سؤال عن كيفيه تنظيف ثلاجه التكييف ( المبخر )

**Tamer_Merit** · 07-03-2012 06:25 PM

محدش عنده فكره ازاي انضف ثلاجه التكييف ؟؟؟
هيه موجوده ورا درج التابلوه والمفروض - لو انا فاهم صح - فلتر التكييف يمنع وصول الاتربه والغبار ليها ولداخل السياره , بس انا ما ركبتش الفلتر و ودلوقتي حاسس ان اندفاع الهواء قليل شويه واكيد لو التلاجه مسدوده التبريد كمان هيقل .
انا كده محتاج انضف التلاجه دي كويس وبعدين اركب فلتر التكييف ان شاء الله قبل الصيف ؟؟؟

**Amr2004IBM** · 07-03-2012 08:01 PM

متابع
الموضوع ده شاغلنى بقاله فتره ونفسى اغسلها بالمياه والصابون بس طبعا ده صعب وخايف يكون فيه خطوره علشان كده انا نفسى حد يفدنى بتركيب الداخلى للثلاجه الداخليه علشان نعرف نحدد ايه الى ممكن ننظفه وايه الى منقدرش
انا لحد انهرده بنضفه بنفخ ال هواء من داخل والى الخارج والعكس
وبعدين اجيب عداد الحراره على اعلى حاجه و اروش اسبراى ديتول واقفل العربيه لمده 10 دقائق علشان اقدى على قد ماقدر على الميكروبات والفطريات المسببه لرائحه الكمكمه
غير كده اخاف اعمل حاجه تانيه

**Tamer_Merit** · 07-03-2012 09:12 PM

من سااعه ما كنا بنتكلم في الموضوع ده وانا بادور على طريقه وما وصلتش لحاجه سواء على المنتدى او من جوجل ..... وجربت اعملها بخرطوم الهواء في البنزينه وفكيت مكان الفلتر وضربت الهوا منه للهوايات والعكس بس مفيش نتيجه . وكل ما اشغل المروحه الاقي تراب بيطلع من الهوايات وورق شجر صغير والمشكله الاكبر ان اندفاع الهوا قل عن الاول .. ان شاء الله نوصل لطريقه نقدر بيها نغسلها بالميه من غير اضرار .

**Dr'AhmZZong** · 07-03-2012 09:14 PM

المشاركة الأصلية كتبت بواسطة Amr2004IBM

متابع
الموضوع ده شاغلنى بقاله فتره ونفسى اغسلها بالمياه والصابون بس طبعا ده صعب وخايف يكون فيه خطوره علشان كده انا نفسى حد يفدنى بتركيب الداخلى للثلاجه الداخليه علشان نعرف نحدد ايه الى ممكن ننظفه وايه الى منقدرش
انا لحد انهرده بنضفه بنفخ ال هواء من داخل والى الخارج والعكس
وبعدين اجيب عداد الحراره على اعلى حاجه و اروش اسبراى ديتول واقفل العربيه لمده 10 دقائق علشان اقدى على قد ماقدر على الميكروبات والفطريات المسببه لرائحه الكمكمه
غير كده اخاف اعمل حاجه تانيه

**WalidAdel** · 07-03-2012 10:57 PM

ايه الحلاوه دي ياعمرو ميه و صابون مره واحده ياراجل ياطيب
الميه و الصابون دي في ثلاجة البيت بس ياحبيبي
التلاجه دي هيا مش ثلاجه بالمعني المفهوم هيا عباره عن مروحه اللي هيا بتشتغل بزرار السرعات و هيا اللي بتدفع الهو في الهوايات اللي في التابلوه بها موتور و كارتة الكترونيا علشان تديلك السرعات (1 - 2 - 3 - 4 )
قال و يقولك ميه و صابون قال
اقصي حاجه ممكن تتعمل هيا انك تعمل زي ماعمرو بيعمل كده بخرطوم الهوا من جوه (مكان فلتر التكييف) و من بره مش عارف فين الفاتحه بالظبط و خلاص و تركب الفلتر بعد كده و شكرأ و ان شاء الله مش هتلاقي حاجه
بس حتة بقي التراب و ورق الشحر دي معني كده البوابه اللي بتجيب هوا من خارج العربيه مش مقفوله كويس
ياريت تتأكد من الدراع اللي تحت بكره السرعات انه علي اليمين و للاخر علشان تبقي البوابه دي مقفوله و لو هو علي الاخر و بردوا بتدخلك تراب يبقي كده محتاج زياره للتوكيل يظبطهالك لانها رخمه في ظبطها
علي فكره انا اخر مازهقت منها خاليت الراجل يفكها خالص و يربط الباب ده بمسامير برمه علشان يقفله خالص بلا فتحه ان شاء الله علشان انا اتخنقت منه

**Gelgel2004** · 08-03-2012 01:01 AM

السلام عليكم جميعا
اوضح لكم ما يلى
1/ ثلاجه التكييف عباره عن كويل او سربنتينه مضغوطه فى الحجم و ظيفتها - بدون شرح مفصل - تحويل الفريون من الحاله السائله الى الغازيه - عن طريق صمام ضغط فتتولد البروده
2/ لما بنشغل الضاغط - اللى هو الكباس - و نشغل المروحه بتاعه السرعات كما ذكرتم يتم خروج الهواء البارد.
3/ لتنظيف هذا الكويل :-
فى السيارات اليابانى و معظم الاوروبى يتم فك الدرج بتاع التابلوه
يتم فك الكويل و بالتالى الفريون بيتسرب و يحتاج شحن مره تانيه
يتم تطبيب الكويل اللى اتفك و ينقع فى محلول غسيل ضد الفطريات و هو مخصص لهذه الاغراض
بعد الاطمئنان على الكبس و النظافه التامه و التعقيم -يضخ الهواء و الهوايه مفتوحه .
يعاد التركيب و تغيير اويل سيل المواسير و تنظيف الدوره بالفاكيوم و اعاده الشحن

اما العربيات الفيات و اقليه من الاوروبى و الامريكى
فيتم فك التابلوه بالكامل للوصول الى ما سبق و عمله
نصائح :- لا تركن السياره تحت الاشجار قدر المستطاع
تعامل مع فنى تكييف مؤهل
لا تفتح فتحه دخول الهواء الخارجى باستمرار
عقم مداخل و مخارج الهواء ب بخاخ اوست كل 3 شهور على الاقل
شغل الكباس كل اسبوعين على الاقل لمده 5 دقائق لتزييت الاويل سيلات و منعا للتسرب
حذارى من الخرطوم الهواء عندما تكون فتحه الهوايه مغلقه - بتزعبب التراب - و يرجع يتجمع تانى اكثر.
تحياتى لكم و تمنياتى بصيف بارد ان شاء الله.......

**Gelgel2004** · 08-03-2012 01:03 AM

المشاركة الأصلية كتبت بواسطة HeMa_LanCeR

مين قال لسعادتك ان التلاجة هي المروحة

التلاجة دي حاجة زي السربنتينة كده بس اتخن منها
ودي اللي بتسقع من الفريون
والمروحة بتكون قبلها
فلما المروحة تشتغل الهوا يخبط في التلاجة فا يسقع فا يطلعلك هوا ساقع

الفكرة بقي ان التلاجة دي لما بتسقع بتشبر
ومع التراب الخفيف بيعمل طينة
وعلشان كده الهوا بس مش كفاية
في عربيات سهلة في تنضيفها وفي عربيات لازم يتفك التبلوه كلة

كلام مضبوط

-

-

الموضوع: سؤال عن كيفيه تنظيف ثلاجه التكييف ( المبخر )

LinkBack

أدوات الموضوع

عرض

-

-

المواضيع المتشابهه

تنظيف ثلاجه مكيف سيينا 1400 - انظر الشكل

كيفيه تنظيف بلف الايديال كونترول لفيكترا b بالصور..

كيفيه تنظيف البوابه والمانيفولد لفيكتراa-bبالصور؟

كيفيه تنظيف الرشاشات في السياره التي تعمل بنظام mpi

كيفيه تنظيف الماتور من الداخل

الكلمات الدلالية لهذا الموضوع

المفضلات

المفضلات

ضوابط المشاركة