بسم الله الرحمن الرحيم

الحمد الله خططنا لرحلة سريعة مع الاصدقاء ليومين بس, طلعنا الخميس بعد الشغل و رجعنا امبارح باليل.

كنت محتاج فعلا شوية هواء و خروج عن القرف و الزحمة الي احنا فيها و الحمد الله مارينا كانت شبه فاضية تقريبا ... وكان الجو جميل جدا جدا جدا !

اول الرحلة كانت قرف ... كنت رايح اجيب واحد صاحبي من التجمع الخامس .. و في الطريق الطويل العريض ده الي بيربط التجمع بمدينة نصر ... الحمد الله الموبايل رن وهوا في جيبي .. جيت اطلعه .. وكنت ماشي بسرعة .. كسرت على عربية لانوس ... و طيرت مرايتي و مرايته :)

استحملت وابل من الشتائم طبعا .. و حمدت ربنا ... المراية سليمة بس الزجاج نفسه بتاعها وقع .. و الخبطة كانت مش اقل من 120-140 كم في الساعة ..

المهم تاخرت رحلة مارينا و بدات رحلة البحث عن مرايا الانترا 2012 و انا بما اني جديد في كوريا .. كنت متضايق علشان لاقيت سلكين مدلدلين من المرايا .. قلت بس كدة مش حعرف اتحكم فيها تاني ... المهم بعد مشاوير كتير و اختيارات بين تفصيل واحدة تحت السلم او شراء الاصلية ...
اكتشفت ان السلكين دول ببتوع السخان بتاع المرايا مش المحرك .. و للاسف ملقتش حد في مدينة نصر عنده المرايا الاصلية .. لضيق الوقت اشتريت بتاعت الكورولا 2010 و هي كانت اقرب واحدة ليا ب 100 جنيه !

المهم طلعنا على الطريق بعد مقابلة صديق بالجيتا ... انا كان اول مرة في حياتي اسافر لمارينا بعربيتي انا يعني .. فكنت حذر و خايف شوية بصراحة .

اخدنا الطريق لحد العلمين مابين 120 الى 140.
طريق العلمين خدناه كله 130 مثلا باسثناء بعض الحتت الي كان فيها مقطورات نايمة على اليمين و الشمال !! اضطريت ازود ل 160 ..

وصلنا الحمد الله ... العربية كنت مفولها في المهندسين ... وصلت للشاليه في مارينا ( 335 كم بالظبط) ب 55% من التانك لسة موجود.

الحمد الله الثبات لحد 160 كان ممتاز و التحكم في العربية و مطبات الهواء و القرف الي في طريق العلمين كله كان الحمد الله تحت السيطرة و محستش اني عايز اهدي او حاجة ..

الاضاءة ماشاء الله بصراحة كنت بفكر في الزينون .. مش محتاجه نهائي !
الفوجات و الاضاءة المتسوطة و العالية في طريق زي العلمين (مفيهوش لمبة باليل) كنت كاشف الطريق كويس جدا و سهلة المهمة جدا لواحد اول مرة يروح الطريق الهباب ده .

انا كنت قاطر الجيتا قدامي على اساس انه هو الخبير يعني في الطريق وبصراحة كان راجل فاهم جدا .. كذا مرة يلاقي حاجة في الشارع من كاوتش -رمل - كلب ميت مش عارف ايه .. بيديني اشارة قبلها بكتير علشان اتحرك معاه قبل ماللبسها انا ..
وانا بالمثل كذا مرة الدنيا زنقت عليه .. هديت كتير علشان يعرف يتفادى الي هو عايزه ..

في كذا مرة حرقنا جنب بعض كدة فوق ال 120 الى 180 و نزولا تاني ..في كل مرة كنت بطلع من مستريح جدا جدا بفرق كبير بس بهدي علشان نفضل مع بعض

المهم كانت رحلة الذهاب ظريفة و مريحة و وصلنا في وقت كويس جدا الحمد الله.
نزلت من العربية متوقع ااني ظهري يكون مقطوم .. الحمد الله الكرسي كان مريح نسبيا و حسيت بتنميل في رجلي الشمال بس الي مش بتسعمل .. و الري راكب جنبي معاه Audi A4 برده قالي الن الرحلة كانت مريحة فعلا و محسش بحاجة .

مفيش كلام عن السيراتو علشان ده زميل تاني بس جه لوحده متاخر بعدنا بساعتين لظروف عمله.

عملنا تدبيل ظريف بين سائق الجيتا وانا .. هو ساق عربيتي (الانترا 2012 اول فئة عاملة 9000 كم) و انا سقت عربيته (جيتا 2010 هايلاين خليجي عاملة 80 الف) في الطريق الي بيبربط بين المارينا و الساحل ...

المهم قطعنا مسافة 80 كم كاملة هو بعربيتي و انا بعربيته ...
ملاحظتي الوحيدة كانت على الجيتا (انا مش خبير سواقة يعني) ان الباور بتاعها اتقل بكتير مني و العزل اقل و الوسع او احساسي اني راكب في عربية واسعة اقل .. طبعا الكماليات حدث ولا حرج دي الهايلاين يعني :) العفشة محستش انها انشف او اخف و محستش برده انها اثبت او اقل ..

تعليقه هو بقى بعد "النزول" الملكي من "الجيتا الهايلاين" الى "الكوري الاوفلاين" LOL
انه محسش باي فرق بتاتا ! يعني مش فرق الالماني و الكلام اياه ... غير في 3 حاجات ..

+ تسارع الانترا افضل
+ عزل الانترا افضل
+ الانترا اوسع

- باور الجيتا اتقل (الانترا باور خفيف جدا)
- خامات الجيتا الهايلاين افضل
- كماليات طبعا اعلى (فرق الفئات)

و ده راجل Anti-Korean قديم يعني .. قالي بالحرف الواحد "مكنتش متوقع كدة بصراحة" :)
و انهى الركوبة بانه خمس 180 درجة بعربيتي و انا قلبي بيقف قدام الفيلا و احنا راجعين :)
وقالي لآ ظريفة LOL

بتاع السيراتة كان لسة عامل 2500 كم و مش عايز حد يقربلها طبعا فسيبناه في حاله :)

المهم بقى الانترا رفعت راسي في كل مطبات مارينا .. و الي ميعرفش مطبات مارينا .. هي عبارة عن جبل امسنتي ملون بالاصفر و الاسود و متكرر بنسبة مطب لكل 50 متر !! علشان محدش يجري !

الجيتا لازم بالطول و العرض و الورب علشان ميحكش (3 ركاب) و حكها برده مرتين تلاتة !
الالنترا في كل المطبات بوشي (3 ركاب) و الحمد الله محكتش ولا مرة !

رحلة العودة, قبل مانطلع اكتشفت اني حروح الي راكبين معايا ... واحد في المعادي و التاني في مصر الجديدة وانا في مدينة نصر .. فتوقعت اني حتبهدل سواقة في القاهرة فلازم ننجز الطريق بدري بدري

مع تعليق بتاع السيراتو ال 2012 ان عربيته مبتزيدش بعد ال 180 .. وانا بصراحة لا اعلم اخر عربيتي كام .. فقلنا للاسف نتهور شوية و احنا راجعين ..

خرجنا من بوابات العلمين الساعة 6:15 وصلت القاهرة الساعة 8:00 و التجمع الخامس الساعة 9 مصر الجديدة الساعة 10 ... بيتي تاني الساعة 10:45 ... يعتي تقريبا 5 ساعات قيادة متواصلة انهكتني بصراحة .. لان ساعتين اول اقل على طريق سريع .. و الباقي خناقة بين الدائري و المحور و شوارع مدينة نصر و مصر الجديدة المهببة !

المهم بعد البوابات .. انا طرت بصراحة و كنت عايز اشوف اخر عربيتي واخر السيراتو ايه ...
وصلت ل 185 بسهولة نسبية ... بعد ال 185 بدا تسارع العربية يقل بشكل كبير و مؤشر ال RPM بيزيد ببطئ شديد جدا ... المهم وصلت ل 195 بالظبط و السيراتو ورايا بفرق عربيتين مثلا .. كلمني في التيليفون بيقولي العربية مش بتعدي ال 190 قلتله وانا واقفة على 195 :)

تقريبا مؤشر ال RPM كان عند 5600 او 5900 مش فاكر الظبط.
المهم بعد تهدئات و جوالات .. وصلت ل 200 و السيراتو قافشة ورايا على 190 :)
السيراتو كان فيها راكبين و شنطتين و انا كان راكب معايا 3 و 3 شنط

بصراحة حسيت اني بهلك في العربية لاني مشيت مسافة لا تقل عن 70-80 كم و الRPM داخل على 6000 !!

بالنسبة للثبات بصراحة لحد 180 محستش خالص اني ماشي على السرعة دي .. لدرجة ان الي راكب جنبي و هو راكب Audi A4 بيقولي متدوس بنزين شوية .. بص على العداد .. قالي لآ زي الفل كدة خليك :)

كملت بقيت الطريق على 160 و كان في شوية مواقف استدعت كام حودة موفاجاة .. والحمد الله كان في مرة فيهم حودت جامد في رملة .. علشان واحدة ست ماشية على الشمال بكورولا و تقريبا ماشية على 80 او حاجة زي كدة .. كانت حتلبسني في الرمل .. الحمد الله العربية لم تنحرف او تلف او تفقد اي شيء من توازنها ..

طريق الصحراوي نفسه مقدرتش امشي في اكثر من 130 لانه مليان عربيات .. مش زحمة .. بس يستدعي بقى غرز و كلام كبير من ده و بصراحة معنديش قلب للحاجات دي الا للضرورة القصوى برده الحمد الله في كام موقف عند التحويلات الي قدام السليمانية .. الفرامل اسفعتني فيهم كتير جدا

وصلت بوابات القاهرة ... حوالي 300 كم .. كان فاضل في التانك حوالي 30% المرة دي ! طبعا علشان الحرق الرهيب الي حرقناه !

المهم كانت رحلة ظريفة .. اكتشفت فيها امكانيات السيارة نوعا ما .. و حمدت ربنا اكتر على اختياري لها ... طبعا كان ممكن تبقلى الرحلة اكثر طمأنينة لو فيه كماليات زي ال ABS/AIRBAGS و ASR/ESP بس على اد امكانيات الواحد والله العربية مخيبتش ..

وبمنتهى الامانة و بسواقة عربية زي الجيتا الي الناس محسساني اني كنت حركب وحش خرافي .. والله مارضي اركبها و لا اشتريها بعد الانترا .... بس طبعا حجيب الانترا بكماليات اعلى ..
وصاحب الجيتا نفسه بيفكر يجيب السوناتا الجديدة :)

باختصار شديد الفئة دي يعني .. الفروقات الجوهرية مش كبيرة زي ماكنت متخيل ... ممكن في فئات تانية يكون الفرق واضح و ممكن لأ الله اعلم.

بالنسبة للسيراتو مقدرتش احكم عليها كتير .. بس طبعا هي جردل كمالايات :) و المحرك و الثبات مشابه لدرجة كبيرة لانترا .. بس بصراحة الجلوس فيها في السفر على كلام الناس الي كانت راكبة معاه مش مريح اوي و الكراسي مش مريحة و مساحات الارجل الامامية و الخلفية يهيأ لهم انها في الالنترا اكبر.

و صورة للبحر على الماشي :)



واسف لاطالة :)