الموضوع: احزروا البنزين المغشوش

طبعا كلنا بنعانى من ازمه البنزين الفتره دى ومنظر ترنبه البنزين و انت واقف جنبها تمون بقى حلم صعب المنال و لا ياتى الا بعد لف و دوران و الوقوف فى طابور انتظار من اجل عيون الترنبه مش اقل من ساعه و بعض الايام تصل الى 4-5 ساعات و اوقات بعد الانتظار ده كله و اول ماتقرب من حلمك جنب الترنبه تلاقى الراجل فى البنزينه يقولك اسفين يابيه خلصنا
المهم امبارح بعد ماخلصت الشغل و انا راجع على البيت لاقيت بنزينه موبيل فيها بنزين 92 و الطابور كان خفيف يادوب 22 سياره لانى عديتهم قبل ما اقف امون و عملت حسابى على ساعه انتظار على الاقل و اتصلت بالبيت علشان مايستنونيش على الغدا ههههههههههههههههه
المهم و قفت فى الطابور و من الميزات الوقوف انك بتزود معارفك و تتعرف على الرجاله اللى واقفين معاك
و اخيرااااااااااااا بعد ساعه و تلت انتظار و صلت للترنمبه و فولت العربيه و ظبت الراجل ببقشيش مش و حش
دورت العربيه و قفلت الزجاج و شغلت التكيف علشان الجو امبارح كان حر نار و الوقفه فى الطابور طولت
طبعا فى بعضكم مش الكل هايقول ايه الكلام ده كله فين الموضوع ؟!!!!!!!!!!!!!!!!!!!!!!!
الكلام ده كله علشان تعيشوا معايا نفس التجربه
المهم ماكملتش 2 كيلو و لقيت العربيه عماله تصقف و سحبها ضعف جدا فورا طفيت التكيف و فتحت الزجاج لقيت الصوت مستمر
رجعت للبنزيه و طلبت منهم يسحبوا البنزين من السياره طبعا رفضوا
مالقيتش حل الا ان اروح للميكانيكى و قولتله على المشكله قالى لسه عربيه تويوتا فيها نفس المشكله البنزين مخلوط بالميه و لازم هانضى التانك و نفكه و نظفه من الميه و ايلا هايبوظ الرشاشات و ترنمبه البنزين
و انتم عارفين اسعار الحاجات دى ايه قولت امرى لله و بتدى شغل فى العربيه
فى الاول فضى البنزين من العربيه و لقيت حاجه غريبه البنزين نازل على و شه ريمه و قالى دى من الميه اللى فى التانك
ودى كانت اول خساره 70 ثمن التفويله
بعد كده فك التنك و نظف الترنمبه و الفلتر و نظف التنك بالخل و الميه و سابه لما نشف تماما
بعد ماركب كل حاجه تانى روحنا نجيب بنزين تانى من بنزينه شل و الحمد لله طلع ليه معرفه بصاحب البنزينه و خدنا 20 لتر فى جركل و دى كانت التكلفه الثانيه 35 جنيه
و اخيرا جه وقت الحساب الراجل علشان خاطرى خد 100 جنيه مصنعيه + 25 منظف رشاشات + 10 جنيه اكراميه
كده التكلفه 135 جنيه + 70 + 35 = 240 جنيه
كله ده خلص بعد 4 ساعات عمل و قبلها ساعه فى البنزينه
وانا مروح ببص على العداد لقيت مؤشر البنزين عند نفس العلامه اللى كان عندها اقبل ماادخل البنزينه طبعا اكيد بعد كل ده و صلكم طبيعه شعورى و انا داخل البيت امبارح
الله يخرب بيت البنزين المغشوش و الضمائر الميته اللى بتعمل كده
انا كتبت الموضوع ده علشان الافاده و ان الناس تاخذ بالها فى اختيار البنزينه
كمان ياريت اللى يعرف طريقه للكشف عن البنزين المغشوش قبل وضعه فى العربيه يقولنا

السلام عليكم و رحمة الله و بركاته

ايييييييييييييييييه القرف داااااااااااااااه ؟؟؟

أنا على فكرة, مش ضد أنهم يغشوا البنزين لما يكون فى البلد أزمة بنزين, أنا بس عاوزهم, أما ييجوا يغشوه, مايحطوش ميه كتير, عشان يدوب العربية تكح كحتين و تكمل, مش تقف خالص و تبوظ !!!!!!!!!!!

أقول ايه بس, أخاف أتكلم لأتوقف.