الموضوع: انا اللى مش فاهم ولا هما اللى نصابين

ربنا يعوض عليك اولا .. ويؤسفنى انى اقولك ان 99.9 % من الصنيعية بهايم ؟؟؟

لسان وقلة ضمير وقلة ادب بس على الفاضى وانا اسف انى باقولك كدة . بس ارجو ان لا تزعل

وبعد كده لا تنخدع بالاسامى .. واذهب الى التوكيل حتى توفر فلوسك وجهدك ..ربنا معاك

الله يكون في عون حضرتك انا حاسس بيك لأني انا معايا بيجو 505 موديل 80 بيتنصب عليا كل يوم بسببها ، زيك بالضبط ...والله يسامح غبور الي خلانا نبقى ضحية للنصابين بسسب مصنعياته المبالغ فيها جدا وقطع الغيار الفلكية في التوكيل ومراكز الخدمة المعتمدة ....لأنه في موضوع زي بتاع حضرتك كان قالولك في التوكيل 10000 جنيه .. تخيل !!!!

انا حزين جدااااا ، وقرفان جدااااااااااا ، و عايز اجيب فنطاز جاز و اولع فى كل الصنايعية اللى فى البلد ، حسبى الله ، حسبى الله ونعم واكيل ، حسبى الله ونعم الوكيل

المشاركة الأصلية كتبت بواسطة cdkareem

انا اللى مش فاهم ولا هما اللى نصابين
السلام عليكم
انا هحكى الموضوع من اوله علشان تحكوموا بالعدل
اخوىا معه فيرنا موديل 2006اوتو كان فى كارفور والعربية سخنت منه جامد وجابت وش سلندر اتصل بى روحت اخد العربية علشان كان معه مراته واولاده الصغيرين ، المهم اخدت العربية تانى يوم ودتها للميكانيكى اللى بتعامل معه ، هو مش شاطر اوى بس نقدر نقول عليه معقول ، الكلام ده كان يوم الخميس بالليل كشف عليها وقالى هاتها الجمعة، و الجمعة كان عندى شغل ، المهم سبت العربية وقلتله على اللى حصل وكشف وفك الماتور وقالى لازم يتخرط ، قولت مفيش مشاكل العربية معاك اعمل اللى عايزه ، سبت العربية يوم الجمعة قبل الصلاه وعديت بلليل على الساعة 1 ، ايه الاخبار يا اسطى قالى تمام بس العربية متلتة ، قولتله يعنى ايه ، قالى انا هبات فيها ومش هروح غير والعربية عشرة على عشرة ، قولت امين حسابك كام قالى 300 جنيه سبتله 200 وقولته بكرة تاخد باقى حسابك ، روحت يوم السبت الصبح ملقتوش فى الورشه ولقيت الصبى بتاعه فين الاسطى يا بنى قالى لسه مجاش قولتله طيب تعالى سلمنى العربية ، قالى اتصل بالاسطى الاول اتصلت بيه العربية خلصت يا اسطى ، قالى وزى الفل ، ماشى بدور العربية المصيبة السودة العربية زى الزفت واكنها 128 اتنرفزت جداااا العربية متلته بغباء وبتتهز اكنها محطوطة على الفيبريشن اتصلت بيه تانى ايه يا عم اللى فى العربية ده قالى لا عادى غير الزيت بس وهى هتبقى زى الفل سألته متأكد يا اسطى قالى عيب ، قولت الود ده واثق اوى من نفسه مش هفهم اكتر منه يعنى ماشى يا عم انا هسبلك باقى الحساب وعربيتى علشان فيه صوت غبى جاى من ناحية الشمال شوفه من ايه واعمله قالى خلاص ماشى ، سبت عربيتى واخدت العربية الفيرنا وريح على شغلى المهم الدنيا حر جدااا قولت يا واد شغل التكيف ، شغلته وعينك ما تشوف غير النور العربية برجلت وراحت فصله قولت لاء بقى مش مهم الشغل النهاردة لفيت ورجعت له تانى لقيته موجود فى الورشه، قالى لاء كده ممكن يكون حساس او حاجة روح لبتاع كمبيوتر يشوف فيها ايه ، ماشى يا عم ، متأكد ولا هدفع فلوس على الفاضى قالى طيب غير الزيت بالمرة ونشوف غيرت الزيت وبرضه العربية زى ما هى قالى لاء كده انا شغلى تمام وكدة شغل كهربا قولت خلاص ورضيت الصبيان اللى معه 0
مشيت من عنده روحت لواحد عنده مركز صيانة ميكانيكا وكهرباء وكشف بالكمبيوتر وكمان جهاز تنضيف الرشاشات ، دخلت السلام عليكم العربية متلتة وعايزك تبص عليها ، قالى ايه اللى حصل قولتله سخنت وعملة وش السلندر ، كشف قالى ده عيب رشاشات عايزة تنضف قولت متأكد قالى طبعا طيب يا عم اتوكل على الله وفضلت ملطوع جنبه حوالى 3 ساعات بينضف فيها ، وكل شوية يقولى اصل احنا بنشتغل بضمير ، ماشى يا عم ، طلعت اللاب بتاعى وفضلت اسلى نفسي لحد ما ربنا كرمه وقالى خلصنا وتعالى شوف الاحتراف فى الشغل وابتدى يركب وانا قلبى بيدق يدق يدق من الفرحة دور يا على ( على ده مهندس بيتدريب عنده ) دارت العربية والمصيبة اللى مش متوقعه زى ما هى يانهااااااااااااااااار ابيض l ايه يا عم العبقرى فيه ايه ؟؟؟؟؟؟؟ قالى بس يا بيه انا مكنتش عايز اقولك علشان متتصدمش العربية دى عايزة صبابات وعايزة يتعمله عمرة علشان مش عارف ايه كده طبعا انا من الصدمة مش قادر انطق لسبب بسيط جدااا ان اخويا ممعهوش فلوس وانا اللى بعمله العربية على حسابى وانا كمان العمليه مش مظبطة معى ، قولت يعنى ايه قالى بس احنا هنعمل اخر محاولة وربنا يسهل - ماشى يا عم اتكل على الله ، فك التقسيمة وفك كذا حاجة تانى معه وبعتنى جبت منظف حساسات ومنظف بوابة ، و اشتغل وانا قاعد مش قادر خايف فعلاً الميكانيكى اللى عمل الوش يكون بوظ حاجة ، خلص على الساعه 1 بالليل وانا متلج وجعان وتعبان ايه ياعم خلويص ؟؟؟؟؟؟؟ وفضلنا نلعب مساكة لما قرفت وتعبت وفى الاخر قالى يلا يا باشا العربية 100% متأكد يا عم العبقرى ( انا كرهت كلمة متأكد فى اليومين دول ) قالى طبعا وقاعد يحيكلى عن مواقف عبقرية ومش عارف عربية سفير مين وعربية النجم مين وعربية احمس اللى حارب بيها الهكسوس هو اللى مصلحها لما اخدت مطب جامد شوية ولولا هو كانت الهكسوس احتلت مصر ، الساعة كانت كام بقى 3 الفجر j علشان بس تعرفوا الاستراحه بعيدة عن الورشه بحاولى 20 متر كده وانا طبعا من البرد قاعد جوه ، طيب تعالى بقى دور العربية وسمعنى وورينى شكل الماتور على السلانسية يعنى مدورش العربية وتخلى حد من عندك يزود بنزين عايز اشوف الماتور بقى هادة ولا زى ما هو قالى عيب هو انا هضحك عليك :l واحنا مشين كام حسابك يا عم قالى علشان خطرك وعلشان حضرتك تبقى عميل عندى ( تقولش عابد كرمان ) 300 جنيه ، ( فى بالى مش خسارة فيك لو العربية مظبوطة ) قولت حاضر وطلعت من جيبى الفلوس ودى كانت اخر فلوس معى وممعيش حتى ربع جنيه مخروم ،،، روحنا ندور العربية يا دوبك العربية دارت عشر ثوانى وطفت ايه يا بشمهندس فيه ايه ، قالى العربية خلصت بنزين ، والحل ؟ قالى تعالى اوصلك و انا هخلى حد من الورشة يجبلك ينزين تمشى بيه لحد البنزينة طيب يا عم بكرة الاحد وانتى قافل ؟؟ قالى مش مشكلة انا هخلى حد من الورشة يستنى حضرتك لحد ما تجيى ، وانا بكل هبل قولت ماشى وفعلاً روحت مش تعبان بس لاء ده انا ميت بزيادة _ نمت وقومت من النوم الصبح لقيت اخويا بيقولى هى العربية فين قولتله لسه بتتعمل روح انت هات عربيتى من عند الميكانيكى خليها معاك لحد ما اعمل عربيتك وطبعا قولتله ابقى حسبه ( ده الميكانيكى الاولانى خاللللللللللللللللص ) وانا روحت استلم الفيرنا وفعلاً لقيت واحد مستنينى وجاب بنزين وحطه فى العربية ، ودور يا معلم دارت ودى كانت ( هو انا قولت كام مصيبة لحد دلوقت ) والله ما انا فاكر ، العربية هى هى نفس الصوت الغبى ونفس الرجرجة اللى فى العربية ـ حسيت انى اهبل اووووى وانى مخلوق علشان ينضحك عليا وطلعت كل همى ونكدى على الواد بتاع الورشة ، والواد يقولى وانا ذنبى ايه انا معرفش حاجة ، المهم اخد العربية ومشيت روحت شغلى ، ركنت العربية فى الجراج وطلعت مكتبى ، لقيت بتاع الجراج بيتصل بى وبيقولى العربية بتجيب زيت من تحت ( هاااااااااااااااااااااار ابيض ) نزات ايه يا عم فيه ايه لقيت العربية تحتها زيت بكمية رهيبة افتح يا عم الكباوت لقيت الموتور غرقان زيت ولما ازود بنزين الزيت يعمل زى النافورة ولا اللى امام جنينه الحيونات اللى العرسان بيروحو يتصورا عندها ، اقفل يا عم وكان ناقص ارمى السيجارة اللى فى ايدى على العربية واولع فيها ( بس افتكرت انها مش عربيتى ولو عملت كده اخوى هيقولى دى كانت عربية مرسيدس s500 ) رمضان شفنى كده قالى معلش متزعلش انا هخدها اوديها لواحد هنا محترم ( صعبت على رمضان بتاع الجراج ) خدها وبعدها بساعه لقيته بيتصل بى و بيبشرنى بالبشرى السعيدة العربية بقت زى الفل ( وزى الفل دى تانى كلمة كرهتها بعد كلمة متأكد ) طيب يا عم الحساب كام قالى 150 جنيه ، اتصلت بأخويا تعالى يا عم خد عربتك وهاتلى عربيتى وفعلا جالى المكتب قولتله العربية فى الجراج روح خدها وقولى ايه الاخبار ، نزل واتصل بى قالى العربية كويسه ورجعت زى ما كانت ( الف مبروك لى ) خلصت شغلى الحمد لله ونزلت اركب عربيتى والمصيبة معرفش رقم كام الاقى العربية زى ماهى يالهووووى هو فيه ايه ؟؟؟؟؟؟؟؟؟ روحت اتصلت بأخويا وسألته انت دفعت كام قالى 50 جنيه ، روحت اتصلت بالواد المكيانيكى الاولانى خاللللللللللللللللللص قولتها انا جيلك الورشة قالى النهاردة الاحد وانت عارف اننا اجازة قولته مليش دعوه انزل ، نزل قولتله انت اخد خمسين جنيه على العربية دى والصوت زى ما هو ومكلمتوش على الفيرنا ( مستنى رأيكم الاول ) قالى الريدتاير كان سيب ربطه وان الصوت ده جاى من البارات ومش عارف ايه فى العفشة ، يا بنى انسان انت انا جيلك على الصوت ده مخصوص ، معملتوش تاخد 50 جنيه بتاع ايه ورحت سبته ومشيت 0
الاسئلة بقى علشان انا طولت اوووووووى وعارف ان فيه ناس تاهت منى :-
اعمل ايه مع المكيانكى الاولانى خالص بخصوص الفيرنا والـ 300 جنيه اللى اخدهم 0
اعمل ايه مع مركز الصيانة وبرضه الـ 300 اللى اخدهم 0
اعمل ايه مع الميكانيكى الاولانى خاللللللللللص والـ 50 جنيه اللى اخدهم والعيب زى ما هو 0
( مع العلم ان العربية صرفت لحد دلوقت بالزيت بالمياه وغيرت البيجوهات حوالى 1000 جنيه ) ده غير الاكرميات 0

حضرتك انسان محترم من كلامك وللأسف ماينفعش في بلادنا زي مصر الأحترام اللي 100% اللي حضرتك بتتعامل بيه اول حاجه حضرتك تسأل حد من اللي عندهم خبره على ميكانيكي شاطر لأن معنى ان العربيه جابت وش سلندر ده مصيبه وعلشان تتصلح ده قصه كبيره وباين ان اول ميكانيكي روحتله مش فاهم حاجه وبوظلك الدنيا زياده وخد بالك تصليح وش السلندر مكلف ياعني ممكن تتكلف لحد 1000 جنيه ازا ماكنش اكتر ديه حاجه بعد العربيه اما تتصلح وتبقى تمام ترجع تاخد فلوسك كامله من الميكانيكي اللي روحتله الأول تاخدها بصوت العالي بالخناق تاخدها منه وخلاص لأنه هو دمر موتور العربيه بغباءه وبعد كده حضرتك ماتستعجلش لو حصل مشكله في العربيه ومش اي ميكانيكي يصلح وخلاص لأ لازم واحد متخصص ومعروف انا للأسف مش من القاهره بس لوكنت حضرتك في اسكندريه كنت اعرفلك ناس متخصصه وشاطره بحيث بكتيره يومين وكانت العربيه رجعت زي ماكانت واحسن ثم مش عاوز حضرتك تزعل من اللي حصل و تفكر في الكلام اللي قولته وزكرته قبل كده

المشاركة الأصلية كتبت بواسطة hmada9009_99

حضرتك انسان محترم من كلامك وللأسف ماينفعش في بلادنا زي مصر الأحترام اللي 100% اللي حضرتك بتتعامل بيه اول حاجه حضرتك تسأل حد من اللي عندهم خبره على ميكانيكي شاطر لأن معنى ان العربيه جابت وش سلندر ده مصيبه وعلشان تتصلح ده قصه كبيره وباين ان اول ميكانيكي روحتله مش فاهم حاجه وبوظلك الدنيا زياده وخد بالك تصليح وش السلندر مكلف ياعني ممكن تتكلف لحد 1000 جنيه ازا ماكنش اكتر ديه حاجه بعد العربيه اما تتصلح وتبقى تمام ترجع تاخد فلوسك كامله من الميكانيكي اللي روحتله الأول تاخدها بصوت العالي بالخناق تاخدها منه وخلاص لأنه هو دمر موتور العربيه بغباءه وبعد كده حضرتك ماتستعجلش لو حصل مشكله في العربيه ومش اي ميكانيكي يصلح وخلاص لأ لازم واحد متخصص ومعروف انا للأسف مش من القاهره بس لوكنت حضرتك في اسكندريه كنت اعرفلك ناس متخصصه وشاطره بحيث بكتيره يومين وكانت العربيه رجعت زي ماكانت واحسن ثم مش عاوز حضرتك تزعل من اللي حصل و تفكر في الكلام اللي قولته وزكرته قبل كده

كلام حضرتك صح ، وفعلاً انا قررت ان مش هدفع مليم بعد كده غير لما استلم العربية وهطلع عينهم الكلاب دول ، انا روحت للميكانيكى الاولانى قالى العربية كانت كده قبل ما اشتغل فيها وانها متلتة قبل ما تسخن وان شغله مظبوط وانه صنايعى ليه اسمه وسمعته ، وطبعا العربية ريحاله منيله بنيلة ومحدش يقدر يثبت ان ده عيب فى شغله مش فى العربية من الاول 0

المشاركة الأصلية كتبت بواسطة ahmed_mido1889

معلش لي سؤال

العيب الاخير اتصلح ازاي؟

ومركز الخدمه قوله حسابك زياده قوي تنضيف رشاشات ب100 جنيه وزود 50 جنيه كشف علي الباقي يبقي 150

لكن 300 كتير

وحكايه تحجير الفراما تاكد كمن خراطيم السيرفو في المانفولد انها مظبوطه

العيب اتصلح ان كانت التقسيمة غلط وغير الجوان بواحد اطخن شوية 0
مكرز الخدمة قالى انه بينظف الرشاشات بـ 150 جنيه وانه عامل معى واجب لأ،ه نضف الحساسات كلها والبوابة وفك التقسيمة ومطلعنى كمان مديون لأنه عمل معى واجب علشان ابقى عميل عنده 0
الفرامل كانت بتحجر مع التكيف بس وبصراحه مسألتش اتصلحت ازى 0