كلاكيت تاني مرة.. سانديرو اوتو ولا صني اوتو ولا ريو مانوال ولا اكسنت مانوال

**crayvor** · 10-03-2012 11:22 AM

المشاركة الأصلية كتبت بواسطة ayman1204

السانديرو الاتوماتيك
مش هتندم والله

انا صاحبي عاوز يبيع الصنى باى طريقة
ضيقة بشكل فظيع والكراسي غير مريحة وفعلا يا جدعان حريقة بنزين كل الموضوع فيها Abs + EBD دا اللى بيمزيها مش اكتر وهو معاه السوبر صالون

فيه مشكلة كانت قافلاني م السانديرو بوجه عام نسيت أتكلم عليها
أنا قصير شوية (172 سم) ولما جربت أقعد فيها ظهر الآتي:
1- الدركسيون عالي جدا حتي ف أوطي درجة فيه.. خصوصا اني باحب أرجع الكرسي ورا شوية
2- لما باضطر أعلي بالكرسي عشان أطول الدركسيون.. باضطر أنزل برجلي عشان أجيب الدواسات..
يعني اللوجان بالنسبالي قعدتها مش مريحة نسبيا.. طبعا أنا جربت ف الطارق فا مش حاقعد ربع ساعة أعدل وأجرب.. ممكن يبقي ليها ظبطة بس أنا ماعرفتش أجيبها

بالنسبة للصني.. مريحة شوية بالنسبة لي من حيث القعدة ومكان الدركسيون.. وبالنسبة للي ورا يساعو نفسهم أنا يهمني أنا

هوا انا جايب العربية ليا ولا ليهم؟

برضه لسة فكرة الريو والار بي مارحتش من دماغي.. خصوصا ان القعدة فيهم لفل تاني خالص

المشاركة الأصلية كتبت بواسطة Land_Cruiser

بص حضرتك لو مش مقتنع بالاختيارات المتاحه احسن حاجه تعملها انك ما تشتريش حاجه انت مش عايزها فلو مثلا كنت مقتنع بالار بى يبقى ادفع اللى معاك مقدم و قسط المبلغ الباقى على فتره قليله و الفرق مش هيبقى جامد او استنى لحد ما تجمع المبلغ اللى فاضل و ما تشتريش حاجه مش مقتنع بيها و بالذات علشان حضرتك ناوى على زيرو

هههههههههه
تصدق الفكرة دي بتتخمر في دماغي بجد.. وقعدت مع أخويا أناقشها.
أنا كلمت الحج كان حايديني بأي حاجة ف وشي.. قالي أنا حاصرف عليك في الدراسة وبعد ما تتخرج.. ظبط حالك..
اللي معايا دلوقتي يا دوب يغطي المقدم ال 50% للصني وأقل من كدة يبقي فيه حاجات كتير ووجع دماغ مش عاوز أدخل فيه.
ححاول أحسيبها كدة وأشوف وربنا يسهلها.

**crayvor** · 10-03-2012 11:47 AM

المشاركة الأصلية كتبت بواسطة SonaSteel

هههههههههههههههههه .......... انا جاااااااااااااي هاهاهاها
ربنا يعزك ويبارك في عمرك يافندم :))

انت مشكلتك انك خايف الصني لما الشكل الجديد ينزل القديم يتوقف انتاجه ؟
الزيتونة بقي ........... لا مش هايقف الانتاج ان شاء الله
الشكل الحالي هاينتج مع الشكل الجديد بأمر الله والكلام ده من حد مسئول في نيسان
لان العربية ديه كلت وعلمت معاهم اوووي فمش عايزين يخلعوها من السوق.
ماهي دي برضه تحسسني اني راكب لانوس 5 .. عندك لانوس 2 اللي بتتجمع لغاية دلوقتي.. ولانس 3 (الفيرنا) ولانوس 4 (البومة) ودي تبقي لانوس 5
انا مش هاتكلم علي الصني لان شكلك ماشاء الله هارسها كتيييييير

الرينج بتاع الفلوس ده يجيب حاجات كتير علي فكرة زيرو ..... بس احنا بندور علي الافضلية كملاك لينا
يعني عندك الصني طبعا

البروتون بكل فئتها (الجيت نو - بيرسونا- ساجا) ...... الجين تو والبيرسونا عربيات متحترمة جدا جدا وشكلها وشكل عدادتها وتابلوها شيك جدا ماشاء الله ....... انا شخصيا عاجباني البيرسونا الاليجانس وكان نفسي اشتريها
بس لقيت قدامي حاجتين هاقع فيهم ........ التوكيل وقطع الغيار.
توكيل ذل العرب وقطع الغيار العجيبة الأسعار.. ماهو دا اللي قفلني م البيرسونا.. وانا مش من النوع اللي حايقعد يدور علي قطع غيار وأوفق.. يا الأصلي يا بلاش

اللوجان والساندريو .... انا كنت ناوي عليها خلاص وفي رينج الفلوس ومش هاتتعبني في القسط وشوفتها قبل الصني
بس والدتي مرضيتش بيها ....... لاقل سبب (التقفبيل سواء صالون او صاج) .... عربية علي قد فلوسها اوووي ماشاء الله وبتديك كل حاجة
وسع و ارتفاع و تكييف وماتور وموخرا اير باج ومالتي فانكشن ... بسعر عربيات كتير بتزل يادوبك ماتور و4 ازاز كهربا.
بس المشاكل اللي قلتها معقداني شوية منها.. غير اني ف شغلي كل ما كان برستيج العربية أعلي كل ما بيبقي أسن ويديك احترام شوية.. دي حاجة تانية قافلاني من السانديرو الهاتش واللوجان ذات الشكل الهلامي المنفلوطي.
الافيو والاوبترا ........ الاوبترا فكرت فيها بس لقيتها اغلي من الصني بحوالي 8000 جنيه في اي فئة ومفيهاش مواصفات الامان زي الصني كـex ...... وكماليات كسوبر صالون
وطبعا توكيلها زي غبور ......... ربنا يرحمنا منهم.
الأفيو والاوبترا عربيات فاضية بمعني الكلمة.. لسة عايشين في حتة ان التكييف والباور دي كماليات وهما بيحنو علينا ويحطوهم.. غير ان الأفيو اوتو مع أخويا ومش عاجباني كا سحب ولا تقفيل.. ناهيك عن بيتهوفن اللي قاعد يألف سيمفونيات في المساعدين ورا.
ده غير الBYD والاسبرانزا والبريليانس ....... كل ده في رينج الفلوس.
ابعد عن الصيني واشتمه.. كنت باركب باكدج صيني قبل كدة وعرفت ليه فيه ناس بتشتمه وناس بتشكر فيه.. عندك 60% من الباكدش بقاله سنة ماجبش ولا عطل.. وعندك ال 40% الباقيه بتجيب عطل كل اسبوع.. يعني الصيني يا يطلع حظك في حاجة نضيفة جدا يا يطلع حظك في مزبلة.
اخيرا بقي هيونداي علشان ليها معزة خاصة عندي هههههههههههههههه
الار بي اول فئة عدت ال100 الف و برده ماتور و4 ازاز كهربا ........ ونفس مشكلة عزل الصني (مفيش عزل) و الكنبة الضيقة (يمكن اضيق من الصني) ..... العفشة مش متذكر والله في تقاريها ايه ظروفها.
بس ماتنكرش شكل يخليك قاعد فيه مش عاوز تقوم أساسا.
وكان في الاخر كل ده بيرجعني للصني لحاجات كتيييييييير ماشاء الله
بصرف النظر عن الشكل سواء من بره ولا من جوه........ انا عن نفسي بحب العربيات اللي تابلوها شيك والزراير الكتير والكلام ده ........
والله نفس الكلام اللي مخليني باصص للريو والار بي.. غير ان الشكل من برة برضه مش وحش خالص
بس لقيت اني علشان اجيب حاجة كده هاجيب شكل من غير مواصفات امان تحديدا او اجيب شكل ومواصفات بس كنت هاتشنير في الفلوس.
حاتقرب من ال 120 ألف عشان بس يبقي عندي ABS
ويمكن كمان مكنتش مركز مع التوكيل ساعتها ....... طلع توكيلها محترم و فتح اوتو دلوقتي ده غيرتوكيلات نيسان اللي في محافظات...... يعني الحمد لله احسن ماركة شوفتها في خدمة ما بعد البيع كانت نيسـان.
انت صلي استخارة مرة واتنين وتلاتة وهتلاقي الموضوع ميسر لوحده ان شاءالله
ومتقلقش العربية بقالها في السوق 99 نفس الشكل ونفس الماتور ........ وحاجاتها موجوده اصلي وتقليد وكل حاجة .
وربنا ييسرلك كل خير يارب العالمين
انا اسف علي الاطالة والله ...... وتقبل مروري
واقعد بالعافية :))

تصدق بايه بقالي 4 أيام باصلي استخارة بانتظام.. بس آديك أهه بدأت تقنعني بالصني.. أنا النهاردة شغل مكتب عاقعد كدة أدورها في دماغي وأشوف النظام... لو ربنا سهلها ومشي معايا أروح احجزها انهاردة قبل ما دماغي تلف تاني.
شوفت كان كلامي صح لما استنيتك ترد :D

**SonaSteel** · 10-03-2012 01:13 PM

انت في القاهرة ولا اسكندرية ؟

**SonaSteel** · 10-03-2012 02:47 PM

ربنا ييسرلك الخير يارب
انا كنت بحسبك هنا في القاهرة كنت جيت معاك لاوتو ايجبت لو عايز تشوف الصني

**Sehsss** · 10-03-2012 03:37 PM

نيسان صني ومش هاتندم

**Sehsss** · 16-03-2012 11:41 AM

ربنا يوفقك للخير، بس فيه نقطة في موضوع قطع الغيار، قطع الغيار الاستهلاكية للسيارة معقولة جدا وفيه منها أصلي وفيه إسباني وفيه تايواني وصيني ... إلخ.. يعني تيل الفرامل مثلا الأصلي من التوكيل بـ300 جنيه وبيقعد متوسط من 40 ألف وحتى 60 ألف؟، وفي عضو معانا في قسم نيسان عامل بيه 65 ألف وبالنسبة لقطع الغيار غير الاستهلاكية أغلب العربيات بتبقى غالية

**Dr'AhmZZong** · 16-03-2012 03:59 PM

المشاركة الأصلية كتبت بواسطة crayvor

عودة مرة تانية..
شكرا لكل اللي رد عليا..
بس أنا طلبت من المدير أجرب العربية وجربتها بالفعل (الصني)...
معرفش مع التركيز كدة (ودا مشكلتي) حسيت ان العزل مش قد كدة وصوت الموتور عالي.. وموضوع البنزين ده فعلا سليم..
بعيدا عن النقاط دي سألت علي قطع الغيار وياريتني ما سألت.. :copy of rfds:
أنا مش معترض علي الأسعار نفسها.. أنا بس معترض علي النسبة بين سعر العربية وجودتها (خلينا صراح برضه مش حنقارن جودتها بالفلوينس والسيراتو واللانسر) وبين سعر قطع الغيار.. الأسعار دبح بطريقة غريبة..

المهم صليت استخارة وتوكلت علي الله ورايح بعد الصلاه حاحجز السانديرو اوتو.. برضه بصيت ع البيكانتو بس حسيت انها حريمي شوية من ناحية ومش عملية كاشغل من ناحية تانية.. والأفيو بس مع شكل التابلوه اللي مش وحش حتاخد نور تابلوه أخضر بايخ وامكانيات ف البلالا (علي الأقل مقارنة بالسانديرو)

ربنا يسهلها ان شاء الله.. وممكن أبقي أعمل تقرير كده ع الماشي بعد الاستلام.

عموما مادام حضرتك مرتاح للسانديرو .. توكل على الله و هاتها ....

عربية جميلة جدااااااااا ..

مبروك مقدماااااااا .. ربنا يديك خيرها و يبعد عنك شرها ..

تحياتي ..

اخوك من قسم نيسان ....