الموضوع: انابيب الغاز هوم دليفري بالكوبون

السلام عليكم ورحمة الله وبركاته

بعد طرح موضوع معنديش مانع ادفع 6.10 جنيه ضريبه خطوط التليفون المحمول بشرط

اليوم أطرح عليكم فكره أخرى .. لعل وعسى تصل الى أصحاب قرار .. او يساعد أحد في توصيلها

أنبوبه غاز

احنا طبعا كلنا بالنسبه للناس اللي بتستخدم انابيب الغاز .. بننده على الراجل اللي ماشي يرزع على الانابيب في الشارع

ونقوله انبوبه لو سمحت .. او بتتصل على حد بتتعامل معاه

لكن مش بتروح تجبها من المخزن بنفسك .. لأن الموضوع بهدله .. خاصه الناس اللي مش معاها وسيله نقل

او صحتها لا تسمح بحمل انبوبه .. او لديها ظروف اخرى

رجل يحمل انبوبه غاز ( الله يكون في عونه )

طيب .. بعد تنفيذ موضوع الانابيب بالكوبونات .. مين هيجبلك الانبوبه ؟

الناس الكبيره في السن والناس اللي مش متعوده تشيل انابيب .. هيعملوا ايه ؟

والناس اللي مش بتعرف تركب انبوبه او بتخاف تركبها .. هتعمل ايه ؟

طب ولو لقيت الانبوبه بتنفس .. هتشيلها وترجع بيها تاني ؟

الله يكون في عونهم

فالإقتراح هو .. ان يتوفر رقم اتصال خاص بكل منطقه لطلب انبوبه ( توصيل حتى المنزل وتركبها والتأكد من انها تعمل بشكل سليم )

الرقم دة يكون زي كول سنتر .. يستقبل الطلب .. ويبعته على اقرب مستودع من منزلك

وتكون وسيله النقل على تروسيكل مثلاً

وتوصلك الانبوبه .. توريله الكوبون ويتم الاجراء الروتيني ... ويركبلك الانبوبه

وتدفع حق الانبوبه + مصاريف التوصيل والتركيب ( اللي هتتحدد لو الفكره اطبقت )

وطبعاً هياخد الانبوبه الفارغه كمان

الفائده :

1- تعامل ادمي وراحه بال وشيل هم تغيير الانبوبه من عليك

2- توفير فرص عمل للشباب اللي هتتلقى طلبات الانابيب .. والشباب اللي هتوصلها

وممكن يكونوا هما نفس الناس اللي كانت بتسترزق من الانابيب .. ومش هتلاقيلها شغلانه

3- غلق باب البحث عن شخص يأتي لك بالانبوبه وتراضيه بمبلغ اكبر من حقها

4- مش هنشوف حد بيدحرج انبوبه عالارض .. ولا هنسمع حد بيخبط على انابيب في الشارع :)

ايه رأيكم ؟

يا باشا موضوع الانابيب الدليفري ده هيعملوه في مستودع الزهور في مدينه نصر

كنت هناك لاقيت المستودع فاضي قالي بعد كده هياخدو الطلبات بالتليفون وتتجاب تاني يوم والناس تروح تاخدها او هم يوصلوها لسه ما اتحددش