الموضوع: يا جماعه عاوزين تقييم للسوناتا 2008

موجودة مع كذا عضو ومنهم الاخ سمعة

طب يا ريت حد يرد عليا منهم.

بالنسبة لتقييم السوناتا:
أولا العربية معايا بقالها اكتر من 11 شهر (قربت على سنة) و ماشى بيها حوالى 24000كم دلوقتى , عملت صيانة ال1000-5000-10000-15000-20000 فى ابو رواش.
عربيتى 2400cc
العربية فعلا ممتازة , لحد دلوقتى الحاجة الوحيدة اللى اتغيرت هى تيل الفرامل و دا طبيعى جدا تغيره يعنى مش عيب صناعة و هو تمنه 1000 جنيه بالضريبة و التركيب و طبعا السعر دا مبالغ فيه و غيرت غطا التابلوه فى الاول بسبب مشكلة كانت فى اول دفعة بس المشكلة دى اتحلت فى الدفعات اللى بعد كدا (تقدر تشوفها فى اى معرض) و المشكلة دى كانت فى ال2400cc بس مش ال2000cc و التابلوه كان بارز كدا ناحية الحتة اللى جنب السواق.
مفيش اى مشاكل او اعطال لحد دلوقتى خالص.
عزل الصوت رهيب داخل العربية و صوت الموتور مش مسموع خالص جوه العربية حتى على سرعات عالية اوى زى 160 - 180 .
استهلاك البنزين فى ال2400cc عالى شوية و دا برده طبيعى بسبب قوة الموتور , العربية بتستهلك حوالى 60 لتر فى ال 580 كيلو حاجة كدا.
العربية انتشرت بشكل رهيب و اقدر اتوقع ان سعر اعادة البيع هيكون ممتاز فى ال2000 و اقل فى ال2400 بسبب الضريبة الجديدة.
تكييف العربية قوى جدا جدااااا بدرجة غريبة لدرجة انى باطر اقفله و افتح الشباك و اوجهه بعيد عنى فى عز الصيف لان العربية بتبقى تلج او اوطى قوة التوزيع و اعلى درجة الحرارة.
العربية عالية جدا (و خصوصا ان الجنط عندى 17 كمان) و مبتحكش فى المطبات و الكلام دا.
فى السحب و الكلام دا طبعا العربية مش عايزة كلام 2400cc او 2000cc يعنى اقوى بكتيلر اوى اوى اوى من بقية العربيات اللى بنفس تمنها فى السوق.
بالنسبة لابعاد العربية فهى ضخمة بس سواقتها سهلة جدا و سهل تشوف ابعادها.
العربية ملهاش منافسين فى مصر اساسا لان منافسينها بينزلوا ب 400 الف على الاقل و رخصها دا بسبب انها بتتجمع فى مصر.
شكلا العربية فخمة جدا جدا و فى رايى الشخصى احلى بكتير من العربيات اللى فى نفس تمنها.
العربية حسب كلام مهندس كبير ثقة فى غبور مفيهاش مكونات مصرية غير حاجات بسيطة اوى(حتى الكاسيت مستورد) و التقفيل المصرى فى عربيتى كويس اوى.
بالنسبة لاسعار قطع الغيار اتصل ب 35390760 و اقولهم حولونى على مبيعات قطع الغيار و اسال على سعر اى حاجة عايز تعرف تمنها لو مش ناوى تامن عليها.
من ناحية الوسع العربية ممكن 5 افيال يقعدوا فيها مستريحين (حتة مبالغة) , بس بجد ممكن 5 اشخاص حتى لو كانوا ضخمين يقعدوا فيها مستريحين.
ضمان العربية 3 سنين او 100000 كيلو.
لحد دلوقتى الخدمة فى مركز ابو رواش ممتازة و مشفتش منهم اى مشاكل خالص.
على فكرة انا سافرت بالعربية لغاية الساحل الشمالى و استخدمتها هناك طول اليوم و رجعت المغرب بيها و طول الطريق مقللتش عن 140 خالص و على طريق وادى النطرون من 160-180 بدون اى مبالغة و مردتش ازود عن كدا مع ان العربية جايبة بسهولة جدا علشان طرق مصر متستحملش 200 و لا اكتر.
على فكرة العربية كانت ممتازة و لا سمعت اى صوت طول الطريق و كانت نعمة جدا على السرعة العالية.
من ناحية الامكانيات ال2000cc فيها :
موتور 2000cc - 141 حصان
جنوط 16-multifunction-cd mp3-فرش جلد-parking sensors-للرحلات computer -ستارة خلفية (مش كهرباء)-airbag للسائق-abs-ebd.
اما ال2400 : 2400cc - 161 حصان.
و بيزيد فيها عن ال2000cc :
فرش جلد بيج - تابلوه خشب - كرسى السائق كهرباء -عجلة قيادة بالخشب - 2 airbags - راديو و كاسيت mp3 و وصلة usb(مش عارف دى فى ال2000 كمان و لا لأ).
ال 2000 المانيوال سعرها 160000 , اوتوماتيك : 165000
ال2400 الاوتوماتيك سعرها : 185000
الضريبة 1000 جنيه بس على ال2000cc اما على ال2400 ضريبة الترخيص السنوية 3700 و بتقل 5% كل سنة.
بالرغم من الفرق بين سعر ال2000 و ال2400 و الضريبة الجديدة انا شايف العربية ال2400 تستاهل اكتر من سعرها كمان.
فعلا و الله من غير مبالغة انا مش شايف اى ميزة فى السوناتا المستوردة عن المجمعة محليا (غير طبعا الحاجات اللى بيشيلوها زى بدل 6 airbags بيحطوا 2 بس) و قصدى من حيث الجودة .
لو بتقارنها بالاوكتافيا و الجيتا و الفكترا و الافنسيس مفيش وجه مقارنة اساسا , السوناتا تكتسح فى كل حاجة.
انا عامل موضوع هنا عن السوناتا للتعريف بيها و منافسينها (بره مصر) علشان فى ناس بتقول انها بتنافس الجيتا او الاوكتافيا.
http://www.nilemotors.net/Nile/showthread.php?t=18005

لو فى اى سؤال اتفضل اسئله

السوناتا عربيه محترمه جددددددا

و غير الكنترول و الضفيره في الضمان... بس ليه؟!!! ليه اغير الكنترول و الضفيره؟!!

في التوكيل قالولو ان دي اول مره تحصل حاجه زي كده.. ارجو انها تكون حاله فرديه و متتكررش.

الصراحة اول مرة اسمع حاجة كده , ممكن تكون فردية بس برده اسال كويس اوى قبل متشترى , انا بتكلم عن تجربتى الشخصية.

معلش سؤال يعنى ايه الضفيرة؟ و الكنترول؟

الف الف شكر علي التقييم الرائع ده.علي فكره انا عايش في سويسرا و السوناتا هنا نفس الفئه السعريه للهوندا الاكورد مثلا بس مش عارف ليه مبالغين اوي في سعر الاكورد كده في مصر مع اني والله مقتنع جدا بالسوناتا كعربيه محترمه و سعرها رائع علي كل امكانياتها دي.