الموضوع: عمرة ماتور للبيتلز تتكلف كام

و المصنعيات اخبارها ايه
و انت بتعمل ايه بالضبط عند السروجى
هل بتعمل الكراسى و السقف و الارضية و لا حاجة معينة
و الخامات اللى بيستخدمها ايه

المشاركة الأصلية كتبت بواسطة hossam2222

ربنا يكرمك انشاء الله على فكره انا بشد العربيه كله سمكره ودوكو وسروجى وكهرباء وقولت بالمره اعمر الموتور عندى نفس المشكله صوت خشن فى الموتور والراجل الى بتاعمل معاه قالى ( سبيكة و طقم شنبر ) وتكلف حاولى الف جنيه 450جنيه سبيكة و300 الخراط و110 طقم الشنبر يعنى 1000 جنيه وعلى فكره العربيه على كده مشاء الله بتجرى وتسحب وتمام بس قولت اعمله بالمره طالما بشد

طيب حضرتك بتتعامل مع ميكانيكى اسمه ايه وعنوانه فين

المشاركة الأصلية كتبت بواسطة hossam2222

ربنا يكرمك إن شاء الله على فكره انا بشد العربيه كله سمكره ودوكو وسروجى وكهرباء وقولت بالمره اعمر الموتور عندى نفس المشكله صوت خشن فى الموتور والراجل الى بتاعمل معاه قالى ( سبيكة و طقم شنبر ) وتكلف حاولى الف جنيه 450جنيه سبيكة و300 الخراط و110 طقم الشنبر يعنى 1000 جنيه وعلى فكره العربيه على كده مشاء الله بتجرى وتسحب وتمام بس قولت اعمله بالمره طالما بشد

و يكرمك يا حسام باشا , و مرحباً بيك عضو جديد فى رابطة البيتل
طبعاً 1000 جنية من غير مصنعية ؟ ولا أنا غلطان ؟ !!!
طبعاً البيتل لما الماتور بيخف بتجرى صاروخ
و شكرا على المعلومات الخاصة بالسروجى و السمكرى و الكهربائى , و فعلاً أنا أعرف إن نبيل السروجى محترف فى البيتل.
ربنا يباركلك فيها و تخلص على خير إن شاء الله

السلام عليكم و رحمة الله و بركاته

يوم الإثنين 9-2-2009 روحت لجمال الميكانيكى عشان أطمن على بطتى ( عربيتى البيتل ) و لكن للأسف لقيت الماتور لسه عند الخراط لأنو هايركب كرسى صلب قبل السبيكة و بصراحة مش عارف دا كويس و لا لأ ؟؟؟؟؟؟
لكن لما جمال الميكانيكى لقانى زعلان طلبلى شاى و قعد يقنعنى إن الكرسى الصلب مصلحة للماتور و إنو إن شاء الله لما يستلم الماتور هايسهر عليه لغاية لما يقفلو , و ربنا يسهل و يخلصو على خير .

لكن اللى فرحنى و سعدنى اليوم دا إن الأستاذ المحترم/ إيهاب باشا ...و الأستاذ الخلوق/ هاشم باشا ... كلمونى و قابلونى عند الأسطى جمال الميكانيكى , و طبعاً قعدنا نتكلم كتير مع جمال الميكانيكى فى حاجات كتير جداً و إتفقنا على حاجات هانعملها إن شاء الله فى عربياتنا .

و بالعافية لما أقنعنا جمال الميكانيكى إنو يتصور معانا لأنه بيخاف الصور تطلع على التليفزيون !!! قصدى النت



الأول من اليمين : الأسطى محسن أخو الأسطى جمال
الثانى من اليمين : الاستاذ/ هاشم
الثالث : الأستاذ / إيهاب
الرابع : الأسطى جمال الميكانيكى ( طبعاً كان بيفكر هانعمل إيه بالصور )




التانى من اليمين : العبد الفقير إلى الله




جمال الميكانيكى بيقول يا رتنى ماتصورت
بس بصراحة محترم جداً و أمين و فاهم و بيقدر الزبون

و إن شاء الله هاقولكو كل اللى بيحصل و بالصور بس إدعولى الماتور يخلص على خير و العمرة و التليين يعدو بسلام.

المشاركة الأصلية كتبت بواسطة El.Hossieny

ان شاء الله يا ابو حمييييييد العربية تخلص علي خير و ترجع احسن من الاول .... و التليين كمان يعدي علي خير ... بس متبقاش تعدي ال 140

يا رب يا حسينى يا رب
و الله لما كانت العربية عاوزة عمرة كانت زى الصاروخ , بس و الله أوقات كتير مش بقرص عليها بعد ما حسيت بترزيع الماتور و إنت عارف أنا بحبها و بخاف عليها أد إيه؟
و ربنا يتمها على خير و يباركلنا فى عربياتنا

السلام عليكم و رحمة الله و بركاته

يوم الأربعاء 11-2-2009 روحت للاسطى جمال الميكانيكى و الحمد لله لقيته بيقفل فى الماتور و كان شىء ممتع بجد بالرغم من إن غالبية الميكانيكية مش بيحبو يقفلو الماتور قدام الزبون , لكن بصراحة جمال إتفق معايا إنو يقفل الماتور قدامى و قد صدق .
و اللى إتعمل فى الماتور التالى:
1- طقم سبيكة ألمانى ( أول خرطة للماتور و الحمد لله ).
2- طقم جوانات كامل ألمانى.
3- طقم شمبر ألمانى كامل ( 18 شمبر ) و مش عارف غير الأربعة بتوع البساتم.
4- طقم صبابات ألمانى إستيراد.
5- طقم أولسيهات جديدة ألمانى.
6- خرط للماتور و تركيب كرسى صلب.
7- روديه للصبابات.
8- تجليخ للديسك الخاص بالدبرياج.
9- علبة شكمان جديدة + 2 ديول جديدة
10- إضافة 3 كيلو زيت ماتور نظيف للتليين

تم تجميع و تقفيل الموتور و الحمد لله و تركيبة فى العربية و دورنا و الحمد لله تمام و هى الآن عند جمال الميكانيكى للتليين على الواقف.
و دى شوية صور أثناء التقفيل و بعد رفع الماتور للعربية:




و دى علبة طقم الشمبر



و دى صورة الأسطى جمال أثناء التقفيل



و كمان لاحظت إنو بيستخدم نوع صمغ أمريكى للتقفيل



و دى صورة بعد رفع الماتور للعربية و الدواره



بس للأسف نسيت أصور علبة الشكمان الجديدة بعد التركيب و كمان أصور الماتور بعد التقفيل النهائى ( كنت تعبت بصراحة ).
و إن شاء الله العربية هاتحرق 20 لتر كمان على الواقف و أستلمها على خير و تبدأ فترة التليين.