الموضوع: افيدونى افادكم الله

بص أنا هقولك على قد الأعرفو, فى نوعين من الفتس, النوع الأول هو الستبترونيك العادى, و ده المشكلة الظهرت فيه هو بوظان حاجة اسمها عقل الفتيس وو السمعتو ان تصليح المشكلة ديه فى التوكيل بتكزن بتغيير العقل و تكلفتها حاجة بتاع 13000 ج, يأما تغير الفتيس بأخر استيراد و ده متوسط السعر من 15 ل 20 الف جنيه.

بردو السمعتو ان العيب ده بيظهر فى موديلات 2005 و 2006 و 2007 من جولف أو جيتا أو اوكتافيا a5, و مفترض ان العيب ده اتظبط فى موديلات بدءا من 2008

طيب هل الكل ناس ظهر عندها العيب ده, لأ فى ناس كتير مشتكتش منو, و ناس تقولك ان السبب ان ملاك العربية مبيغيروش زيت الفتيس فى مواعيدو الهو المفروض كل 60,000ك (بتوع الصيانة بيقولو من 60 ل 80 الف ك), لكن ناس تانية بيعملو الصيانة ظهر معاهم العيب.

عموما ديه المعلومات الجمعتها و أنا بدور على الموديل ده ,و نظرا ان الميزانية مكنتش تسمح انى اجيب موديل 2008, فتراجعت ن الفكرة و ربنا كرمنى بعربية بورا, بس ده ميمنعش ان ليا شوق لركوب الأوكتافيا 5 او الجيتا ممكن مستقبلا.

طيب ايه المشاكل الفى الفتيس فى موديلات 2009 او فوقيها, المفروض ان العيب فى نوع أحر من الفتيس اسمو ال DSG, و ده مفترض انه موجو فى العربيات التربو (بس مش متأكد موجود فى العربيات العادية ولا لأ) و ده بأه عليه شبه اجماع بفشله فى مصر.

عموما نصيحتى لو عاوز اشترى عربيات موديل 2009 و متكونش ماشية كتير, و اكشف عليها كويس, و يفضل فى التوكيل أو ورشة من المتعارف عليها و الليها خبرة فى التعامل مع العربيات ديه ,و ربنا يوفقك.