أحمد لانشيا جهبز الجهابزة هو ينفع نجم سينمائى مش ميكانيكى ( علشان وسيم شوية هههههه ) ، الناس فى الورشة عنده بيقولوله يا باش مهندس ومعلوماتى عنه أنه كان فى ايطاليا 10 سنوات وهناك عرف كل حاجة عن الفيات والفاروميو ولانشيا ولما رجع فتح مركز صيانة امام نادى الصيد فى الاسكندرية لما تروح هناك تحس أن شركة فيات موصلة خط أنتاج السيينا على أحمد لانشيا هههههههههه بمعنى كل لما تروح هناك تلاقى 4 أو 5 أو 6 عربيات سيينا جوة وبرة الورشة ودى حاجة تخلى الواحد يثق فى المكان علشان بتحس أنه متخصص فى العربية دى ، لكن بكل أسف ( بلح )
بالنسبة للناس اللى شغالة عنده فهما مش صنايعية ، هما طلبة تدريب مهنى بتدرب فى الورشة عنده ، ودى حاجة مش كويسة علشان الطالب كل همه أنه يعدى وقته وخلاص ومش مهم عربيات الناس ، يعنى مفيش ولا واحد عنده بيفهم كلهم طلبة مش فاهمة وساعة التجميع بعد عملية الاصلاح فى حجات كتير مش بتتركب فى مكانها مثل مسامير وكلبسات وحجات كتير وممكن ينسوا المقص فى بطن المريض ويخيط العملية على كدة هههههههههههه
المهم بدايتى مع أحمد لانشيا
كنت بلف على الميكانيكية علشان كان عداد rpm بيعلا لوحده ودى عملتلى مشكلة لدرجة أنى خبط العربية امام المنزل فى شجرة بسبب الموضوع دة
كنت عند واحد ميكانيكى أسمه محمد جلال فى بحرى كان بعتنى لية شيكوكو بتاع قطع الغيار اللى فى شارع صلاح الدين ( شارع متخصص فى قطع غيار السيارات فى الاسكندرية )
محمد جلال قالى هبعتك عند واحد علشان العربية محتاجة تتحط على الجهاز وانا معنديش جهاز ، فبعتنى عند أحمد لانشيا الجهبز ، لما روحت هناك شوفت عربيات السيينا كتير عنده ودة خلانى أطمع وأفضل معاه للاخر علشان تصورت أنه متخصص فى الموديل دة
المهم اول لما شاف العربية قال أنا هحطها على الجهاز بس انهاردة ونشوف فيها اية علشان مفيش وقت اشتغل فيها انهاردة ، قولت ماشى مفيش مشكلة
حطها على الجهاز ومكنش فى أعطال باينة على الجهاز
قالى هتهالى يوم تانى من اوله نشوف فيها اية ، قولت ماشى
روحت فى يوم تانى من اول اليوم اول حاجة قال ان البوجيهات اللى راكبة مش بتاعتها ولازم تتغير ، قولت غير مع أن اللى راكبة كانت جديدة معملتش 100 ك
( لما سبت لانشيا ورحت لميكانيكى ناتى قال ان البوجيهات اللى راكبة مش بتاعة العربية وطلعت 4 شمعة ، تقريباً كانت بتاعة الفاروميو )
المهم غير البوجيهات وفك سير التقسيمة وعمل فيها دكتور وركبه وقال كدة تمام
وشغل لقى المشكلة لسة موجودة فجاب اسبرى تنظيف ونظف البوابة لقى بردو المشكلة لسة موجودة
المهم الجهبز قال أن المشكلة فى الايدل ، والايدل فى السيينا 1600 بيكون هو وبوابة البنزين حتة واحدة بكل اسف وبكدة البوابة لازم تتغير ، اوكى يا باش مهندس نغير بكام البوابة ، قالى هتصل بمصر واشوف سعرها بكام دلوقتى ( على أساس أنها دهب وسعرها بيطلع وينزل كل شوية ههههههههه )
المهم اتصل وقال هتكون بـ 1950 تقريباً مش فاكر الرقم بالظبط علشان هو قال أن بلية الشداد بتعمل صفارة ولازم تتغير مع أنى مكنتش سامع صوت الصفارة دة ، قولت أوكى يعنى الحساب كله كام بالمصنعية ، قال هيعمل 2350 جنية بس مش هيكون أنهاردة الكلام دة انا هبعت اجيب الحاجة من مصر ونخلينا على تليفون
قولت ماشى مفيش مشكله بس أنت متأكد أن دى المشكلة علشان المبلغ كبير ( 2350 ) ومينفعش فيها يمكن يكون هو ويمكن ميكونش هو ، قال لا مفيش يمكن هو دة العيب
جاب البوابة والبلية بتاعت الشداد وركب الحاجة وحط العربية على الكمبيوتر وأشتغلت العربية كويس حوالى أسبوع ورجعت تانى نفس المشكلة وبصورة أكبر
رجعت تانى وقلتله المشكلة لسة موجودة ، قال لا أنا قولتلك ارجعلى بعد اسبوع ( مع العلم هو مقالش اى حاجة )
قولتله وأنا بضحك ( وأنا رجعت تانى اهو يا باش مهندس )
حط العربية تانى على الجهاز ولعب فى شوية زراير وقال كدة تمام وفعلا العربية ساعتها كانت شغالة كويس
مشيت بالعربية وأنا فى السكة رجعت تانى المشكلة وبقى صوت الموتور بيعلا زى الأول ومكنش ينفع ارجع تانى فى نفس اليوم
ومن يومها أصبح يوم الاجازة بتاعى مخصوص لـ أحمد لانشيا وبكون عنده فى الورشة ههههههههههه علشان بروح كل اسبوع بنفس المشكلة
وهو كل اللى بيعمله يفك سير التقسيمة ويركبه تانى ويقولى السير مكنش مظبوط ( طيب ما أنت اللى مركبه المرة اللى فاتت )
وفى مرة من المرات البهوات اللى بتقفل العربية نسو مسامير بتاعت الفبرة اللى بتقفل على مجموعة السيور اللى خلف سير التقسيمة ولما مشيت بالعربية اتكسرت من احتكاك السيور والطارات اللى راكب عليها السيور
المهم أخر مرة قولتله العربية بتكون كويسة وأنا هنا ولما بمشى وأنا فى السكة مروح بترجع تاتى ، لو رجعت المشكلة تانى هتكون الخطوة اللى جاية أية ؟ علشان أن اتخنقت
قال هفك الموتور أشوف فية أية ، أنا سمعت كدة وأخدت قرارى أنى مش راجع تانى عنده علشان انا بشوف الاستهتار بحاجة الناس بيكون عامل ازاى عنده ( دة لما بكون موجود الحاجة بتتقفل غلط مبالك بقى لما تسيب العربية ويتفك الموتور بتاعها هيكون الكلام ازاى ) .
الخلاصة :-
تركيب بوجيهات مش بتاعة العربية علشان يشغل بضاعة عنده ويبعها
تغير بوابة البنزين وبلية الشداد بـ 2350 أونطة وطلع فى الأخر المشكلة مش منهم وكانت المشكلة فى كنترول الكارتة واللى عرفلى العيب ميكانيكى تانى وجرب بكارتة من عنده وظبط العربية
عدم التقفيل الجيد بعد الاصلاح مما يؤدى الى تلف اجزاء بالعربية
ملحوظة :- بلية الشداد اللى جبهالى وقالى أنها أصلية كانت هى السبب فى انها تغير تقسيمة السير اللى كان كل شوية يقولى مش مظبوط ، وغيرتها وحطيت القديمة اللى هو قال مش نافعة وشغالة معايا لحد دلوقتى ومفيهاش مشكلة ( حسبنا الله ونعم الوكيل )
دى كانت حكايتى مع الجهبز أحمد لانشيا وعلشان كدة أنا بنصح أى شخص عدم الذهاب إلى هذا المكان
المفضلات