الموضوع: اسعار اقل .. قطع غيار نادره .. متعه تسوق .. مزايا الشراء من الخارج

السلام عليكم

اخوانى واحبابى الهونداويه

عندى فكره يمكن تجدد نشاط المنتدى بس هتتنفض جيوبكم برضه

اولا احب اسلم عليكم واحد واحد ولعل المنتدى فعلا فى حاله ركود متاثر بالاحوال فى مصر باذن الله يكون الحال الى الاحسن

انا من زمان عاوز اكتب المشاركه دى لانى حقيقى نفسى اقدم اى حاجه لاخوانى الهونداويه ولان طبيعه الانسان بيحب يشترى حاجات جديده وخصوصا لو كانت الحاجه دى لحاجه من اغلى ممتلكاته زى عربياتنا الهوندا ويا سلام لو كانت فعلا بسعر اقل عشان كده حابب اعرض عليكم نخوض تجربه اننا نشترى اى قطع غيار ومستلزمات لسياراتنا الهوندا من بره مباشره ونكون اول يد لو فعلا فيه فرق فى الاسعار

واحب اولا اوضح بعض النقاط :

1- لمن لم اتشرف بمعرفته احب اعيد تعريف نفسى انا اخوكم هيثم سلطان من اسكندريه اعمل فى
مجال الشحن الدولى والخدمات الجمركيه واقول هذا ليس من باب الدعايه وانما للتعريف بنفسى

2- الفكره " شراء احتياجات ومستلزمات عربياتنا الهوندا من المصدر مباشره "

3- الاهداف :
- وفر التكلفه حيث الشراء يكون بدون وسطاء مننا للمصدر وفى هذه الحاله المفترض تكون الاسعار اقل لاننا نلغى ارباح تاجر الجمله والقطاعى او على الاقل ربح المستورد ولشعور الممتع بالتسوق والشراء

4- الوسيله :
- تحديد الاحتياجات
- تحديد مصادر الشراء
- مقارنه الاسعار بين المعروض فى مصر والتكلفه بعد الاستيراد لتحديد الوفر المحقق

اولا يجب تحديد الاحتياجات بعد المناقشه وتحديد افضل القطع المطلوبه ومكانها وعمل تجميع للطلبيات والتى يفضل ان تكون من مصدر واحد وبلد شحن واحده اولا للحصول على افضل سعر ثانيا للاستفاده من الشحن المجمع وتوفير نفقات الشحن

ثانيا تحديد مصدر الشراء وده بيحكمه مكان البائع ومدى الثقه فيه وراى المتعاملين معه ونوع الشحن والاسعار ودى امور سهله باذن الله لوفره عدد البائعين

ثالثا مقارنه الاسعار مثال يعنى لو اى حد هيشترى مثلا فلتر رياضى وطقم بوجيهات مميزين هيشوف اولا ثمنه فى بلده كام لو فيه فرق كبير هيكون مشجع لحساب تكلفه الشحن والرسوم الجمركيه ودى معلومات هتكلم عنها بعد قليل

طرق الشحن ( جوى - بحرى ) بعد حصر القطع المطلوبه وتجميعها سيتم تحديد وسيله الشحن بمعنى ان ممكن نشحن شحنه مجمعه جويا وشحنه اخرى مجمعه بحرى لان بعض القطع قد تكون ثقيله او كبيره مما بفضل فيه الشحن البحرى ولو انه اطول بس اوفر اما الشحن الجوى يحسب بالكيلو يعنى مثلا لو قلنا ان قطعه اقل من 1 كيلو هتتحاسب على انها كيلو فى الحاله دى ممكن نشحن قطعتين بوزن كيلو وتقسم تكلفه الشحن وهكذا لباقى الطلبيه فتقل تكلفه الشحن وللعلم تكلفه الشحن قد تصل الى 50% من تكلفه البضاعه فى بعض الاحيان

سؤال قد يطرح " لماذا اسعار بعض القطع قد تكون فى مصر اقل من انك تشتريها بالقطعه من البائع فى الخارج ؟

السبب يرجع لثلاث اسباب اساسيه :

1- الشحن

الشحن يؤثر لان اغلب التجار بيستخدموا الشحن البحرى وهى الوسيله الارخص من خلال طلبيه كبيره الامر الذى يؤثر بالايجاب على تكلفه القطعه حيث ان تكلفه الشحن الاجماليه يتم تقسيمها على تكلفه البضاعه فينال البضاعه قيمه شحن صغيره

2- الكميه الكبيره

وده بيتم من خلال التفاوض بين المستورد المصرى والمصنع او بائع قطع الغيار فى الخارج طبيعى كلما اشتريت قطع اكثر تحصل على سعر اقل

3- الرسوم الجمركيه

ودى نقطه احترافيه شويه وهو ان يتم تقديم فواتير للجمارك المصريه باسعار اقل من اسعارها الحقيقيه فيتم على اساسها احتساب الرسوم الجمركيه الى تضاف بالتاكيد على تمن القطع المباعه فى مصر


مما سبق اقترح على حضراتكم خوض التجربه وحتى لو محصلش ان بعض الاعضاء اشتروا احب يشاركوا للمعلوميه والمتعه فى الحقيقه اليومين الى فاتوا كنت بتسوق فى موقع EBAY وبعض المواقع الامريكيه لقيت شويه حاجات رائعه واعتقد ولانى مش خبير فى الاسعار هنا فى مصر انها هتكون اوفر ولعلها تكون اجود فى بعض القطع خصوصا ان الكثير من القطع امريكيه الصنع او يابانيه حيث انه من المعروف ان امريكا سوق واسع للهوندا بشكل مثير جدا وحقيقى هتشعروا بمتعه التسوق ده بخلاف ان فى الحقيقه لو عجبتنا التجربه هنكررها

عن نفسى ودورى فى الموضوع اساعدكم فى موضوع الشحن والتعامل مع الجمارك وللعلم الموضوع غير ربحى بالمره انا بعمل كده محبه لاعضاء المنتدى وللهونداويه وعشان كده سيتم عرض جميع التكاليف بمنهى الشفافيه وتقسيمها على المشاركين وطبعا اسعار القطع هتكون واضحه ومعلنه ويعلمها المشترين بناء على اختيارهم وكذلك الرسوم الجمركيه سيتم اعلام اصحاب القطع بقيمتها وبالبنود الجمركيه التى توضح قيمه البند الجمركى وباذن الله ساسعى لتوضيح اى امور حول الاستفسارات المتعلقه بالجمارك والشحن

واخيرا لو عجبكم الموضوع وحابين نخوض التجربه احب اعرف تعليقاتكم الاول وبعض كده ننظم ورشه عمل للبدء

عن نفسى ناوى افتح موضوع عن زياده كفاءه العربيه والقطع المطلوبه لذلك بمساعدتكم لو تسمحوا تمهيدا لشراء بعض القطع من الخارج

اشكر لكم المتابعه

اخوكم / هيثم سلطان

المشاركة الأصلية كتبت بواسطة hamdymsr

عجبانى الفكرة جدا
ان شاء الله معاك
وحضرتك شوف هتبتدى ازارى
يعنى مثلا هتعرض للناس روابط لبعض اللمنتجات لهوندا
او العكس الناس تحدد احتياجتها وتعلن الروابط المخصصة

او تساعدنا بخبرتك طبعا وتقولنا على احسن مواقع بتقدم الخدمة
واحنا نختار منها

ومقدما احب اقولك ربنا يجزيك عنا كل خير

استاذ حمدى اشكرك على التشجيع وخلينا ناخد فكره من خلال البحث فى بعض المواقع ومن خلال البحث هنوصل لنتائج افضل