الموضوع: سؤال للخبراء ... إزاي ممكن نعرف أن السيارة قيمتها فيها ولا لأ

المشاركة الأصلية كتبت بواسطة karemof

السلام عليكم,
واضح أن الموضوع لم يلاقي الأهتمام اللي كنت متوقعه
عموما هي كانت فكرة الهدف منها مساعده أي حد مقبل على بيع/شراء سيارة جديده/مستعملة عن طريق تقديم أرقام حقيقية من واقع تجارب الأعضاء
مع الشكر لكل من ساهم في الموضوع

ليه حضرتك بتقول كدة ؟؟؟

انا شخصيا الموضوع عاجبني جدا
بدليل اني مشارك فيه باكتر من مشاركة

بس هي عموما الموضوع يتلخص في التجار
التجار هما الي بيعملوا للعربية قيمة وهما الي بيخسفوا بالعربية في الأرض

تعال شوف اول لما السيراتو نزلت

والله كنت بشوف في اهرام الجمعة صفحات بحالها المعارض مش بتعرض غير سيراتو ويقولك سيراتو جنوط 17 وسيراتو فرش جلد سيراتو وكيل سيراتو خليجي سيراتو هاي لاين سيراتو اسود

تحس انهم بيعلنوا عن السيراتو بجميع الكماليات الممكنة

لحد فعلا لما خلوا السيراتو فووووووووق في السما

تعال انزل السوق (اقصد سوق العاشر)
التجار بينشروا ناس في السوق تفطس
وناس تعلي
وناس تطفش

ولو عايزك ماتعرفش تبيع مش هيخليك تبيع
ولو عايز يشتري منك هيفضل يطفش لحد لما تبيعله هوا

التجار عندنا هما الي بيحطوا سعر المستعمل
زي بالظبط موضوع ان النمر تنزل 5000 من سعر العربية

التجار في منهم بياخد العربية المتبهدلة شوية بسعر طبعا بخس ويقعدها معاه ولو محتاجة مصاريف بيصرف علي القد وبيلم العربية بمليمين ودة بيسموه بيعملها سوقي وبعد كدة يرجع يبيع
التاجر الي بالمنطق دة لا يمكن يشتري اوبل فيكترا مثلا
ليه ؟؟؟
لأنه مش هيعرف يلمها سوقي ويصرف عليها مليمين ومش شوية البوية اللميعة هما الي هيبيعوها لأن معروف ان العربيات دي بتتباع حالة
كمان البي ام
كل الألماني بوجه خاص
وكل الأوروبي بوجه عام

مايعرفش يعمل كدة في بيجو 406 مثلا

وبالتالي تلاقيهم كارهين الأوروبي ويحاول يطلع فيه القطط الفاطسة
ويطلعوا اشاعات عليه زي مثلا مالوش قطع غيار
او يقولك قطع غياره مولعة

لأنه مثلا لو جاب عربية ولقي مكنة الزجاج مش شغالة لو جه يغيرها هيلف عليها شوية ولما يلاقيها هيلاقيها بمثلا 300 و لا 350 جنيه فبالتالي العربيات دي بتخسر معاه جدا علي هكس عربيات تانية بدون ذكر اسماء
قطع غيارها كتيرة ومتوفرة ورخيصة وشوية بوية بيخلوها عروسة

طبعا انا ماقولتش كل كلامي لكن اعتقد ان وجهة نظري وصلت لحضرتك

وللحديث بقية

والله المستعان
،
،