الموضوع: حكايتى مع العفشجى

انا من فتره كبيره (يعنى من ساعة ما اشتريت العربيه يناير 2011) وانا متأكد ان فى حاجه غلط خصوصا فى الدركسيون مش فى شكله رغم ان شكله كان صغير (طاره اسبور ) بس مع كل مطب او حتى ظلطه كنت بحس بزلزال فى الطاره وطبعا علشان اكسر يمين قوى كنت ببزل مجهود خرافى ( تمرين مفيد لعضلة الباى )

الحمد لله امبارح غيرت اسكاتره - جبت طاره اصلية - وجوز بطاحات
نبدأ الحكايه مع العفشجى
اولا انا اكتشفت ان جمب بيتى ( فى ضهر حديقة بدر - جسر السويس ) فى واحد عفشجى الناس بتشكر فيه روحتله وقولتله شوف ايه النظام قالى عاوزين اسكاتره وبطاحه مكدبتش خبر اتصلت ب ابو شهد الى فى الحرافيين وسئلته الاسماتره عامله كام قالى عامله 300 والطاره عامله كام يا عم الحج قالى عامله 200 والاير باك عامله 250 قولت للعفشجى ايه رأيك قالى يا عم حرام عليك بندق حجاج الى فى الاربعين اسعاره كويسه اتصلى بيه وسئله لقيت الاسكاتره عامله 200 والطاره عامله 150 قولت فل اهى 100 جنيه انا اولا بيها وكمان ده اقرب من الحرافيين
روحت انا و العفشجى جبنا الاسكاتره بالصاليبه بتاعتها وغيرنا التيش بتاع الاسكاتره بواحد احسن من الى كان فيها كمان ورجعنا وعقبال هوا ما يفك الاسكاتره القديمه روحت اجيب البطاحات سئلت فى حتت كتير لقيت ان كله متفق على سعر واحد وهوا 170 بس الاختلاف الوحيد كان فى البطاحه نفسها لقيت بطاحات مش مكتوب عليها اى حاجه وكمان فى كيس زى بتاع العيش الفينو طبعا مجبتهاش ولقيت بطاحه كمان مكتوب عليها انها المانى بس تخيلو الحروف بتاعتها مش مكتوبه بشكل صحيح يعنى حرفين مرحلين شويه عن السطر ولقيت نوع تانى فى كرتونه شكله محترم شويه اسمه ( مالى ) ومكتوب عليه انه المانى الصراحه قولت اهو احسن الوحشين رجعت بالبطاحات وانا فرحان قولت اخيرا مش هسمع دبدبه قدام مع اى ظلطه
المهم رجعت قالى بص يا باشا الاسكاتره كويسه بس عاوزين نغير الصاليبه علشان تقيله شويه انا حسيت من كلامه ان الطاره هتبقى تقيله قوى المهم روحت عن حجاج بتاع الاستيراد تانى وجبنا منه صاليبه تانيه وبالمره جبت منه هوايتين التكييف الى فى الطابلوه يمين وشمال حسبهملى ب 50 جنيه الاتنين مع انى لما سئلت عند ابو شهد الى كنت بجيب منه كل حاجه قالى عاملين 75 وده علشان خاطرى
مطولش عليكم ركبنا الصاليبه وركبت انا هوايتين التكييف وكمان الطاره العاديه
واخد منى مصنعيه 80 جنيه هوا كان عاوز 100 بس تقريبا صعبت عليه وقالى 80 بعد ما جبتله علبة الشحم
النتيجه بقى من غير ما اظبط زوايه
الطاره تقيله شويه وعاوز فعلا اغير الصاليبه تانى وده الى قاله العفشجى
البطاحات عاملين شغل الحمد لله ومبقتش تدبدب كل شويه
الطاره الجديده والهوايتين بتوع الكتييف خلو بنتى هنا تقولى انتا جبت عربيه جديده يا بابى
وان شاء الله بكره الاتنين هروح تانى للعفشجى ندور على صاليبه ناعمه شويه ونغير التقيله الى راكبه عندى بس للعلم العربيه اخف من الاول برده حتى والصاليبه تقيلة
الغريب فى الموضوع ان بعد ما الموضوع ده خلص جيت اقفل باب السواق علشان امشى لقيتة مش بيقفل يمين شمال الكالون مش راضى وحالف 100 يامين انه مش هيقفل روحت لواحد بتاع مفاتيح قالى الكالون ده مات يا معلم ومش هينفع اننا نصلحه لازم تجيب واحد استيراد جريت بسرعه على حجاج وفكلى واحد من باب واخد منى 100 جنيه وعقبال ما روحت للراجل بتاع المفاتيح كنت خلاص جبت اخرى ومش قادر اقف على رجلى ولا اقعد حتى انا لازم انام بقى تعبت خلاص المهم غير الكالون والحمد لله العربيه بقت تقفل بالسنتر وتفتح عادى بس مبقتش تفتح بالمفتاح علشان قالى ان فى حتة حديده عندى فى الاكره مقطومه ويومين كده وهيشوفلى واحده تانى افلح ان صدق
والحمد لله على كل شيئ
وربنا يستر طريقى وطريقكم