الموضوع: ايه الموقف القانونى من ابراج تقوية شبكات المحمول

المشاركة الأصلية كتبت بواسطة mody112

السلام عليكم
انا عارف ان الموضوع القديم لكن انا عندى نفس المشكلة ويمكن اكتر
العمارة اللى انا فيها صاحبها عمل عقد مع شركة محمول لعمل شبكة تقوية فوق العمارة واحنا السكان عملنا معاه مشكلة لكن مفيش فايدة هو مصمم على انه يركبها برضه بس قالنا ان ارتفاع البرج هيكون 15 م فوق السطوح وبكده مش هيبقى فى اى ضرر علينا على حسب كلامه انتو ايه رايكو فى الكلام ده وواضح انه مصمم على التركيب لان باين ان فيها مصلحة جامدة جدا ليه هو واحنا كمان مستاجرين ومش ملاك وبصراحة انا خايف على نفسى وعلى عيالى وانا ساكن فى الدور التانى والعمارة ارتفاعها 5 ادوار يعنى فوقيه 3 ادوار غير ارتفاع البرج بتاع المحمول افيدونى افادكم الله هل فى ضرر من الموضوع ده وهل يوجد اجراء قانونى لمنع التركيب ؟

على ضمانتي الشخصية ماتخافش

ده مش مفاعل نووي عشان يخترق خرسانة ارضية السطوح و خرسانات 3 ادوار فوقيك بالاضافة الى ارتفاع البرج

بالعكس هتلاقي الموبايلات بقت بتشتغل بطاقة اقل و ده احسن لصحتك و هتلاقي بطارية الموبايل بتعيش مدة طويلة

المشاركة الأصلية كتبت بواسطة mody112

شكرا على اهتمامك وردك السريع بالرغم من الموضوع قديم شويتين
لكن انا مش مهم عندى الموبايل يشتغل بطاقة اقل ولا اكتر المهم الاثار الناجمة عن مثل هذه الشبكات واللى الانترنت مليان بيها لكن للاسف مفيش دليل مادى عليها واحنا سكان العقار كلنا حاولنا ندور على مستند مادى من وزارة الصحة او البيئة على ان الشبكات دى ليها اضرار وطبعا فشلنا لكن اللى انا فاهمه ان المجال الكهرومغناطيسي بيخترق الخرسانات وغيره يعنى هيوصلك بكل سهولة وبعدين كمان انت لو حبيت تسيب الشقة مين هييجى يسكن مكانك فى شقة فوقها شبكة محمول

ركز معايا

اما تبقى المحطة قريبة و الموبايل يشتغل بطاقة اقل ده صحي ليك لان الموبايل هو اللي جنب الجمجمة فاما يبذل جهد اقل يبقى احسن لك

الانترنت برضه بيقول اللي ما يبعتش الرسالة اللي جت له عشرميت مرة بيتسخط قرد ...... لو مش بحث علمي من مصدر علمي موثوق زي الجمعية الامريكية للسرطان او جامعة جونز هوبكنز مثلا (و مفيش مصدر موثوق لقى علاقة بين المحطات و السرطان)

المجال الكهرومغناطيسي مش بيخترق الخرسانات "بكل سهولة" على حد تعبير حضرتك و الا كانوا عملوا محطة كبيرة في وسط البلد و وصلت لكل الموبايلات و خلاص .....

على فكرة انت حواليك مجالات كهرومغناطيسية في كل حتى ...... ارسال التليفزيون و الراديو (اللي موجودين من قبل ما ناس مننا هنا تتولد) و لاسلكي الشرطة و الواي فاي و لاسلكي البيت الخ الخ الخ

المخطة بتاعة المحمول اساسا تغطيتها يادوبك كام كيلو يعني بسيطة ......

مفيش مجال كهرومغناطيسي من محطة محمول بالقوة انه يمشي 15 متر في الهوا و بعدها يخترق كل الخرسانات دي


اهم حاجة حاول ما تخشش في ال panic mode و فكر بشكل علمي هتلاقي الموضوع بسيط