محتار أشتري إيه لانسر و لا كروز؟؟؟

**Eng_hatemfathy** · 29-03-2012 01:29 AM

140 مش هتجيب شارك2011 فيها اى بى اس لان الاى بى اس بدايتها 154 الف المسماه بالهاف اسبورت دى يا دوب هتجيب بيسك اتوماتيك مفيهاش غير مالتى فنكشن ب 138

**hashad14** · 29-03-2012 01:45 AM

ابعد عن الكروز العربيه وحشه جدا مميزاتها الثبات على الطريق وشكلها من بره وجوه بس ضيقه بالنسبه للكنبه الخلفيه جدا جدا طبعا الشارك افضل وحرام تجيب البومه بالسعر اللى هى عليه كتير عليها اوى المازدا 3 برقبتها مليون مره ب129000 بس مش هاى لاين بس قطع غيار عاللى اوى بس معمره جدا

**ElHoot** · 07-04-2012 03:49 AM

المشاركة الأصلية كتبت بواسطة dawns_mist

هنقارن البومة بالكروز :
التسارع و قوة الموتور في مصلحة البومة
الثبات و الاتزان في مصلحة الكروز لإنها واخدة تقييم أوروبي أعلى شوية من البومة
الكماليات في مصلحة الكروز
المساحة الداخلية في مصلحة البومة
قطع الغيار .... أعتقد البومة في السوق أحسن لإنها منتشرة أكتر

* البومة ممتازة لكن أنا لو مكانك مش هشتريها زيرو لإن شكلها بقى قديم و التابلوه فقير نسبيا .. فأنا شايف إني أزود 20 ألف على ثمنها و أشتري مثلا الشارك لو انا مكانك

مقارنة سريعة بين الشارك و الكروز :
التسارع و الأداء ... الشارك تكسب و بفرق كبير جدا
الثبات و الاتزان ... الشارك تكسب بفرق بسيط ، ولاحظ إن وزنها أتقل كمان من الكروز
الكماليات ... بالنسبة للهاي لاين 2011 شارك و الهاي لاين كروز ... مافيش فرق تقريبا ، و في حاجات بسيطة الشارك
الاتساع الداخلي ... الشارك أوسع
الراحه ... الشارك مريحه أكتر
قطع الغيار ... الفرق في السوق مش هيكون كبير أعتقد .. و الشارك برضه منتشرة لإنها بنزل من 2008 فهتلاقيها بره التوكيل بسهولة أكتر من الكروز
التوكيل ... ميتسوبيشي أحسن في التوكيل

* المقارنة بين الكروز و الشارك .. انا لو مكانك هختار الشارك على طول لإن مافيش أي ميزة زيادة في الكروز

بالنسبة للمقارنة بين الفلويانس و الكروز .. فالمقارنة دي اتكلمنا عنها كتير و هتلاقي الموضوع في الصفحة الرئيسية لمنتدى المقارنات ... و برضه أنا برجح الفليوانس

* عايز أقول لحضرتك نقطة مهمة .. 140 ألف مش هتعرف تجيب بيهم لا الشارك هاي لاين ولا الكروز هاي لاين ، ولو جيبت البومة زيرو 125 ألف فأنا شايف إن ده كتير عليها في الوقت ده لإنها قدمت و الكماليات قليلة ( مع إني معايا البومة و مريحاني على الآخر الحمد لله ) .. فأنا بنصح حضرتك توسع دايرة الاختيارات شوية .. فيه تيدا هاتش باك الشكل الجديد ممتازة ، و فيه عربيات تانية كمان كتير في الفئة دي كويسه ...
ولو هتقارن بين ياباني و كوري .. فانا أنصح حضرتك بالياباني أكيد .. أداء أعلى و راحه و أمان و كماليات و توكيل و قطع غيار ... يعني لو هتقارن بين السيراتو و الكروز و البومة ... في النهاية أنا عن نفسي هختار البومة ..

و في النهاية حتى لو آخرك 140 ألف و مصمم بين الكروز و الانسر يبقى برضه الشارك هتكون في رأيي أحسن من أي كوري .. و عن تجربة الشارك أيا كانت 1500 أو 1600 والله عربية ممتازة و أنا كنت عاملها تقييم على منتدى ميتسوبيشي و بإذن الله مش هتندم .

شكر و تقدير علي المعلومات و المقارنات الأكثر من رائعة، أنا إستفدت من معلوماتك كتير و إنشاء الله هحاول أجيب الشارك بس يا رب تكون أسعار قطع الغيار معقولة و الصيانة الدورية في التوكيل متكونش غالية، يا ريت لو أي حد عنده ملومات عن أسعار قطع الغيار و الصيانة في التوكيل يكون عمل معايا واجب كبير علشان أقدر أحسم المقارنة بجمع كل المعلومات المطلوبة.

**ElHoot** · 07-04-2012 03:51 AM

شكر و تقدير لجميع الأعضاء المشاركين في الموضوع و جزاكم الله كل خير.

**ElHoot** · 07-04-2012 03:53 AM

في إنتظار أي معلومات من السادة الأعضاء و الخبراء عن أسعار قطع الغيار و الصيانة في التوكيل الخاصة بال (شارك).

**Hossam_hassan4** · 07-04-2012 08:53 AM

فلونس احسن في كل اللي انت قولته يعيبها بس سحبها و بطء تجميعها في الاول بعد كده الشارك. احسن بس ميتسوبيشي العربيات شكلها قدم اوي و هي مش بتجدد

**ElHoot** · 09-04-2012 10:25 PM

أخبار أسعار قطع الغيار و الصيانة الدورية في التوكيل إيه؟؟؟

**ElHoot** · 09-04-2012 10:27 PM

هل ممكن أشتري شارك 2012 من التوكيل (دايموند) و أعمل الصيانة و المتابعة الخاصة بالعربية بعد الشراء في مكان تاني مثلا زي الرواس (الكيت كات)، هل الضمان الخاص بالعربية من (دايموند) هيكون لاغي و لا مركز الرواس معتمد من الوكيل (دايموند) و ممكن أعمل كل حاجة هناك؟؟؟