الموضوع: تقرير شامل عن البونتو .. كل ما تريد معرفته

تعليق بسيط على نقطة ذكرها الأستاذ سيات لافر :

"
اقتباس:
أرسل أصلا بواسطة Seatlover مشاهدة المشاركات

والهيونداى اللى مش عاجبة حضرتك اثبتت نفسها هنا قبل برة
وكفاية ان مشاكلها بتنحصر فى كاسيت بيعلق و سنتر بيقفل لوحدة "

من شهرين بس, واحد صحبى كان بيعمل عمرة لعربية هيونداى اكسل و هى عاملة 130 الف فقط!!!
مع التنويه انو مش من هواة القرص و لا الجرى, و السيارة كانت مع أبيه و هو استلمها من سنة بس, ده غير انو العربية متغيرلها اسطوانة عند 90 ألف.
بالذمة دى عربية؟!! و تقولى سنتر و كاسيت؟!!!
أنا كان معايا 128, بعتها عند 200 الف, و مكنش فيه ذرة هبو زيت بتطلع من الموتور!
و مش متغيرلها اسطوانة, و على فكرة مكنتش بتسخن الا لما فيوز المروحة يضرب, لأن الولاعة كانت بايظة, و متركبة مع فيوز المروحة.
دايهاتسو ايه بس الى بتتكلم عليها, و هيونداى ايه و سيات ايه, بتقارنهم مع مؤسسة تضم ماركتين رياضيتين الأغلى و الأشهر فى العالم؟! و شركة لصناعة التقنيات المتقدمة اسمها ماجنيتى ماريللى؟
فيات شركة مطورة للتقنيات و الأبحاث, أما هيونداى و دايهاتسو فشركتين تعيش على قوت الأخرين.
و سمعة فيات و لانسيا الرياضية لا تضاهى, و هى السيارات الوحيدة فى العالم التى تجمع بين الطابع المدنى و الأداء الرياضى المتفوق, و رائدة فى تطوير التقنيات المبتكرة التى تحسن من أداء السيارة.

شكرا لكل من السادة الأفاضل
حبيبنا الكبير ........... حازم خضر الجميل
ملك البيجو ........... حبيبي ......... هاني فلاير
استاذ و حبيب الفيات .............. المهندس فادي
العسل محمد ابيزا
و الأستاذ مُهاب على التوضيح مشكور
و حبيبي الأستاذ سيات لافر .... أو عاشق السيات كما أحب أن أطلق عليه بالعربية

أولا يا أستاذ سيات لافر ............ الفيات مش بيسخن زي ما أنت بتقول
الفيات اللي بيسخن هو 128 أو 127 .... 124 أو 125 و بعض موديلات الفيات من السيينا فقط
هاتلي موديل تاني بيسخن ؟؟
البونتو عمرها ما سخنت .................. التبمرا مش بتسخن
و على فكرة أنا بس عايز أضيف حاجة
فيات شركة كبيرة و لديها تنوع كبير جدا و موديلات كثيرة جدا و التنوع ده كبير و بالتالي بتلاقي حاجات مش موجودة في ماركات تانية
يبقى لما يكون فيه تنوع كبير من فيات بالطريقة دي و يطلع منهم كام عربية تصميم الستينيات و السبعينيات بتسخن
يبقى المفروض نكون عادلين و منقولش على الماركة كلها بتسخن ...........
131 .......... 132 ........ ريجاتا .......... شاهين .......... دوجان .......... بونتو ......... أونو ............ تمبرا ......... تيبو ........... برافو ........... باندا .........

حد يقولي أي عربية من دول بتسخن ؟؟؟؟؟؟؟؟؟؟؟؟؟؟؟؟
حيث أني مجرب الآتي تجربة شخصية
131 .......... 132 ........... شاهين .......... ريجاتا ........... بونتو ..........
و الباقي مع أقرباء أو أصحاب ........... و محدش بيشتكي نهائي من موضوع السخونة خالص في الموديلات دي

----------------------------------------------------------

بالنسبة لنقطة الثبات
أي عربية صغيرة مثل البونتو كلاسيك ...... بولو ....ابيزا القديم ...... سيريون ........ نيسان ميكرا ..........
العربيات اللي فاتت ثباتها ضعيف
طيب يعني أيه ثبات ضعيف ؟؟؟؟
يعني أنا لما بقول إن البونتو بعد 110 ثباتها ضعيف مش معنى الكلام أنها هاتطير بس أنا بقارن ثبات عربية صغيرة زي البونتو أو الإبيزا أو الميكرا ( لأن دول أنا أتملكتهم من قبل )
يبقى بقارن ثبات دول بثبات عربية ثابته زي الجين 2 مثلا أو البيجو 504 أو 505
الفرق بيتحس جامد لما تكون راكب في بونتو أو أبيزا و تنزل تركب عربية ثابتة على الأرض
أرجوا أنكم تكونوا فهمتم أنا أقصد أيه :)
و ده مش عيب في العربيات اللي فاتت علشان هي أساسا عربيات مدن و ليست سيارات للسفر الطويل

زي الياريس و السيتي ... مثلا .......... دي سيارات مدن بالأساس

و على فكرة البونتو و الإبيزا ثبات واحد و عن تجربة إمتلاك
أما الجراند فثباتها أعلى من البونتو


أستاذ محمد ابيزا

قولي بتحس بأيه لما تكون راكب ابيزا و تنزل تركب مرسيدس و تمشي على سرعة 120 مثلا ؟؟؟؟؟؟؟

--------------------------------------------------------------------------

بالنسبة لموضوع الصناعة الألماني
يا جماعة ألمانيا اللي هي ألمانيا ........... هي ثلاثة شركات بس
مرسيدس .......... بي إم ............ أودي

أما فولكس ............ و أوبل
فهما في مستوى الشركات الأوروبية الأخرى و بل و تتفوق عليهم بعض الشركات الأخرى
يعني مثلا فولفو أحسن من الشركتين دول ........... بيجو بتنتج منتجات رائعة و لديها ما هو أفضل منهم ...........
هما بس حظهم الحلو أن وجودهم في ألمانيا و لكنهم مستوى أخر من الألماني ( مستوى ليس قليل ) و لكنه ليس الذي نطلق عليه المقولة المصرية
"دي ألماني "
و الله يا جماعة لو تسمعوا الكلام اللي بيتقال على الشركتين دول في أوروبا هاتعرفوا أنا بتكلم على أيه ؟؟؟؟

طيب انا هاوضح أكتر

السوق البريطاني و الفرنسي

فولكس نزل منها موديل من البولو و كان فيه عيب في الدهان
و الدهان كان بيقشر من أول 6 شهور ........... و تم استرجاع سيارات كثيرة
و الدهان أيضا كان ضعيف جدا و بيصدي بسرعة
هل الكلام ده يطلع من مرسيدس أو بي إم ؟؟؟
فحرام نقول على عربية ب 50 ألف أو حتى 100 ألف جنيه و نقارنها بالماني و نقول دي ألماني لمجرد صنعها في ألمانيا
أه هي مصنوعة في ألمانيا و لكنها ليست الألماني المقصود به الكلام

كل عربية و لها سعر و كل سعر و له جودة
اللي عمل إسم ألمانيا في صناعة السيارات
ليس فولكس ............. و ليس أوبل
اللي صنع أسم ألمانيا في مصر و في العالم كله
هما عربيتين بالأخص
مرسيدس ....................... و بي إم .......... و جاءت بعدهم أودي
هي دي الثلاثة ماركات اللي خلوا الناس تقول ........ ده ألماني

-----------------------------------------
ملحوظة أخيرة
يوجد قطع غيار للبونتو من ألمانيا
و لكن أفضل قطع غيار و اغلاها سعرا هي الإيطالي ......... و ليس الألماني ..

------------------------------------

بالمناسبة أكبر مبيعات للهاتش باك كما قلت سابقا في أوروربا
هي فيات و بيجو ........... و بعدين ستروين ......... و بعدين فولكس و بعدين سيات

المشاركة الأصلية كتبت بواسطة sharky

دلوقتى يا جماعة إحنا محتاجين نعرف برد عملى هل فعلا مواتير الفيات بتسخن فعلا كما يقال أم لا ؟

فيات عانت فى الستينات و السبعينات خصوصا من انتقادات طالت اعتمادية سياراتها, خاصة سيارات مثل ال128 و ال127, و لكن بعيدا عن ال131 و ال132.
و رغم أن هذه الانتقادات كانت فيها الكثير من المبالغة, كما أنها لم تؤثر كثيرا على مبيعات هذه السيارات, لأن تكنولوجيا هذه السيارات كانت الأفضل فى وقتها, و أداءها دائما هو الأفضل فى الفئة الاقتصادية.
بعدها قامت فيات بتطوير سياراتها لتصبح أكثر اعتمادية, و بدأت ثورة التصحيح تلك من الثمانينات, لتصل فى النهاية الى أوائل التسعينات حيث أصبحت سيارات فيات تتجاوز فى اعتماديتها بعض السيارات الأوروبية الشهيرة, فمثلا سمعة البونتو أفضل من البولو على صعيد الاعتمادية, و سمعة البرافا مثلا أفضل كثيرا من البيجو 307.
أما موضوع السخونة ده فمبالغ فيه طبعا, سيارة فيات بتسخن فقط اذا ما حدث شىء فى دورة التبريد, لكن مفيش عربية بطبيعتها بتسخن الا البيجو القديمة, و ده أول ما بيجو نزلت مصر.
باعتبارى احدى المالكين السابقين لل128 فأقدر أقولك الأتى :
- العربية سخنت منى مرتين بالعدد فى حوالى 3 سنين :
أول مرة فيوز المروحة ضرب, لأنه كان متركب مع فيوز ولاعة السجائر, و لما جيت أولع الولاعة كانت بايظة و عملت ماس, و حرقت الفيوز و توقفت مروحة الرادياتير عن العمل.
المرة التانية موتور المروحة اتحرق.

الملحوظة التانية انو عربيات فيات دورة مفتوحة, يعنى الرادياتير ليه غطا بسوسته, و الفكرة من ده هو السماح بخروج بخار المياه, و ده لأن محركات فيات مصممة للعمل على درجات حرارة مرتفعة عشان الكفاءة, يعنى بتكسب كفاءة و بتخسر بعض المليمترات من المياه كل شهر, فلازم نتذكر دائما انو فيات سيارة ايطالية, و السيارة الايطالية تقدم الأداء على كل شىء أخر حتى الاعتمادية.
لكن ده ميمنعش انو سيارات فيات معمرة جدا, فمثلا عربيات زى هيونداى أو سيريون ممكن تكون اعتمادية فى الخمس سنين الأولى فقط, لكن بعد كده بتنهار تماما و تعامل كأى سيارة 128 بقالها 30 سنة ماشية.
مثال بسيط, انظروا الى السوزوكى سويفت الأن و حالتها؟! و الاكسل؟ و حتى الأكسنت الى من التسعينات.
أما بالنسبة للشاهين, فأنا عايز اقولك انى بقالى 45 الف و معرفش غطا المحرك بيتفتح منين.

المشاركة الأصلية كتبت بواسطة Ahmed Anwer

تعليق بسيط بس يا باشمهندس فادي ،،

عشان كان ليا خبرة في الموضوع ده ،،

من فترة كنت عايز اشتري عربية مستعملة ،، في حدود العشرينات ،،

و سألت واحد قريبي خبرة كبيرة في السيارات ،،

قالي لفظا دور علي اكسيل هاتشباك ،،

ليه ،،قاللي نصا ،،،،

الفيات و توابعه دي أكبر مقلب شربته مصر لمدة ثلاثين سنة

و قعد يحكيلي علي عربيته الإكسيل ، اللي فضل بيها ثلاث سنين طحن مغيرشي غير مساعد ،، و الإعجاز انها مبتسخنشي و مبيضربشي فيها البارومة و شاسيها مبيفتحشي لوحده

و فرق الإعتمادية بين الكوري في التسعينات و الفيات القديم سنوات ضوئية ،،،

أنا بحب فيات جدا بس ثقافيا أكثر ،، مش كمنتج ،،

و معنديش اي خلفية بالفيات الحديث أكيد اتحسنوا ،،

يا أستاذ أحمد, حرام تقارن بين الفيات القديم و هيونداى التسعينات,
الفيات 128 عربية تم تصميمها سنة 1969, مينفعش تقارنها مثلا بسيارة من التسعينات و تقولى بتعمل بارومة, نظرا لأن طرق الدهان اتطورت و حاليا صعب أى عربية تعمل بارومة بسبب طرق معالجة الدهان الجديدة, و على فكرة أشهر سيارة كانت بتعمل بارومة هى أودى, و لحد النهاردة سمعتها وحشة فى الموضوع ده, و لذلك بتقدم اودى 10 سنوات ضمان ضد البارومة حتى الأن للتخلص من تلك السمعة.
و لا تنسى أن معظم سيارات فيات التى وصلتنا مصنعة خارج مصنع فيات الأساسى, مثلا ال128 بداية من سنة 1989 أصبحت سيارة يوغوسلافية و ليس ايطالية.
و أعتقد ان أفضل مصنع تابع لفيات خارج ايطاليا هو توفاش التركية, الذى يقوم بصنع الشاهين و الباليو و اللينيا.
لكن ألم تسأل نفسك, ليه سعر عربية فيات 131 من السبعينات يوازى تقريبا سعر عربية هيونداى اكسل من التسعينات؟ رغم أن فرق 20 سنة كبير جدا فى عمر أى سيارة؟
ألا يدل هذا لا شىء؟
يدل على أن اعتمادية سيارة فيات بعد 30 سنة هى نفسها اعتمادية سيارة هيونداى بعد 10 سنوات على الأكثر, و ده لأن الفيات معمر أكتر.
و على فكرة مفيش عربية فيات شاسيها بيفتح غير ال128 فقط, و مفيش عربية فيات بتاكلها البارومة لو تم العناية بها جيدا.