الموضوع: استفسار بخصوص توكيل السيارة (قانونيا)

السلام عليكم جميعا .. مبدئيا انا مقدم على شراء سيارة مستعملة ودى مش اول مرة ليا .. زمان كنت بحب تبقى الرخصة فيها مدة كبيرة وبمشى بالتوكيل وخلاص .. وكنت ببيعها قبل ما ارخص او اكتبها بأسمى اصلا .. وده اللى انا كنت متعود عليه علشان انا تبع مرور رخم شوية وموضوع الترخيص فيه بيبقى مليان رشاوى ونصب وعلى عينك يا تاجر .. استفسارى دلوقتى يا ترى هل فى خطورة من موضوع التوكيل ده؟ يعنى لو دفعت الفلوس واخدت العربية والرخصة وكله.. هل ياترى ممكن اللى اشتريت منه العربية لو معاه صورة الرخصة الاصلية يقول انها عربيته ويعمل محضر انها مسروقة او يعرف يطلع بدل فاقد للرخصة مثلا باسمه؟ حتى لو التوكيل مسجل عقارى انا بحسه مش اثبات ولا دليل خالص على موضوع البيع والشراء .. البلد دلوقتى مش مضمونة وانا مش عارف قانونية الموضوع ده ايه وخصوصا ان التوكيل بيبقى حتة ورقة كده ملهاش اى لزمة .. ارجو رد قانونى وافى للاحتياط .. وشكرا

طيب لو اللى انا هاخد منه العربية مش عارفه .. وهو الرخصة باسمة .. يبنفع اعمل عقد مسجل فى الشهر العقارى وامشى بيه برده مع رخصة صاحب السيارة بدل التوكيل؟ يعنى بدل التوكيل يبقى العقد المسجل وامشى بيه وفى اى وقت حبيت اعمل رخصة باسمى هعملها عادى؟ وياترى ساعتها هيبقى سهل انى اتعامل مع المرور بتاع صاحب العربية من غير التوكيل وفقط بالعقد المسجل فى الغرامات مثلا او استخراج شهادة بيانات جديدة ولا ساعتها هيبقى صعب وغير قانونى وهيستلزموا الحصول على التوكيل؟!