الموضوع: زجاج العربية الخلفى اتكسر

الاول بشكر كل واحد كتب مشاركة، وننتقل إلى الاخبار المهمة:-
الاسعار: من الاغلى للارخص
السبع 600 جنية وغير موجود غير تمن الكاوتش الى حوالين الزجاج
مودورن 500 جنية وغير موجود
اتو ايجيبت 450 جنية
كل دو من غير التركيب
د جريش 375 جنية بالتركيب، وحاولت اعرف اذا كان موجود فى فرع مصر الجديدة مردوش خالص على التليفون لحد الساعة 1 الظهر.
قمت واخد بعضى وعلى العاشر،
اتحركت من طريق مصر اسكندرية الصحرواى الساعة 12 ظهراً ووصلت العاشر الساعة 1 ونصف ظهراً،
الطريق سهل جداً، طريق الاسمعالية لحد العاشر تعدى اول كوبرى وتنزل من تحت التانى يمين وتعدى اول تقاطع وبعدين تخش اول شمال فى اول شمال هتلاقى مركز تغيير الزجاج على ايدك اليمين. المكان منظم ومغطى، بتقف حسب الدور وبعدين تروح تحاسب وقول رقم المكان الى انت واقف فية ونوع الزجاج وتحاسب، وترجع تستنى فى عربيتك، بيجى عامل ينظف مكان القديم وخلال نص ساعة الجديد بيكون جة على عربية سوزوكى صغيرة.
بعد ماتخلص تاخد الفاتورة وتمشى. الموضوع خلص فى ساعة فقط. والرجوع الى اكتوبر خد ساعتين.
الحمد الله على كل شئ
الاستيكر بتاع المنتدى والقسم راح فى الزبالة للأسف الشديد.

والسلام ختام