الموضوع: تقرير صيانة تويوتا ياريس أوتوماتيك - مركز توب جير

طبعاً ده أول تقرير ليا في قسم تويوتا
ندخل في الموضوع على طول
ليا أختي اشترت تويوتا ياريس موديل 2007 أوتو
المهم هي لسة بتعلم السواقة عليها وكدة
جت في يوم قالتلي العربية صوتها عالي و بتجيب سرعة 60 كم / ساعة بالعافية و مش بتزيد عن كدة
فطبعاً أتخضيت
روحت جربتها لقيتها فعلاً صوتها عالي بس بتسحب و بتجيب 60 عادي و تكمل عادي
فواضح انها كانت جايبة الفتيس على النقلة التانية ( من المعادي لفيصل )
المهم علشان الصوت العالي قولت مافيش غير مركز توب جير ( ده اول تعامل ليا معاه )
أتصلت بالمهندس محمد و روحتله كان في عرض ان الكشف بالكمبيوتر مجاناً
كشف على العربية و الحمد لله كله تمام كان في ايرور في الي بي اس و اتشال
طلع الصوت ده من مروحة الريداتير .
الموتور بتاعها كان مبوش
و كشفت على العفشة بالمرة طلعت عايزة بارات و تيش دركسيون وتيش ميزان ( هي بتاخد المطبات بسرعتها عادي )
و عندها فردة فيها بلونة مع ان الكاوتش مقاسة 15 بريدجيستون تورينزا و بيبقى صعب او يكاد يكون مستحيل يعمل بالونة !!!!!!!!!!
المهم لفيت على المروحة اتصلت بالبرجسي لقيت اسعار عجيبة شوية
يعني الموتور لوحدة بـ 850 تقريباً و المروحة بـ 385
فلتر الهواء بـ 90 و الزيت كان تقريباً بـ 40 مش فاكر بالظبط
المهم قعدت الف على مروحة أستيراد مش لاقي
لحد ما لقيت واحد عند مرور فيصل سألته قالي موجودة بـ 160 جنيه !!!!!!!!!
قالي بس هاتلي العربية ابص عليها الاول
روحت امبارح بالعربية ليه شاف المروحة و قالي موجودة ياباني بـ 160 جنيه و في كلام تاني
قولتله طيب هاتها علشان انا كدة كدة بعمل صيانة في مركز و هو هيركبها
أصر اني افك القديمة في المركز و اروحله بالقميص علشا يركب هو عليه المروحة و الموتور
يهديك يرضيط أبداً لازم هو الي ريكبها

المهم وصلت عند المهندس محمد فضالي و قولتله قالي خلاص احنا نفك المروحة و اخلي الموتور و الريشة عندي و روحله انت بالقميص بس
و خدت القميص و روحت
و كانت الفاجعة
لقيته عمالي يدورلي على اي موتور بتلات مسامير و يوفقلي ريشة عليه و بعد كدة ابقى أضبط انا الفيش بقى اقص و بتاع
طبعاً اتعصب بس خليته يفك كذا موتور و كذا فيشة الاول حوالي 8
و بعد كدة قولته انا مش سائلك و جبتلك العربية و قلتي موجودة و أكدت عليك انها بتاعة ياريس كذا مرة قولتي أيوة و عيب عليك و الكلام ده
قالي مالكش دعوة انت ليك عندي تبريد مية مية
قولتله متفقين على كلام من الاول
قالي خلاص خد موتور و هات انت الريشة من برة
طبعاً ما رضيتش لانه كان عايز يحطني قدام الامر الواقع اني فاكك العربية و كدة و لازم اشتري من عنده
المهم خدت بعضي و اول تاكسي وقفته و قولتله اطلع على الوكالة
المعهم و انا في التاكسي اتكلمت مع السواق قالي ياعم هاتها جديدة تايواني احسن من الأاستيراد
انت ما تعرفش هي متخزنة ازاي و ممكن تكون الريش معوجة و كدة
اتصلت بالمهندس محمد رد عليا حسام و قالي هاتها تايواني جديدة أحسن
نزلت التوفيقية جبتها تيواني بـ 550
و رجعت جبت فلتر هواء و فلتر زيت نوع ياباني ( أعذروني لسة مش حافظ الانواع ) من محل في اول فيصل في برج الاطباء بـ 85 جنيه الأتنين
و طلعت على المهندس محمد
و أبتدينا الفك و التنظيف
أول حاجة البوابة أتفكت و كانت منيلة خالص
نظفناها بمنظف نوع جانك مخصوص لتنظيف البوابة و رجعت جديدة
تنظيف الحساسات
تغير زيت ليكوي مولي 260 جنيه
تغيير زيت بالكم دوت 5 ليكوي مولي أزازتين بـ 50 جنيه
تغير بوجيهات
و بعد كدة ركبنا المروحة

و بصراحة العربية اختلفت تماما
يعني ما تعرفش انها دايرة و لا لاء

نصائح :-
طبعاً مركز توب جير للأعضاء الي أتعاملو معاه هيعرفوا انا بتكلم في ايه
المهندس محمد شخصية محترمة لابعد حد و امين جداً جداً في شغله و لوقعدت اشكر فيه من هنا للسنة الي جاية مش هوافيه حقه
و انصح اي حد انه يتعامل معاه
لاسباب كتير :-
1- شغل محترف و نظيف لابعد حد
2- أمانه متناهية بصراحة
3- اسعار المصنعيات يمكن اققل من الميكانيكية الي في الشارع
4- أسلوب الكشف بضمير علشان ماتجيبش حاجة مالهاش لازمة
5- تفنيش العربيية و التأكد من عمل كل الازم و إذا أحتاجت حاجة بعد كده قبل التلسيم بيكتبهالك في امر الشغل الأخير بحيث تبقى تجيبها
يعني عندي طلع في قاعدة فتيس علوية عايزة تتغير و دي علشان يتأكد منها انها هي الي بايظة قعد يجرب بتاع ربع ساعة و رفع العربية و اتأكد منها و ان شاء الله اغيرها مع البارات
و بنصح اي حد لسه ما جربش المركز ده يروح و مش هخسر حاجة
بجد انا فعلاً كان بيتنصب عليا عند الميكانيكية مش مبالغة ده غير العك بتاعهم

النصيحة التانية ( أنا خايف تكون اعلان بس مش هقول اسم المحل )
المحل الي انا اشتريت منه قطع الغيار في اول فيصل
بعد اللف و السؤال تقريباً هو ارخص واحد و الراجل الي واقف في محترم جدً و أمين في التعامل بصراحة هو موجود في برج الاطباء قبل كوبري فيصل على طول في اتجاه الجيزة


انتظروا بقى تقرير تغيير اللبارات و قاعدة الفتيس في توب جير بردو بس على اول الشهر كدة