مساعدة فى شراء سيارة تويوتا 98 عيون من الخبراء

**mina_monyman** · 24-03-2012 12:13 AM

من فضلكوا كنت عايز اعرف سعر العربية التيويوتا 98 اتوماتيك عيون عاملة كام وقطع غيارها متوفرة ولا لا علشان قدامى واحدة على 48 الف جنية وهى فبريكة برة وجوة
واستهلاكها للبنزين وهى 1300

**me_medoo** · 24-03-2012 04:13 AM

تمام هيا عربية ممتازة ويتزين ما اخترت بس اخبار
الدواخل والخوارج إيه والحالة العامة أية ؟ لان الحجات دي بتفرق في السعر وماشية قد إيه بس هو عامة هيا افضل حاجة ممكن تعتريها بالسعر ده

**talhawy** · 01-04-2012 05:17 AM

انا معايا العربية دى......العيون 98 الاوتوماتيك كحلى كنت جايبها من حوالى سنة برده فى حدود 48 الف
عربية جميلة جدا وعالية عن الارض بغباء ومع ذلك ثابته جدا حتى على السرعات العالية وقطع غيارها فى المتناول لاهى غالية (زى الالمانى ) ولا هى رخيصه (زى الدايو والهيونداى ) بس معمره والحاجة اللى تجيبها تغيرها بعد سنين بس دايما حاول تجيبلها قطع غيار استيراد ماتجيبش الجديد
قطع الغيار متوفره بكثافة فى المحافظات الكبيرة زى القاهرة والاسكندرية وطنطا
ناعمه جدا ..... انا باقارنها باوبل موديل 98 مع ابن عمى هى انعم منها بكتير ...... ثبات رائع على الطريق عفشه ممتازة.....تكييفها ممتاز
عيبها الوحيد فى فى حكاية ال1300 سى سى
يعنى مش حتساعدك فى الشد والسحب والشغل الشبابى ده وخاصة انها كمان اوتوماتيك ..... وطبعا لما بتشغل التكييف بتاثر على قوة اداء الموتور فى الشد والسحب انما مابتاثرش على السرعة او استهلاك البنزين (علشان ما ابقاش كداب تاثير بسيط قوى فى حكاية البنزين دى )..... انا عربيتى سافرت بيها مطروح الصيف اللى فات
مشغل التكييف وماشى على 150-160 ومركب العيلة كلها معايا ومالى الشنطة ومش حاسس بالدنيا

خد معاك حد بيفهم فى العربيات وخليه يكشف على جسم العربية احسن تكون عاملة حادثة ولا حاجة او مغيرة اجزاء منها وماتتخدعش بحكاية فابريكة بره وجوه دى ( فابريكة جوه ماشى انما بره ما اعتقدش لانها عربية بقالها فى السوق 14 سنة اكيد يعنى ماكانتش ماشية على الحيط علشان تفضل فابريكة بره ) وبرده اكشف على حالة الموتور واتاكد انها كويسه ولو حتى بنسبة 70 % علشان ماتتدبسش فى موتور هلكان تصرف عليه دم قلبك
واخيرا ربنا يوفقك يا باشا وانا تحت امرك فى استفسار عن العربية

**yasseen2006** · 04-04-2012 11:10 AM

السلام عليكم ورحمة اللة وبركاتة
انا معايا العربية دي 99 أوتوماتيك كاملة ومركب لها مريات ضم كمان تويوتا برضة بس أوربي عربية من أفضل موديلات الكوريلا بس مسمعتش بس علشان خاطر شكل فوانيسها الامامي أما هي نفسها ميكانيكا وعفشة الموديلات من 91 - 97 بل أفضل منها كمان
ناعمة جدا وقوية جدا وموتورها معمر جدا لو متابعة بإستمرار انا يارجل مرة مشيت علية بدون زيت خالص كان الفلتر راكب غلط وسرب الزيت في الارض وانا ماانتبهتش الا لما لمبة الزيت نورت يومين ومع ذلك محلصش لها حاجة ولله الحمد الياباني لا يعلى علية ولا تقولي الماني ولا كوري الاول مكلف جدا ومحدش بيفهم فية في مصر كان معايا BMW 97 318i قبلها اة عفشة وقوية وسحب بس مجرد لما يحصل لها حاجة أشوف فيها المرار وبعتها وجبت دي بقالها 7 سنين معايا بحبها زي ياسين ومش عايز أغيرها لاني مظبتها عالصح اشترتها 62 الف في 2006 فابريقة بالكامل من اول يد بس هي دلوقتي تلعب في 45 - 55
النصيحة افحصها كويس وممكن تكون فعلا فابريقة بالكامل لان شفت منها فابريقة بالكامل وسهل جدا انك تعرف اذا كانت رشت ولا لاء خبط بس بإصبعك على جميع اجزاء العربية لو كانت الرنة مكتومة تبقى رشت