الموضوع: شوية مشاكل بعد صيانة ال 40 الف !

السلام عليكم ورحمة الله وبركاته

اخواني وحبايبي في قسم تويوتا

اخباركم ان شاء الله تكونو بخير وصحة وسلامة

من فترة كان عندي شوية في العربية وقلت احن عليها واعملها صيانة ال 40 الف خصوصا اني من ساعت ماشتريت العربية ماغيرتش فيها اي حاجة ! والعربية موديل 2007 يعني كتر خيرها اوي

عملت الصيانة برة التوكيل غيرت فيها التالي " طقم تيل امامي وخلفي - فلتر بنزين - فلتر هوا - سير المجموعة - بوجيهات - نضفت البوابة والحساسات - اشتريت الماية الحمرا وزودتها"

المفروض كان مع الصيانة يتم تغيير الماية بالكامل بس انا اكتفيت بتزويدها

برضوا كان المفروض بيتم في صيانة ال 40 الف تغيير زيت الفتيس بس قالولي لسه عليه حبة كمان وبعدين شايف ناس كتير بتقول الكيلو ب 100 جنيه وب 120 جنيه وناس تانية بتقول الكيلو ب 28 جنيه ! ومش عارف بقى حاسس ان موضوع زيت الفتيس ده فيه لبس كبير !

جبت زيت فرامل بس لسه مغيرتوش وان شاء الله في خلال اليومين الجايين هعملكم تقرير بالاسعار والتكلفة والمصنعية عن الصيانة اللى انا عملتها بس بجهز للموضوع عشان هيكون بالصور ان شاء الله

طبعا العربية الحمد لله بعد الصيانة اتحسنت كتير وحسيتها اكتر هدوء ونعومة بس للاسف فيه شوية مشاكل كنت متوقع انهم يتحلو مع الصيانة بس ماتحلوش ! ! يعني المشاكل موجودة بالاصل من قبل ماعمل الصيانة

فياريت اللى عنده خلفية عن السبب المتوقع يقولي

1- العربية سعات بتقطع لما بدي kick على الغيار الاول ! احسها كدة بتقطع جامد عن Rpm مابين 4.5:5 ! دي حاجة نادرا لما بتحصل حصلت بتاع تلت مرات قبل الصيانة وامبارح اول مرة تحصل بعد الصيانة ! ومش عارف سببها

2- انا غيرت طقم تيل امامي وخلفي بالاصلي بتوعها جايبهم من موزع تويوتا معتمد ! ومع ذلك الفرامل لسه ادائها ضعيف وبتزحف جامد ! بالرغم ان العربية فيها Abs+Ebd ! والكاوتش لسه مغيره برضوا وجديد ! وكانت بتعمل الموضوع ده سعات من ايام الكاوتش القديم فمعتقدش ان المشكلة من الكاوتش ! ممكن اكون محتاج اغير زيت الفرامل ؟

3- من ساعت مغيرت فلتر البنزين بالتحديد ! وانا دائما شامم ريحة بنزين جوة العربية خصوصا لما بحرق او امشي على سرعة عالية وش بلاقي الريحة فاحت ! ! ؟ تفتكرو فيه تسريب ؟ ممكن يكون التسريب ده هو اللى مخلي العربية تقطع ومسبب المشكلة رقم 1 ؟ ؟

حاليا بفكر اروح اودي العربية لمركز معتمد احطها على الكومبيوتر واشوف الدنيا فيها ايه ! ؟ وفي نفس الوقت بفكر برضوا اغير زيت الفرامل / زيت الفتيس ! بس ناس كتير قالولي لسه عليهم ؟ مع ان مكتوب في الكتلوج بتاع العربية انه يتغير عند 40 الف كيلو او 48 شهر ايهما اقرب ! ! وسواء كدة ولا كدة الاتنين عدو !!

ايه رايكم ومقترحاتكم يا شباب ؟ ؟