--- المرة دي ترد عليا -- تجربتي للكورولا يومين والتحليل كالاتــــــي ....... !

**S O P H O S** · 01-04-2012 12:21 AM

بسم الله الرحمن الرحيم

اتمني تقولوا ردكم اخواني مش تمشوا بدون رد
كورولا 2004 مانيول تجربتي كالاتي : وانا ماشي بيها علي اكتوبر ومشغل التكيف علي 1 والكاست بردوا وعادي جدا

مرة واحدة العربية فصلت كهرباء خالـص وبطلت خالص كل شئ فصل التكيف والكاست والزجاج وحتي الساعة الي فالتبلوه جيت ادور تاني مفيش كهرباء خالص كل تكات التكنكت مفيش حاجة خالص مفيش كهرباء نهائي وحتي فتحت الباب يدوي
فضلت علي كده حوالي 30 ثانية بحاول انها تلقت كهرباء وبعد ما قفلت التكيف الزراير يعني الي اصلا مش وصلها كهرباء وكل شئ وبعد حوالي خمس محاولات افتح التنتك وحتي اللمبات الي فيها بتاعت الزين والبطارية وكده مكنتش بتنور برده لما العربية كانت فصله .
العربية لقطت كهرباء ودورت وحتي الساعة الي فالتبلوه رسترت بمعني ان العربية كانت فاصلة كهرباء خالص السؤال : بقي ياتري ايه العيب ده وهل الارضي مثلا فيه مشكلة علما انا خايف اوديها لاي كهربائي وبفكر لو مش هنلاقي حل ليها هنا اوديها التوكيل بعد ما اخد رائيكم ؟؟؟؟؟؟؟؟ وغير كده ساعات الانوار تهيس فالدوارة لمدة برده ومرة وهي ماشية زي ما تكون فصلت مرة واحدة والكهرباء رجعت تاني بدون العربية ما تبطل
يا تري ايه المشكلة دي واوديها التوكيل علما اني لا اعلم عنه شئ لا عنوان ولا حتي العربية دي ليها تتصلح فالتوكيل ولا لا فما العمل ....

فأنتظار رائيكم وردكم عليا .؟..... تحياتي .......

**tarekmaher** · 01-04-2012 01:37 AM

اكشف علي كابلات البطارية ممكن يكون غش

**me_medoo** · 01-04-2012 04:22 AM

عزيزي ... تلاقيكي كنت ماشي في حته تسمى مثلث برمودة ... كذا طيارة وقعت وكذا سفينة غرقة في المثلث ده وأنطفت كل العدادات والمؤشرات ...أحمد ربنا أنك وصلت بالسلامة لأن أغلب الطيارين أختفو .

أو أن تكون العربية حصل فيها قفلة كهربائية نتيجة أن في حد مركبلك حاجة غلط ... أو سلك ملمس ... عامةً أنصحك بالتالي :
1- روح شيك على دنمو العربية أولاً وهل هو شغال بشكل مناسب ولا لأ .

2- تأكد أنو وصلات البطارية سليمة 100% ومفيش اي أملاح على كابلات البطارية .

3- أقعد مع نفسك فكر أيه أخر حاجة ركبتها بالعربية ... ممكن يكون الافندي الي ركبهاكلك ركبهالك غلط .

4- أن ملقتش أي فايدة روح التوكيل وتوكل على الله لأنهم ممكن يجيبوك التايهة وتحياتي .

**S O P H O S** · 01-04-2012 04:12 PM

المشاركة الأصلية كتبت بواسطة tarekmaher

اكشف علي كابلات البطارية ممكن يكون غش

الكبلات كلها يعني ولا القطاش فقط
وما المقصود ب غش
تحياتي

**Ahmod** · 02-04-2012 03:25 AM

هل لما كنت حضرتك بتحاول تدور العربية كانت بتدور بس مافيش كهرباء ؟ ؟

يعني بتدور بس الانوار مش شغالة - الكاسيت مش شغال >.. وهكذا ؟

لو العربية بتدور بس مافيش كهرباء غالبا العيب بيبقى من الفيوزات "علبة الفيوزات الداخلية" شيك عليها وشوف الفيوزات عندك

بالاخص الفيوز الماستر ! بس انت بتقول انها بعد كدة اشتغلت فطالما اشتغلت يبقى مافيش فيوز محروق بس جايز فيه مشكلة عموما شيك على الفيوزات برضوا للاحتياط لان المشكلة دي حصلت معايا قبل كدة وطلع الفيوز الماستر ال "starter" اتحرق ! برضوا كانت العربية بتدور بس مافيش كهرباء

لو العربية ماكنتش بتدور نهائي ! يبقى العيب من البطارية

لكن طالما دارت بس مافيش كهرباء يبقى استبعد البطارية وركز على الفيوزات لان لو البطارية فيها مشكلة العربية مش هتدور من الاساس !

انا اتوقع العيب من الفيوزات لان لو انت ماشي بالعربية وفصلت البطارية نهائي ! العربية مش هتفصل لان البطارية وظيفتها اثناء ماتيجي تدور العربية بعد كدة الدينمو بيشتغل

انما اعتقد ان حصل عند حضرتك قفلة في الفيوزات هي اللى خلت العربية تبطل

**me_medoo** · 02-04-2012 04:37 AM

هو مدام حصل موقف الولاعة ده يبقى بالظاهر عندك قفله في علبة الفيوزات او سلك مشعر في العربية او يمكن في مية جت ناحية علبة الفيوزات. نتيجة غسيل المتور

**S O P H O S** · 02-04-2012 04:54 AM

المشاركة الأصلية كتبت بواسطة me_medoo

عزيزي ... تلاقيكي كنت ماشي في حته تسمى مثلث برمودة ... كذا طيارة وقعت وكذا سفينة غرقة في المثلث ده وأنطفت كل العدادات والمؤشرات ...أحمد ربنا أنك وصلت بالسلامة لأن أغلب الطيارين أختفو .

أو أن تكون العربية حصل فيها قفلة كهربائية نتيجة أن في حد مركبلك حاجة غلط ... أو سلك ملمس ... عامةً أنصحك بالتالي :
1- روح شيك على دنمو العربية أولاً وهل هو شغال بشكل مناسب ولا لأ .

2- تأكد أنو وصلات البطارية سليمة 100% ومفيش اي أملاح على كابلات البطارية .

3- أقعد مع نفسك فكر أيه أخر حاجة ركبتها بالعربية ... ممكن يكون الافندي الي ركبهاكلك ركبهالك غلط .

4- أن ملقتش أي فايدة روح التوكيل وتوكل على الله لأنهم ممكن يجيبوك التايهة وتحياتي .

المشاركة الأصلية كتبت بواسطة me_medoo

هو مدام حصل موقف الولاعة ده يبقى بالظاهر عندك قفله في علبة الفيوزات او سلك مشعر في العربية او يمكن في مية جت ناحية علبة الفيوزات. نتيجة غسيل المتور

مثلث برمودا ده في راس البر للعلم مش اكتر
وانا ما ركبتش اي حاجة جديدة فيها نسيت يا ميدو مش كنت بتشتكيلك منها وانت خلتني احبها شوية واهو الاسبوع ده بداءت اركبها علشان اجربها واخد عليها وحصل المواقف دي معايا

اه في حاجة اظن ان علبة الفيوزات جوا العربية مش فالماتور مجرد راي يحتمل الحطأ

تحياتي يا ميدوووو

**me_medoo** · 02-04-2012 05:35 AM

هههههه. ياباشا العربية حلوة طيب والله العظيم انا لسه جايب عربي. هونداي ار بي لسه مكملتش يومين واتومتك وفيها حبت افشخنات. حكايه ومع ذلك انا مستعد اديلك بيها لفة بس بعد ما ارخصها انشاء الله. ان مرجعتش تبوست عربيتك في كل حته فيها بحق. ياحبيب قلبي التويوتا. تويوتا. برضو وعلى قولت بتوع الاقاليم اوتو موبيل بجد
مش شوية البلستيكات بتاعت العربيات الجديدة انتا خودها اي مركز تويوتا او توب جير وهما يجبولك المشكلة فين. بس اوعه تزعل من التويوتا. لان دي عربية تقتنيها مش بس عربية تركبها ..... وتحياتي

**Ahmod** · 02-04-2012 11:36 AM

المشاركة الأصلية كتبت بواسطة ahmed1006

لا هي مكنتش بتدور هي كانت فاصت فكل شئ لا كهرباء ولا بتدور
بس في ملحوظة انا عندي اول امبارح صحبي بيشغل الولاعة قام التسجيل فصل نهائي وعرفت انه فيوز ضرب ولازم اغيره حصلت قبل كده انما غير كده اداء العربية عادي جدا بس هي احيانا تقوم تهيس كده فصلت مرة عالكوبري معايا ودرات تاني والكهرباء رجعت ولو قفلت فيوزات تشتغل تاني بعدها ؟ يعني الفيزات مش بتضرب
وانا بس خايف اوديها لكهربائي يكون بيفتي ويخرب الدنيا اكتر فبحاول احدد العيب علشان محدش يفتي فالعربية وانا لسه جديد فيها
وشكرا لردك واهتمامك

مش محتاجة كهربائي ولا حاجة المشكلة دي بالظبط ظهرت معايا قبل كدة

جيت اشحن ال Gps من شاحن الولاعة الكاسيت فصل وكهرباء العربية كلها عموما فصلت

المشكلة دي شكلها كدة Common في التويوتا ! علبة الفيوزات بتاعتها فيها مشكلة او ضعيفة ! ! ؟

كدة انت عندك فيوز الولاعة ضرب ! بعد كدة بتبدأ علبة الفيوزات تضعف ومع الوقت بدل مافيوز الولاعة اللى هيضرب هتلاقي الفيوز ال starter هو اللى ضرب !

دلوقتي انت اللى تعمله كالتالي

افتح علبة الفيوزات اللى تحت عند الدواسات

غير فيوز الولاعة هو فيوز من نوع 15 A لونه ازرق ! هتلاقي كذا واحد لونه ازرق بس اول ماتفتح علبة الفيوزات هتلاقي ارشادات على الغطا بتاعتها مكتوب كل حاجة عليها ايه

الفيوز اللى المفروض تغيره بتاع الولاعة اسمه CIG

ويفضل برضوا انك تغير بالمرة الفيوز ال starter وده فيوز A25 لونه رصاصي وهتلاقيه اول فيوز موجود

ودي صورة موضحة ! هي من علبة فيوزات الياريس بس اعتقد ان مش هيكون فيه فرق كبير

غير فيوز الولاعة والفيوز ال starter وان شاء الله الامور هتظبط معاك

الفيوزات الاصلية بتتباع في التوفيقية الواحد ب 2 جنيه وبتتباع بالفرد ! سيبك من العلبة اللى فيها 10 فيوزات وب 5 جنيه ! دي ابعد عنها نهااااائي

دور في التوفيقية كويس هتلاقي واحد بيبعهم انا مش فاكر اسمه بصراحة بس دور لحد ماتلاقيه

وان شاء الله الامور عندك تتظبط