المشاركة الأصلية كتبت بواسطة m7md87
فى البداية طبعا نحب نشكر صاحب التقرير فعلا بذل مجهود غير عادى
ثانيا من ملاحظاتى على التقرير انه كان فعلا مش حنقول فيه دعاية عشان الاخ الفاضل ميزعلش بس ماكنش موضح العيوب الكبيرة اللى موجودة فى العربية وخصوصا فى الشكل والخامات قد ماكان موضح المميزات وطبعا برده ده لايقلل من المجهود المبدول فى التقرير ومرة تانية شكرا ليك
لكن احنا طبعا قبل ما بنفكر نشترى عربية بنحب نسأل الناس وناخد رأيهم واحيانا رأيهم ده ممكن يسبب اننا نشترى عربية وبعد فترة نكرهها ونزهق منها عشان اصلا ماكناش شارينها عن اقتناع من انفسنا فا عشان كده انصح كل من هو مقبل على شراء سيارة جديدة انو يروح يشوف السيارة بنفسه الاول ويتفحصها جيدا وينزل يسأل على قطع غيارها بنفسه موجودة ولا لا ويروح التوكيل يعرف اسعار الصيانات عاملة ايه ولو كان فى تيست دريف يكون احسن وفى النهاية يستخير ربنا ومفيش مشكلة انه ياخد براى الناس اللى حوليه واللى بيثق فلى رأيهم (لان ساعات فى ناس رأيها بيودى فى داهية) وممكن فى الاخر يشوف تقييمات مالكى السيارة وربنا يوفقنا جميعا
اما بالنسبة للنيسان انا نزلت شوفتها فى معرض الطارق اسماعيل كارفور العربية المفروض انها حلت المشكلة القديمة الخاصة بضيق الكنبة بل كمان تفوقت على معظم العربيات فى الوسع (طبعا ده عامل مهم بالنسبة لعائلة كبيرة ) بالنسبة للموتور 1500 تقييمات المالكين بتقول ان استهلاك البنزين قليل ولو الكلام ده مظبوط يبقى حل تانى مشكلة فى الموديل القديم كانت فعلا حريقة بنزين وده مش حينفع خالص مع ظروف البلد الايام دى اما بالنسبة لعوامل الامان فى الموديل ده طبعا متوفرةولكنها (ضرورية لاى حد بيسافر كتير لازم مايستغناش عنها) اما الناس اللى مش بتحب السرعة ومش بتسافر كتير فا مفيش مشكلة من عدم وجودها لانك ان شاء الله مش محتاجها اوى وياما فى ناس ركبت عربيات فيها اقصى وسائل الامان وعملت حوادث وماطلعتش منها على خير لان الاساس هو القيادة الحكيمة وعدم التهور ولكن زى ما قولت انها مش مهمة لناس ففى ناس تانية ظروف حياتها لازم يخليه مايستغناش عنها اما بالنسبة للتقفيل انا شايفه بصراحة سيئ جدا الخامات فقيرة اوى ومتفرقش عن اي عربية صينى مع احترامى للجميع وده بصراحه نقطة وحشة فى حق نيسان (تقفيل وخامات غير متوقعة من شركة يابانى)بالنسبة للجنط والكاوتش لازم يتغيروا فور استلام العربية لان اسوء شئ فى العربيات التجميع المصرى هى الكاوتش كارثى فعلا وممكن يؤدى الى حادث لاقدر الله عشان كده برده لازم اللى حيشترى العربية يسأل عن اسعار الجنوط والكاوتش لان ده يعتبر سعر مضاف عن تمن العربية وكمان الكاسيت والسماعات اعتقد مش حيكونوا كويسين( انا مجربتهمش بصراحة)
انا كنت ناوى بقة اروح اسأل عن قطع الغيار واسعار الصيانات بس الصراحة مارحتش لسببين
اول حاجة اكيد قطع الغيار مش حتكون منتشرة لان العربية لسه نزله جديد ولكن توكيل نيسان محترم فامن الممكن انه حيحاول يوفر قطع الغيار عشان ميطلعش سمعة وحشة عن العربية وبالنسبة للاسعار اعتقد برده حتكون معقولة نسبيا
السبب التانى انى صراحة مش مقتنع بالسعر وده تقريبا عكس كل الناس اللى مشاركه فى الموضوع انا شايف ان السعر ده غير مناسب على عربية متصنعة فى الهند ومتجمعة فى مصر ومتقفلة تقفيل سيئ جدا وفى خلاف كبير على شكلها مابين مؤيد ومعارض وياريت متقوليش لا ده الموتور يابانى والفتيس يابانى لان عندك مثلا الجين تو محتوياتها متصنعة من اماكن مختلفة ومحترمة جدا بلاش الجين تو عندك اى عربية صينى ساعات بتلاقى موتورها يابانى وعفشة المانى مثلا فاده مش مقياس بصراحة المهم التقفيل الكويس و فكرة تعديل الفتيس ده قالقنى تانى حاجة حد فتح الكابوت وشاف تقفيل الموتور عامل ازاى الصراحة انا نفسى اعرف التقفيل ده عدا من تحت ايد اشراف شركة نيسان ازاى !!!!!!!!!!!!!!!!!! ده تقفيل زى الزفت انا اعتقد انك لو فكرت تشحم العربية وتغسلها فى اى بنزينة ابقى قول على العربية يارحمان يا رحيم مع السلامة
فى النهاية اتمنى ان رأيئ ميكونش زعل مالكى او معجبى العربية لان الاختلاف فى الرأي شيئ جيد ولايفسد من الود قضية واسف على الاطالة