الموضوع: كورولا 2007 1600 و لا لانسر بومه زيرو

المشاركة الأصلية كتبت بواسطة TOOLA

بص عشان هتوه من الناس هنا, أولا عرف السوق فى مصر, لو سألت أى حد فاهم فى السوق و العربيات هيقولك خد الكورولا طبعا انا مركبتش الأثنين كتير, بس سوقتهم عموما, الكورولا أنعم بفرق ملحوظ و بحس ان خامتها الداخلية و عزل الصوت افضل من اللانسر و بالطبع اكثر اعتمادية من اللانسر و فرق السعر ما بينهم مش جى من فراغ كمان (على فكرة انا لا معايا ديه ولا ديه و قبل كده كان معايا اى حاجة منهم فرايى يعتبر حيادى) ,يعنى لو الكورولا ضامن حالتها (و ديه أهم نقطة) يبقى استخير و اسال على سعرها فى السوق و ماتسيبهاش و اللانسر لو فكرت تبيع هتخسر فى سعرها شوية (لأنك جايبها زيرو و هتبعها استعمال), لكن الكورولا طول ما حالتها كويس بتقدر تتشرط و انتا بتبيع براحتك.

+1+1

المشاركة الأصلية كتبت بواسطة khaledmekawy2008

المشكلة هنا ان كل واحد بيتعصب لعربيته من غير ما يقول ايه اللي يميز عربيته عن العربية التانية اللي صاحب الموضوع بيسأل عليهم وناس كتير اوي فالمنتدي تدخل تتكلم وتقول ان العربية الفلانية دي احسن من التانية لانه معاه عربية واحدة فيهم ومجربش التانية او بمعني اصخ هيكون ميال لعربيته اكتر
انما لو الناس تتكلم بحيادية تامة وتبين لصاحب الموضوع ايه اللي هيفيده اكتر وايه المناسب ليه وانا بعتبر المقارنة دي قديمة جدا جدا جدا
وربنا يباركلك في عربيتك اللي اشترتها ايا كانت لانه فالنهاية اختيارك انت وحسب راحتك الشخصية وميولك

انا بعتذر لو كنت اتعصبت لعربيتي في أي شيء .. أنا عارف إن الموضوع دلوقتي انتهى و صاحب الموضوع اشترى الكورولا .. لكن أنا بس بوضح وجهة نظري عن مشاركاتي ...

أنا من اول مشاركة ليا بينت كل نقاط قوة و كل نقاط ضعف في عربيتي وفي الكورولا ... و اتكلمت بموضوعية ... و ارجع يا أفندم لكل مشاركاتي في الموضوع ده و هاتلي كلمة واحده مش موضوعية أو مشاركة واحده فيها تعصب ...

بالنسبة للعربيتين قولتها عشرين مرة ... الأداء = لانسر ، الثبات = لانسر .... راحة و نعومة = كورولا ، عزل = كورولا ، كماليات = كورولا ، صاج = كورولا ، عفشة و تحمل = لانسر .................. و ده مش كلامي لوحدي ده كلام ملاك الكورولا و ملاك الانسر ...... أظن أنا كده مافيش أي حاجة غير موضوعية بقوله .. ولو عايزني أشرحلك الأسباب العلمية كمان .. من عيوني .......

تسارع الانسر أفضل لانسيابيتها و خفة وزنها و فيتيسها المتطور ..
ثبات اللانسر أفضل لإنها تعليق خلفي متعدد الوصلات و ده أفضل بكتير من التعليق الخلفي البيم المتصل بتاع كورولا و ده بيدي ثبات للبومة بالإضافة إن ارتفاع كورولا الإجمالي أعلى من ارتفاع لانسر و انسيابية جسم البومة كمان بيساعد على الثبات و ده واضح للجميع ....
راحة و نعومة و صاج و كماليات = كورورلا ... دي مش محتاجه تفسير لإن ده بيجي بالتجربة ..

و كررت كمان قبل كده و قولت إن علامة تويوتا أغلى قيمة من علامة ميتسوبيشي ......زز

فين بقى يا باشا اللي أنا ممكن أكون متعصب لعربيتي فيه ؟؟؟؟ لو غلطان في أي كلمة مافيش عندي أي مشاكل أي حد يتكلم معايا بموضوعية و أنا هعترف إني غلطان لو فيه دليل ... لو هتدور هتلاقي اللي بيتكلم عن الكورولا هو اللي عمال يقول معروف إن الكورولا أحسن .. طيب معروف منين يا سيدي ماتقولنا كلام موضوعي و تفسير علمي .... يبقى مين فينا اللي بيتعصب يا أفندم ؟؟؟؟؟

غيييييييييييير كل كل ده خااااااالص ... عربية بتشتريها استعمال 5 سنين تقريبا بنفس سعر الزيرو ... هل ده منطقي ؟؟؟ هل ده كلام يرضي ربنا ؟؟؟
أنا بحب الكورورلا جد و متمرس في سوق الكورولا في اسكندرية في قطع الغيار و عارف إنها عربية ثمنها فيها بمعنى الكلمة ... و مش معترف بأغلب العربيات الكوري في السوق ... لكن أنا لو مكان صاحب الموضوع مع كل احترامي .... هشتري كوري زيرو و عمري ما هشتري كورورلا 2007 ... تعالى نفكر كده الراجل ده بعد 5 سنين لو حب يبيع الكورورلا الـ 2007 ... هيكون عدى عليها 10 سنين .. هل هيقدر يبيعها بـ 80 ألف ؟؟؟؟ مستحيييييييييييييييييييل تجيب حتى 70 ألف جنيه بعد 5 سنين خصوصا بعد تخفيض الجمارك على الأوروبي ........ لكن لو اشترى عربية زيرو بـ 115 موديل 2012 يقدر يبيعها بعد 5 سنين بـ 85 ألف و هو حاطط رجل على رجل حتى لو كانت عربية كوري .... ولا أنا كلامي غلط ... يبقى أنا لو عملت كده بضيع فلوسي ولا مش بضيعها ؟؟؟؟

يبقى انا يا باشا قارنت بين العربيتين مقارنة منطقية بتفسيرات علمية و مافيش أي حد رد عليا رد علمي موضوعي ............ و كمان بعد المقارنة بين العربيتين عملت تقييم لحالة السوق و فسرت و بينت قراري ... و مافيش حد برضه من اللي قال غير رأيي فسر رأيه بطريقة منطقية علمية ....

متأسف على الإطالة خصوصا إن الموضوع اتقفل ... لكن أنا بوجه من هنا اتهام لكل واحد بيتكلم من غير أي إثبات بكلام غير موضوعي ... و بدافع عن نفسي ...