السلام عليكم ورحمة الله وبركاته
امبارح سمح لي اخويا وحبيبي "toyota4arab" بتجربة عربيته الكورولا
ودي كانت بصراحة اول مرة اسوق كورولا !
العربية كورولا 1300 اتوماتيك ! موديل 2005 اعلى فئة
ولان الشيب القديم ده مابقاش ينزل منه جديد فلقيت انه محدش هيستفيد لو عملت تقرير عن تجربة قيادة اختي الكبيرة الكورولا
لكن حاليا فيه اقابل على الشيب القديم ك Used ! واللى بيفكر في المستعمل سعات الفلوس مش بتسمحله انه يشتري كورولا ! واحيانا بيفكر في الياريس !
فحبيت اعملكم مقارنة بسيطة مابين الكورولا ال 1300 الشيب القديم والياريس بحكم ان الاتنين نفس الماتور ومتشابيهن في حجات كتير
لعل وعسى حد من المقبلين على شراء سيارة تويوتا مستعلمة يستفيد من التقرير ده
هحاول بقدر الامكان اكون حيادي وهنسى نهائي ان الياريس عربيتي
وفي نفس الوقت انا عارف انه unfair ! اني اقارن عربية Stock بعربية متركبلها جنوط 16 وكاوتش عريض + Induction kit ! فلتر هوا سبور
لكن هحاول بقدر الامكان اي جزء في المقارنة ممكن يكون الفلتر / الجنوط ماثرين عليه هوضحلكم ان ممكن الفرق ده يكون بسبب الجنوط او الفلتر .....
اولا : السيارتين من الداخل
الكورولا بحكم انها فئة اعلى من الياريس تتميز بانها اوسع من الياريس من الداخل ! المساحة الداخلية للكورولا وحجم الشنطة اكبر من المساحة الداخلية للياريس
كذلك الكورولا تتفوق في الخامات المستخدمة في الداخل وفخامة واناقة التبلوه خاصا بوجود الابنوس اللى بيديلها شكل اكثر من رائع
وضعية العدادات في الكورولا ماعجبتيش بصراحة ! حسيت اني محتاج اني انظر مخصوص في العداد عشان اشوف السرعة اللى انا ماشي عليها ! ويمكن وضعية العدادات في وسط تبلوه الياريس تكون مش مناسبة للبعض بس كانت بالنسبة ليا افضل من وضعية عدادات الكورولا !
كرسي الياريس حسيت انه مريح اكتر من كرسي الكورولا ! مش عارف السبب وجايز لاني فقط متعود على الياريس فحسيت اني مرتاح اكتر لما نزلت من الكورولا وركبت الياريس !
العزل واحد ماحستش بافضلية للكورولا او للياريس فالاتنين متقاربين جدا في موضوع العزل !
كذلك صوت الماتور مافيش اختلاف <<< ماهو نفس الماتور عايز الصوت يبقى مختلف ازاي ؟؟ !
ثانيا : السيارتين من الخارج
طبعا هترك موضوع الشكل لانه اذواق
ابعاد الكورولا افضل نسبيا من ابعاد الياريس اللى محتاجة وقت عشان تتعود عليها
جودة الدهان من الخارج حسيت انه واحد في الاتنين مافيش فرق
الكورولا الصاج بتاعها اقوى واكثر متانة من صاج الياريس ودي حسيتها من اول مافتحت باب الكورولا تحس بان فيه شئ من الصلابة والقوة عن الياريس !
ثالثا : المحرك والاداء
على الرغم من ان ماتور الكورولا ال 1300 هو نفس ماتور الياريس ال 1300 ! إلا ان نسب التروس في الكورلا مختلفة عن الياريس وده من وجهة نظري بيدي افضلية للياريس في التسارع عن الكورولا << طبعا بخلاف موضوع فرق الوزن !
نسب تروس الكورولا هي كالتالي : الاول : 60 , التاني : 110 , التالت : 160 !
نسب تروس الياريس الاول : 55 , التاني : 100 , التالت : 150
طبعا بالنسبة للكورولا انا شايف ان كتيييييييييييير اوي 60 على الاول و 110 على التاني لمحرك صغيرة 1300 !! وده بيعمل Drop جاامد في ال acceleration بتاع الكورولا على سرعة 110-120 ! !
خاصا ان الفتيس او ال ECU بتاع التويوتا عقيم جدا ! <<< او ملهوش فيها على راي حبيبي فورميلاتور !
لو انت ماشي 80 على التاني ومدي Kick ! وحبيت تنقل على التالت ونقلت من الفتيس من 2 الى 3 ! العربية مش بتنقل ! وهتفضل على التاني طول مالغيار لسه فيه ولازم توصل لل red zone عشان تنقل ! وده للاسف حاجة عقيمة بجد ! فلو حبيت تتجاوز ال Drop اللى موجود في الكورولا عن طريق انك تنقل التالت بدري شوية مش هتعرف انسى ! لازم تخف رجلك من على البنزين عشان العربية تنقل ! وهنا السحب برضوا هيقل !
بالنسبة للاداء على ارض الواقع
كتسارع تحت ال 100 ماحستش بفرق كبير مابين الكورولا ال 1300 و الياريس
لكن فوق ال 100 بالاخص فوق ال 120 فيه افضلية للياريس وكل ماتزيد السرعة كل ماتزيد الافضلية للياريس ! مش عارف ده بسبب فرق الفلتر عندي او بسبب فرق نسب التروس مابين الاتنين لكن عموما نقدر نقول ان الياريس فعلا افضل من الكورولا في التسارع
طبعا الكورولا والياريس واحد في نعومة الفتيس وغياراته كذلك الاحساس بالنقلات بسيط
كذلك إحساس ال Kick down على السرعات المنخفضة واستجابة المحرك في الكورولا نفس في الياريس !
رابعا : نظام التعليق / الثبات / الهاندلنج
نعومة العفشة والراحة واحد في الاتنين واحد
افضل مميزات تويوتا واعتقد كافة سيارات تويوتا في فئة ال sedan ! ناعمة وكلها حنية
الاحساس بالمطبات والحفر والنقر والشوارع الغير ممهدة واحد ومافيش اختلاف ! عندي تعتبر انشف شوية بسبب الجنط ال 16
الدركسيون في الياريس باور كهرباء لكنه في الكورولا باور زيت
وبصراحة دركسيون الكورولا اقل مايقال عليه انه دركسيون عقيم ! ! يعتبر تقيل مقارنة بدركسيون الياريس في حالة الثبات او الركنة ! وبمجرد تبدا تتحرك بالعربية وسرعتك تتجاوز ال 40 بتحس انك ماسك ريشة !
الياريس الدركسيون فيها افضل وانعم في الثبات والركنة وبمجرد تتحرك الباور الكهرباء تقريبا بيفصل وبتحس بإستقرار في الدركسيون بعكس الكورولا اتقل في الثبات واخف على السرعات ! <<< وارد الاستقرار اللى حسيته في الياريس افضل من الكورولا بسبب فرق الجنط ال 16 !
بالنسبة للثبات اللى حسيته ان الكورولا ثباتها ضعيف جدا واقل من الياريس ! واعتقد السبب هو الجنط ال 14
الجنط ال 14 احد اكبر عيوب الكورولا ! ! اللى عايز يشتري العربية دي لازم اول حاجة يعملها انه يرمي الكاوتش ده ويجيب جنط اكبر اما 15 او 16 !
الكورولا عموما الجنط ال 14 والكاوتش بيخلي الدركسيون خفيف جدا على السرعات العالية ومش بيديلك اي نوع من انواع الاستقرار !
دي كانت مقارنة بسيطة مابين الكورولا الشيب القديم ال 1300 والياريس
ان شاء الله تكون شاملة العربية من كافة النواحي
عموما هحاول الخصلكم المقارنة في بعض نقاط
الكورولا تتفوق في التالي :
المساحة الداخلية "داخل السيارة والشنطة"
جودة الخامات المستخدمة واناقة التبلوه
متانة الصاج وقوته
الابعاد الخارجية
سعر اعادة البيع
الياريس تتفوق في التالي :
نعومة الدركسيون
التسارع
الثبات <<< وارد يكون احساسي بان الياريس افضل في الثبات بسبب فرق الجنط !
نقاط مشتركة ومتفقة مابين السيارتين :
الراحة ونعومة العفشة "كإحساس بالمطبات والطرق الغير ممهدة"
استهلاك البنزين
العزل وصوت الماتور
الاعتمادية العالية
نعومة الفتيس والاحساس بالنقلات
سرعة استجابة المحرك
قطع الغيار والتوكيل
في النهاية ! انا من وجهة نظري على الرغم من ان الكورولا فئة اعلى من الياريس
إلا ان الكورولا ال 1300 تتقارن بالياريس وبل ان الياريس قد تتفوق في بعض النقاط !
وانا كشخص نصيحتي لشخص مقبل على شراء سيارة مستعملة ومش قادر على تمن الكورولا يجيب الياريس ومش هيحس بفرق كبير ! ولو كان فرق المساحة الداخلية مش مهم بالنسبة ليه ممكن تكون الياريس افضل بالنسبة ليه من الكورولا
ان شاء الله يكون التقرير افادكم وانا بلغت اخويا وحبيبي toyota4arab -"اللى سمحلي بتجربة عربيته الكورولا"- بالموضوع ده وهو كمان جرب عربيتي فلو مش متفق معايا في احد النقاط اللى ذكرتها ممكن نتناقش في الموضوع او يقول انطباعه من خلال تجربته للياريس وان كان حس بفروق مابينها ومابين عربيته الكورولا ....
والف شكر ليكم
المفضلات