرار صعب جدا و طبعا الاصعب منه نجيب ايه في مصر و ده بقي قصه تانيه و عايزه موضوع لواحده و لما نشوف انطباعكم عن قصتي دي نبقي نكملها باذن الله