الموضوع: تجربة قيادة :: كيا سيراتو ::

السلام عليكم ورحمة الله وبركاته

يمكن يكون الموضوع مش في معاده المناسب اطلاقا ! العربية نازلة بقالها مدة طويلة بل ان الشكل الجديد على وشك انه ينزل الاسواق ! لكن بصراحة تجربتي مع السيراتو غيرت نظرتي للعربية دي بشكل كبير وللعربيات الكوري بشكل عام ! عشان كدة اصريت اني انقلكم تجربتي مع السيراتو

انا بحكم اني عشت اغلب فترة حياتي في السعودية عشت هناك حوالي 15 سنة تقريبا ! فالسيارة رقم 1 بالنسبة ليا هي اللكزس يليها الاورين والكامري ثم الكورولا

عائلة التويوتا بالنسبة ليا هي رقم 1 بداية من اللكزس والاندكروزر وحتى التويوتا كرسيدا !

بالنسبة ليا ولناس كتير تفكيري لما جيت اشتري عربية طالما ماقدرش على تمن الاوروبي سواء تمن العربية او تمن قطع الغيار والصيانات يبقى يا اركب ياباني يا اما ماركبش

ومن حوالي يومين تقريبا قابلت اخويا وحبيبي ياسر "yasserelsayad" في الجامعة بحكم اننا زمايل في جامعة واحدة

اتكلمنا شوية وبعدين طلعنا على ال Parking وهناك شفت عربيته السيراتو

هو مهتم بيها جدا والعربية بسم الله ماشاء الله شكلها جميل وده المتوقع من السيراتو بصراحة شكلها مافيش اروع من كدة

وبعدين سمحلي اني اجرب عربيته ولان العربية طلعت غير ماكنت انا متوقع تماما ! حبيت اني انقلكم التجربة بمنتهى الحيادية

انا عن نفسي من زمان وانا بحترم السيراتو كنت بحترم فيها شكلها الانيق من الداخل والخارج وكذلك كنت بسمع ان ماتورها كويس والاداء بتاعها حلو انما كانت في وجهة نظري سواء طلعت او نزلت في الاخر هتفضل عربية كوري لكن بصراحة بعد التجربة غيرت نظرتي للعربية 180 درجة !

اولا : مواصفات العربية

العربية اللى انا جربتها هي عربية ياسر

كيا سيراتو High Line موديل 2010 - فتيس 4 نقلات -

جنط 17- مزودة ب Smart Key وزر "Start/stop Engine" وباقي كماليات السيراتو المعروفة

ومش عارف بصراحة اذا كانت العربية خليجي او وكيل !

ثانيا : المقصورة والسيارة من الداخل

السيراتو اول ماتركبها بيخطفك شكل الانتريور الجميل والمنسق اللى بيحسسك انك راكب عربية ماتقلش في الجمال والاناقة عن ال BMW والمرسيدس ! ربما اكون بالغت شوية في التعبير لكن فعلا السيراتو شكلها الداخلي ووضعية العدادت اكثر من روعة

خاصا بالكاربون اللى عامله ياسر في التبلوه والابواب مدي للعربية جمال من نوع خاص !

جودة التقفيل والخامات المستخدمة في العربية ممتازة وبتديلك احساس بالجمال

العربية من جوة واسعة والقعدة فيها مريحة وجميلة ووضعية العدادات ممتازة وبتخليك شايف السرعة اللى انت ماشي عليها بشكل مستمر وبمجرد نظرك للطريق بتلاقي عينك جايبة العداد بدون ماتحتاج انك تنظر للعداد بشكل خاص

ثالثا : الانطلاق بالسيارة

بمجرد تضغط على زر Start Engine وتبدا العربية تدور بتلاقي نور العدادات اشتغل بشكل تلقائي وده بيدي جمال للتبلوه

ظبطت المرايات من زرار التحكم في المرايات
والمرايات موضحة الطريق بشكل كامل وممتاز من اليمين والشمال

اول مابدأت اتحرك بالعربية هنا لاحظت اول حاجة ضايقتني في السيراتو وهي ان الدركسيون تقيل ! ! اعتقد السبب هو الجنط ال 17 مع الكاوتش ال 215 ! مخلي الدركسيون تقيل ! او يمكن لاني متعود على نعومة دركسيون الياريس الكهرباء فحسيت ان دركسيون السيراتو تقيل !

لكنه فعلا تقل الدركسيون كان مسببلي مشكلة وماكنتش عارف اتحكم في العربية بشكل كويس من كتر مانا حاسس ان الدركسيون تقيل !

بعد الانطلاق وبدانا نطلع على الطريق

الفتيس نقلاته ناعمة جدا والماتور صوته هادي حتى مع الحرق على الغيارات بيفضل صوت الماتور فيه نعومة وبيصاحب الحرق نغمة جميلة تحب انك تسمعها

الاحساس بالنقلات في حالة المشي العادي يكاد يكون مش محسوس او الاحساس بيه خفيف وبمجرد تضغط على العربية وتبدا تجري تحس العربية عايزة تنط مابين النقلة والتانية !

العزل اكتر من ممتاز ! فعلا كيا ابدعت في نقطة العزل وتستاهل 5 نجوم ! العزل في السيراتو بيفصلك تماما عن ضوضاء الطريق وبيدخلك في عالم تاني ودي من اكتر النقاط اللى عجبتني في السيراتو

رابعا : الاداء والتسارع

تسارع العربية بصراحة بسم الله ماشاء الله حدث ولا حرج !

الفتيس استجابته سريعة وجميلة وبمجرد الضغط على دواسة البنزين بتلاقي استجابة ممتازة من الماتور

العربية من قوة التسارع بتحس بان العربية عايزة تنط بعد النقلة عشان تنقل على النقلة اللى بعدها بدون اي تاخير في النقل ! بل بالعكس انا كنت ببقى منتظر النقلة تخلص عشان احس باحساس النطة اللى العربية بتنطها مابين النقلة والتانية ! فعلا احساس بيخليك مستمع بسواقة السيراتو ومستمتع بالجري بيها

التسارع بتاعها اقل مايقال عليه فوق الممتاز

بالنسبة للفرامل من اكتر النقاط اللى عجبتني فيها وفعلا الفرامل قوية جدا بتتعامل معاها بمجرد اللمس ! وبتديلك احساس انك عندك القدرة انك توقف العربية في اي لحظة وتسيطر عليها مهما كانت السرعة اللى انت ماشي عليها

الفرامل ممتازة وتستاهل 10/10

خامسا : الثبات ونظام التعليق

مش هقدر احكم بشكل فعلي في نقطة الثبات بحيث ان اعلى سرعة وصلت ليها بالعربية هي 120-130 كم تقريبا !

لكن العربية كان ثابتها على السرعة دي كان جميل جدا ومحستش ان العربية خفت بل بالعكس كنت حاسس اني قادر على اني اعمل اي مناورة بالعربية بدون اي مشاكل وماكنتش حاسس مطلقا اني ماشي على سرعة 120 الى من خلال النظر الى العداد !

اللى حسيته فقط ودي تعتبر تاني حاجة ضايقتني في السيراتو ان في اثناء ماكنا ماشين تقريبا عدينا على منطقة فيها مطبات بسيطة او الطريق مش مستوى "طالع ونازل" وحسيت ان العربية في المطبات دي او اعتقد زي مابيتقال عليها "مطبات هوا"

حسيت ان العربية اكنها ارتفعت من الخلف قليلا ! وده بيديلك احساس لحظي بعدم الثبات اثناء مرورك على مثل تلك المطبات ! لكن سرعان مابتعدي المطبات دي وبترجع العربية لحالتها الطبيعية مرة تانية !

بالنسبة للعفشة مش هقدر اتكلم على نقطة نشوفية او نعومية العفشة لان العفشة بتبان بشكل اكتر في المطبات والطرق المكسرة او من خلال ساعات سواقة طويلة !

لكن من خلال تجربتي الصغيرة دي ماحستش ان العربية عفشتها ناشفة او ماحستش ان فيه ارهاق اثناء سواقة العربية بالعكس كنت مستمتع جدا بسواقتها ! وماحستش انها تقل عن الياريس في النعومة فقط فرق الدركسيون لا غير !


دي كانت تجرببتي مع حوالي 15-20 دقيقة سواقة كيا سيراتو

العربية اكتر من ممتازة وبصراحة غيرت نظرتي للعربيات الكوري وفعلا بدات احس ان الكوري بدا يواكب الياباني ومابقاش يقل عنه في شئ ! فقط موضوع الاعتمادية اعتقد مازالت الافضلية للعربيات الياباني في نقطة الاعتمادية والتعمير

لكن السيراتو فعلا عربية تستحق الاحترام وتستاهل فلوسها وكل قرش مدفوع فيها

العربية ككل جميلة جدا من جوة ومن برة وسواقتها ممتعة للغاية

فقط اللى ضايقني منها تقل الدركسيون ونقطة احساس ان العربية اترفعت من ورا شوية ! غير كدة العربية عجبتني جدا في كل شئ !

وربنا يبارك لياسر في عربيته ويحفظهاله ويباركلكو كلكو في عربياتكم