الموضوع: ريداتير الريجاتا ..ياريت تساعدونى

العربيات القديمة الراداتير النحاس احسن من الالمنيوم

بالنسبه لموضوع الغطاء هل قصد حضرتك غطاء الراداتير اللى بتفكه لتزويد المياه و الا غطاء القربة البلاستيك اللى جنبه لان لازم الراداتير يكون له غطاء علشان المياه اللى جوه لما تسخن و مفيش غطاء يحكمها هتفور و تطلع بره و تعمل مصيبة

موضوع احسن الانواع ايه : فى نوع كويس جدا جدا نحاس المانى 3 ماسورة جبته من واحد بتاع راداتير مشهور فى ش احمد سعيد فى العباسيه اسمه الزقازيقى من 3 سنين و شغال معايا زى الفل لغايه دلوقتى و كان سعره بالتركيب بالشاى بكله فى حدود 300-350 مش فاكر بالظبط (الاسعار اكيد عليت دلوقتى) ...

اهم حاجه فى موضوع التركيب هو طريقه تركيب قميص المروحه على الراداتير (لان المروحه هى اللى بتبرد المياه مش الراداتير) و دى الصنايعى الكويس هيعملها صح و هو مغمض

نسيت اقولك اوعى اللى بيركب الراداتير يحطلك مياه من عنده حتى لو قالك ان دى ميه زمزم ... كل بتوع الراداتير بتبقى عندهم مياه مضروبه عباره عن مياه عاديه و عليها لون ... اهم حاجه فى التبريد هى نوعيه مياه الرادتير اللى هتحطها و انصحك تجيب جركن مياه اسبانى اسمه aida ثمنه من 30-35 جنيه حسب المكان و تحطه فى الراداتير و تزود الباقى زجاجه مانع صدا اسمه abro بيتباع فى بنزينات موبيل بـ 15 جنيه تقريباً و بكده الدنيا هتبقى تمام

سؤال معلهش بعد اذنك : اخبار الترموستات بتاع المروحه ايه و هل مؤشر الحراره عندك بيوصل 100 بسرعه فى الزحمه ؟!

المشاركة الأصلية كتبت بواسطة ahmadhussein

ألف شكر على سرعة رد حضرتك أ / مواطن مصرى
هو بالنسبة للغطاء انا عندى غطاء واحد بس وهو بتاع القربة لكن معنديش فى الريداتير اى غطاء والعربية بقالها معايا 4 سنين بالحال ده ..
ثانيا بالنسبة لسؤال حضرتك لاء خالص انا العربية اخرها معايا 90 فى الزحمة ممكن تكون عدت الـ90 فعلا بس دى مرات معدوده لما بكون واقف بالعربية فى زحمة جدا والدنيا مولعه يعنى تبقى مثلا درجة الحرارة 40 فيما فوق غير كده لاء . وعلى فكره انا عمرى بصراحه ما حطيت للعربية مياة خضراء او اى مياة غير العادية بس انا بحطها بصراحه من الفلتر اللى عندى فى البيت وهو 5 مراحل ونسبة الاملاح فيه اقل من المياه المعدنية حتى ومكانش فيه اى مشاكل معايا وكنت بعمل كده لانى العربية دى غلب فيها الصنايعية و هى ان كل يومين بالظبط بزودها حوالى نصف لتر ومكانش فيه عيب بالريداتير او الخراطيم او القربة او طرمبة المياه او وش السلندر حتى فلو كنت جبيت مياه خضراء كان هيبقى خراب بيوت .

سؤالى الاخير لحضرتك هو فين الزقازيقى ده بالظبط فى احمد سعيد وياريت لو رقم تليفونه .

واضح ان الراداتير اللى عندك مقفول بياخد مياه من القربه و فيه عصفوره من تحت تنزل منها المياه ... وده عادى مش مشكله

انا سؤالى عن الحراره لان عندى كل سنه فى دخله الصيف لازم الحراره تعلى فى الزحمه عن 100 و لازم افصل العربيه تبرد و استنى مره و اثنين و بعدها الامور تمشى عادى جدا و الى الان لم اعرف سبب لهذا الموضوع رغم انى مغير الترموستات بواحد تانى اقل علشان يشغل المروحه اسرع و برضو الموضوع مش عارف من ايه ...

انا بقولك على المياه الخضراء دى تحطها اول مره بس لان الراداتير اول مره هياخد الجركن كله و هتحتاج تزود عليه ميه تانى فبعد كده زود مياه براحتك من الفلتر او اعمل زييى انا بجمع المياه اللى بتنزل من خرطوم التكييف فى جردل نظيف و اعبيها بقمع فى التكييف و دى بتكون مياه مكثفه مفيهاش اى شوائب او املاح او اى حاجه مضره للعربيه و موضوع مانع الصدأ ده احتياط لا اكثر و هتحطه مره كل سنه مثلا و الحكايه كلها 50 جنيه اول مره بس ...

الزقازيقى للاسف مش عارف تليفونه لكن هو فى نص ش احمد سعيد و هو محل كبير و مشهور جدا و حاطط يافطه كبيره و قبله بشويه محل شكمانات ابواليزيد

بالتوفيق ان شاء الله

المشاركة الأصلية كتبت بواسطة ahmadhussein

على فكرة يا أ / مواطن ممكن يكون ارتفاع الحرارة عندك مش من الريداتير خالص ممكن تكون العربية عايزة ضبط تكيهات او ممكن يكون الشكمان عايز طقم جوانات او فيه تنفيس كل ده بيزود درجة حرارة العربية

بس على فكرة انا روحت لتلات صنايعية بتوع ريداتير كلهم بيقنعونى انى اجيب الريداتير الالمونيوم وبيقولوا لى انه بيسخن ببطء وبيفقد الحرارة بسرعه عكس النحاس بيسخن بسرعة وبيفقد الحرارة ببطء !!!! قولت لهم بس لو اتخرم هيكون صعب لحامه قالوا لى الكلام ده غلط وانهم عندهم لحامات المونيوم وعندهم العلب بتاعته زيه زى النحاس بالظبط وانه كمان لو جبته جديد بيجى بالعلب بتاعته بــ 250 ج بالتركيب كمان يعنى نصف ثمن النحاس ...فانت ايه راى حضرتك ؟؟؟؟

وياريت لو اى حد ليه تجربة مع النحاس والالمونيوم ياريت يفيدنى يا جماعه .... وجزاكم الله خيرا

ارتفاع درجه الحراره عندى بييجى مفاجىء فى الزحمه مره او مرتين بس فى الصيف كله و دى مش مشكله المشكله عندى انا انى عايز اعرف من ايه ... لو كان فيه مشكله فى التاكيهات او الشكمان او اى حاجه تانى كانت الحراره ترتفع باستمرار و كل ما العربيه تسخن الموضوع يزيد معاها و ده مش بيحصل .. عموما حصل خير

كل الناس بتستسهل الالمنيوم لانه موضه جديده و المكسب فيه عالى (الراداتير اللى بـ 200 جنيه ممكن يكون صينى او مصرى و مكسبهم فيه 100 جنيه لكن النحاس معروف سعره ايه و مكسبه مش كبير)
الراداتير الالمنيوم عايز عربيه جديده مش زى عربياتنا اللى موديلات الثمانينات (فيه حد فى منتدى السكودا كان كاتب عن مشكله سخونه الفيليشيا انه ركب راداتير نحاس و منفعش معاه علشان النحاس بتاع العربيات القديمه )

الالمنيوم عيبه انه بيسخن بسرعه و ممكن يتخرم بسهوله و لو اتخرم لحامه مش قوى و ممكن يسرب تانى بعكس لحام النحاس لو لا قدر الله حصل له حاجه

الالمنيوم كمعدن بيسخن اسرع من النحاس على فكره (اسهل تجربه : كنكه القهوه الالمنيوم بتعمل القهوه اسرع من الكنكه النحاس) بس فى مقابل كده الالمنيوم بيفقد الحراره اسرع من النحاس و دى الميزه اللى فيه و الميزه دى احنا مش هنستفيد بيها لان فى كل الاحوال المروحه هتفضل شغاله طوال ما فيه سخونه بعكس العربيات الجديده اللى المروحه فيها بتشتغل بنظام الكترونى غير الترموستات بتاعنا

لو عايز تجرب الالمنيوم وواثق فى المكان اللى هتجيبه منه و الصنايعى اللى هيركبه هاته و توكل على الله ووفر فارق الفلوس بس كل الناس اللى معاها عربيات موديلات قديمه او تكنولوجيا قديمه زى اللادا بتستعمل الرداتير النحاس

بالتوفيق ان شاء الله