الموضوع: التكيف بيفصل لوحده

المشاركة الأصلية كتبت بواسطة WalidAdel

بص هو انا كان عندي مشكله مشابهه في التكييف بتاعي صني 2008 بردوا
كان التكييف بيشتغل كويس في الاول و بعدين يقعد كل شويه يفصل و بعدين روحت لواحد بتاع تكييفات كان عايز يعمل عليا شغل قالي دي السربنتينه وحشه ...!! و عايزه تتغير ، ازاي بس ياعم دي السربنتينة بتتغير لما تتخبط او تتخرم خرم و مش هاتعرف تلحمه ، كان بيحاول يقنعني انه صح فبيجيب خرطوم ميه يحطه علي سربنتينة التكييف تقوم التكييف يشتغل كويس و يبرد و تمام ... يشيل الخرطوم و يسيب العربيه شغاله شويه يرجع تاني يفصل و مايسقعش فانا مقتنعتش اوي و سيبته و مشيت .. روحت لواحد تاني كان فاهم اوي قالي ده ياكنترول التكييف خرف ياما حساس اللي علي الفلتر الكوز اللي جنب السربنتينه ده (في جنب سربنتينة التكييف علطول حاجه كده علي شكل زجاجه الميه ده اسمه فلتر و عليه من فوق حساس بسلكتين) غيرته ب 300 جنيه و شحن التكييف تاني و بقي تمام
بتوع التكييفات ممكن يعمل عليك شغل وانت مش فاهم حاجه زي الراجل الاولاني ده كان عايز يشيل السربنتينة الاصلي بتاعة العربيه و يديني واحده صيني بيقولي عليها ياباني و 375 جنيه لكن انا مارتحتش لكلامه و روحت لواحد تاني اول مره اروحله بس حسيته فاهم و سيبته يشتغل و دفعت عنده 530 جنيه (تغيير حساس و شحن)
حاول تروح التوكيل يأما واحد بتاع تكييفات فااااااااهم و مش معرفه (علشان الراجل الاولاني ده انا عارفه من 5 سنين و بعمل عنده شغل كتير) علشان مايقولكش حاجه و يعمل عليك شغل

أعتقد إن دي كانت شحنة زيادة من البداية....ال- pressure switch واضح إنو كان شغال (لما المية بردت ال سربنتينة ال ضغط نزل و لما زاد تاني فصل)
كان المفروض تجرب تفرغ شوية من الشحنة قبل ما تغيرو...أنا مش قصدي أزعلك لكن دي حاجة أحب أوضحها يمكن تفيد أي حد من الزملاء

المشاركة الأصلية كتبت بواسطة fbiahmed

التكيف بيفصل لما درجة حرارة المبخر الداخلي evaporator (التلاجه الي في التابلوه) تنزل لحد 4 مئويه و ده من خلال حساس راكب على المبخر الداخلي و ده لو مفصلش المبخر هايتجمد من بره و يعمل تلج و فتحات مرور الهوا هاتتسد و الهوا البارد مش هايعدي منه لان المروحه بتاعة التكيف بتبقى ورا المبخر ده و الهوا بيسقع لما بيعدي ما بين فتحات السربنتينه دي و هتلاقي الهوا ضعف الي خارج من الفتحات و الكومبريسور يروح فاصل لوحده نتيجه لان التلج بيزود الحمل على الكومبريسور دي حاله


و دي يمكن تحديدها لو التكيف بيفتح كويس و لما تجري يفصل لوحده و لما تقف شويه في الحر يرجع كويس

طيب لو حصل العكس لما بتجري بيتحسن و لما بتقف بيبقى ضعيف

يبقى الفريون قليل شويه و عاوز يتزود

طيب لو فاصل من اول ما تمشي و كل اما تمشي البروده تقل

يبقى الفريون زياده و حساس حماية الكومبريسور بيفصل لزياده الضغط عن المسموح بيه

و في الاخر لو الكومبريسور بايظ صوته بيبقى عالي و مبيطلعش هوا بارد الا مع السرعه العاليه فوق ال 3500 rpm

أستاذ ورئيس قسم الله ينور بجد......................