السلام عليكم ورحمة الله وبركاته

بقالي مدة عايز اغير زيت الفتيس عندي في الياريس

سمعت انه بيتغير على 40.000 وكمان قريت في كتالوج العربية انه بيتغير كل 40 الف كيلو او 24 شهر ايهما اقرب

ولان العربية حاليا عاملة 43 الف كيلو وموديل 2007 يعني في كلتا الاحوال لازم الزيت يتغير خصوصا اني بحرق على الغيارات كتير

ودلوقتي حاسس ان استجابة العربية للكيك داون مابقتش زي الاول

فقلت اتصل بالتوكيل اغير الزيت هناك نظرا لان موضوع زيت الاتوماتيك ده ناس كتير كل واحد بينصح بنوع زيت معين فقلت اغير في التوكيل عشان ابقى مطمن

اتصلت بفرع تويوتا اللى في ابورواش قلتله عايز احجز تغيير زيت الفتيس لتويوتا ياريس اتوماتيك

قالي ماينفعش قلتله يعني ايه ؟؟ قالي يعني ماينفعش العربية تدخل عشان تغيير زيت فتيس بس هو بيتعمل مع الصيانة لكن يتغير لوحده ماينفعش !!

قلتله ازاي قالي يعني حضرتك تيجي تعمل صيانة نغيرلك في الصيانة الزيت لكن ماينفعش العربية تدخل مخصوص عشان تغير زيت فتيس

حسيت اني هدخل معاه في جدل عقيم مش هيوصلني لحاجة فقلت اقفل السكة بدل ماعمل خناقة معاه

اتصلت بعدها بمركز خدمة تويوتا اجيبت في شارع السودان

مركز معتمد قلت اشوف يمكن ينفع فيه

المهم اتصلت بيه قلتله عايز اغير زيت فتيس تويوتا ياريس

قالي حضرتك اول مرة تغيره ؟ قلتله اه هي العربية عاملة 40 الف ودي اول مرة

قالي لا لسه بدري يافندم بيتغير عند 80 الف !!

قلتله بس العربية بقالها خمس سنين موديل 2007 يعني اكيد الزيت فقد خواصه !!

قالي حضرتك تشرفنا بكرة نكشفلك على الزيت ونشوف اذا كان محتاج يتغير ولا لاء

فانتو ايه رايكم ؟؟؟ اغيره وخلاص ولا لو قالي انه تمام استنى لحد ال 80 !! ؟ ولو اني حاسس انه محتاج يتغير ؟؟