تقرير تغيير بعض اجزاء عفشة تويوتا ياريس 2007 أوتوماتيك

**أشرف العدوي** · 03-06-2012 11:30 AM

بدون مقدمات
العربية كان فيها خبط و رزع كتير في المطبات و الموضوع كان يخنق بطريقة مستفزة
المهم طبعاً روحت عند حبيبي الي بعتبره أخويا بصراحة من غير مجاملة ( م / محمد فضالي ) من فترة و كان قالي على حاجات عايزة تتغير
1- بارات دركسيون داخلية
2- بارات دركسيون خارجية
3 تيش ميزان

طبعاً قدت فترة طويلة أدور على الحاجات دي و مالقتش ( الي اكتشفته ان مش كل بتوع قطع غيار تويوتا شغالين في الياريس تحديداً و مش عارف ايه السبب حتى لما قررت أجيبهم اصلي مش كل الموزعين عندهم كل الحاجات
المهم في واحد أبن حلال دلني على موزع في الوراق لقيت عنده كل حاجة ما عدا بارة داخلية لقيت عنده واحدة بس و كان ناقصلي واحدة
لقيت التانية عن البرجسي الي في شارع مراد ( كانت هي الموجودة بس من كل المطلوب و جابهالي من العرض كمان )

و على فكرة الموزع بتاع الوراق أرخص واحد لقيت عنده الحاجة هو محل أسمه الأخوة بعد معهد تيودور بلهارس على طول محل صغير كدة

المهم جبت الحاجة
و هي كالتالي
تيش ميزان
الفردة بـ 250
و دي صورته

بارات داخلية جبت فردة من الأخوة بـ 350 و فردة من البرجسي بـ 380 و دي صورتهم

بارادت خارجية الفردة بـ 170
و دي صورتهم

انا ممكن اكون متلغبط بين سعر تيش الميزان و البارات الخارجية

يبقى كدة المجموع

1570 جنيه

ودي صورة التكتت

طلعت على مركز توب جير و ابتدى الفك و التركيب و الموضوع خلص تقريباً في ساعتين ساعتين و نص لان كان في جلبه مقص عايزة تتغير و روحت دورت عليها و طبعاً كالعادة مالقتهاش عند اي حد
و طلع المهندس محمد بنفسه جرب و رجع شيك على حاجات و بعد كدة حسام الي شغال معاه و رجع شيك تاني و ربط مسمار القطمة علشان كان مهوي

و النتيجة ما تتوصفش طبعاً

و تاني نصيحة لوجه الله الي مجربش توب جير يروح يجرب و مش هيخسر حاجة و انا متأكد ان هيستمر في التعامل معاه زيي كدة

على فكرة محل الأخوة الي في الوراق أرخص واحد بيبيع أصلي قابلته أثناء البحث

عايز اصدمكوا
سعر كباس التكييف في التوكيل
.
.
.
.
.
.
.
.
.

8725 جنيه غير شامل الضريبة
و عند البرجشي سبعة ألاف و شوية فكة مش فاكرهم
فكل واحد يخلي باله من كباسه

أنتظروني في التقرير المعجزة لتغير كباس التكييف بتاع الياريس بس مش من التوكيل طبعاً

**Ahmod** · 03-06-2012 12:53 PM

تسلم على التقرير بس انا ملاحظ ان حضرتك غيرت حجات نادرا لما بلاقي حد بيغيرها في تويوتا !! ؟ سواء ياريس او كورولا

او الحجات دي عموما بتتغير على المدى البعيييييييييد البعيد اوي !! فهل حضرتك لاسمح الله خبطت بالعربية او حصلت معاك حاجة ادت الى ان العفشة تتبهدل وتحتاج تغيير الحجات دي ؟

خصوصا ان عربيتك موديل 2007 يعني ماتعتبرش من العربيات اللى بقالها سنين كتيرة على الطريق

لان انا اعرف ناس معاهم كورولا موديلات 2005 وقبل كدة وعمرهم ماغيرو اي حاجة في العفشة لحد دلوقتي ومش بيشتكو من حاجة

**أشرف العدوي** · 03-06-2012 01:01 PM

و الله يا باشا الي انا اشتريت منه العربية كانت مراته نزلت في حفرة مرة بالعجلة الشمال
و العربية دي الي سيقاها حالياً أختي الصغيرة و طبعاً مش عايز أوصفلك هي بتعمل ايه في العربية
هي اتعلمت عليها اسواقة
و المطبات بالنسبة لها جزء من الطريق بتاخدها عادي بالسرعة الي هيا ماشية بيها سواء بسرعة أو بطئ ما بتهتمش هي بالكلام الفارغ ده

يعني العربية دي الي ساقها من ساعة ما اتصنعت 2 ستات
بس كدة
ربنا يكون في عونها

**BLOODY_STONE** · 07-06-2012 02:46 PM

الف مبروك يا باشا

بس فعلا الحاجات دي تتغير بعد عمر طويل او العربية عاملة حادثة ...

**أشرف العدوي** · 07-06-2012 09:00 PM

المشاركة الأصلية كتبت بواسطة asemx1

برنس الف مبرووك على التغيير
فعلا الاسعار دى حقيقيه
بس كنت عايز اقولك حاجه

فى نوع نفس كفائه الاصلى بتاع تويوتا تصنيع كورى الميزان بيعمله 100 جنيه واى حاجه سواء تيش او بارات هيعمله فى الرنج دا

هتقولى الاصلى احلى بس لما يكون فى حاجه نفس الكفائه بالظبط والعمر مش هتقول لا عليها ....
النوع اسمه kyp ودا كورى بس بصراحه ممتاز جدا جدا جدا جدا وعن تجربه فى عربيات كتير وعمره بعمر العربيه عن تجربه فى عربيات كتير

كان ممكن تنزل فى المشتريات للربع او النص لو اشتريت النوع دا

بس عموما الف مبروووك ...

تحياتى لك .. م\ عاصم جاد

أنا أول مرة اعرف ان kyp عاملة أجزاء العفشة
أنا كنت فاكر انها مساعدين بس

هو فين نوع أسمه 555 ده في منه ياباني و تيواني
و في str
بس للأسف قطع غيارها فعلاًَ مش منتشرة و ده الي انا استغربتله
هتى الموزعين المعتمدين مش عندهم كل حاجة