سلام عليكم ورحمة الله وبركاته
أولا أشكر كل القائمين على هذا المنتدى الرائع وأشكراً أيضاً جميع أعضاءه
ندخل فى الموضوع :
أنا أخوكم أحمد وعجباني بجنون السيارة سكودا فليشيا من حيث الشكل الخارجي والصالون الواسع وشكل الطابلوة
المهم دي ستكون أول سيارة بالنسبة لي

السيارة مواصفاتها فليشيا 97 لون زيتي فبريقة دواخل رشة برة نظافة فرش جلد فوق الفرش الأصلي كبالن جديدة كاسيت ريموت بطارية جافة جديدة .
المشكلة أن المكنة بتاعتها خفيفة وبتاكل زيت وصاحب العربية بيحطلها زيت ( 1000 كل ألف كيلو ) وكمان فيه صوت فى الفتيس يمكن يكون بلية أو شيئ أخر ودة يبان بعد فك الفتيس والراجل صاحبها ( معلي المكنة يعني عداد rpm عالي وهية واقفة على الأرض قبل ماتمشي ) وكمان فية بستم ساقط بمعني ممكن يكون فية بستم مش شغال ودة كلام الميكانيكي اللي شاف العربية ودة من طرفي انا وصاحبي هوة ميكانيكي ديزل بس شاطر جداً فى شغلة ويهمة أمري .
الميكانيكي قال أحنا لو هناخد العربية هتبقي زي البطيخة ممكن يكون فيها شغل بسيط أو مشاكل كتير .
العربية معروضة على 27.000 ألف ودة كلام نهائي

أرجو منكم النصيحة ياتري أشتري العربية ولا اية مع العلم أن العربية أو عربية هاجيبها عجباني جداً كشكل وفرش ولون .
وأسف على الإطالة وأرجو أن أكون وضحت لكم الموضوع وبرجاء الرد بسرعة لو أمكن علشان نازل اشتري العربية قريب

ودة لينك الاعلان
سكودا فليشيا موديل 1997 لون زيتي فابريكا دواخل رش حديث من ثلاثة اشهر وبطارية وكواتش تيوبلس جديد خمسة جنوط سبور مقاس 13 راديوفلاشة بالريموت كبالن جديدة وتظبيط العفشة ممتازة وفرش جلد لونين اسود ورمادي فوق فرش الفابريكا الارضية جلد فوق موكت الفابريكا فوانيس شبورة امامية وخلفية شكمان ديفل صوته مميز دواخل فابريكا بالكامل مرور مدينة نصر رخصة باسمي سارية سنتين ونصف وماشية 200,750 كم