أنا إتعرضت لحادث بلطجة فى محطة بنزين بترومين قبل دمنهور فى اتجاه القاهرة

**alu** · 13-06-2012 04:34 AM

والله يا باشا انت صح 100 فى 100 وانا لو مكانك اكيد كنت عملت اكتر من كده بس لما الواحد بيهدى ويفكر بهدوء يلاقى ان الموضوع مايستهلشى انه يعرض نفسه واسرته و خاصة وان معاك المدام والابناء لهذا الموقف واحمد ربنا انها جت على كده

**amr.elsayed** · 13-06-2012 04:46 AM

هو طبعا انت صح فى انك تدافع عن حقك .. بس انا الوم حضرتك ان انت على طريق سريع وفى وقت مبكر
وبسبب ال 2 جنيه دول اولاد حضرتك والمدام اتفجعوا بسبب اللى العامل الزبالة دة عمله
انت لو كنت لوحدك كان ماشى لكن فى موقف حضرتك صوت العقل بيقول انك كنت اعطيته ال 2 جنيه حار ونار فيه
وكنت اول ما توصل البيت تشتكى المحطة زى ما حضرتك عملت .. معلش انا عارف انى بطلب منك انك تكون سلبى
فى جزء من الموقف بس مافيش حاجة تساوى فاجعة الطفل ... وحمدا لله على سلامة حضرتك والاسرة الكريمة

**egyseadragon** · 13-06-2012 05:12 AM

المشاركة الأصلية كتبت بواسطة ahmed_nubira

كل ده عشان 2 جنيه

الطمممممممممممم

الموضوع مش 2 جنيه أو غيرو..إذا كان الرجل دفع ال 2 جنيه دول تيبس.الموضوع الحق و عدم الإستغلال

**farfora20082008** · 13-06-2012 05:52 AM

بجد انا احيك علي موقفك وبجد احترمت تصرفك واصرارك علي متابعه الموقف مع المسئوليين رغم كم السلبيه اللي هيقابلك وكتيير جدا مكانك مش هيعملو كده منهم اللي هيديه الفلوس ومنهم اللي هيرفض ومش هيفكر يعمل محضر او يبلغ المسئوليين يا ريت كلنا نقف ايد واحده ضد الاستغلال اي نعم هيطلع عينا في الاول وهنحس اننا في عالم لوحدنا ومنبوذيين بس يكفينا احترامنا لنفسنا وكمان بعد فتره هتلاقي ان ناس كتير هتبقي زيك وهتحس انك كنت بشكل معين قائد في ثوره تغيير لقيم واخلاق ... برافو عليك وبجد كويس ان اولادك يشوفوا شيء زي ده ويشوفوا باباهم اتعامل ازاي في الموضوع للاخر

**mstool** · 13-06-2012 06:26 AM

عااااااش جدا و احيك على موقفك و حضرتك مفيش منك كتير اليومين دول لا قلبك جامد بجد فى الحق اعلم ان ربنا عمر ما كان هيسيبك او يخذلك فى موقف انتا معاك الحق فية زى دة و اوعى فى يوم تانى حد يسكت على الناس دية بدل ما ياكلونا بكرة و بعدة عالم متنفعهاش الا الدراع مع انى مسالم و مش بحب بس بقيت لازم برضة ابقى زى حضرتك كدة و عملت نفس الكلام فى بنزينة فى العبور الا ياخد جنية بس العربية اتكسرت و ربنا جابلى حقى و اللى كسر العربية لقيت رجلة مكسورة بعدها بشهر لما بعت واحد صاحبى للبنزينة و عربيتى اتصلحت ببلاش الحمد لله
انا وقفتى كنت اصعب كتير مانتا عملت وقفت للراجل و نزلت و قلتلة لو اخر يوم فى عمرى انهاردة مش دافع غير 90 قرش شدينا فى بعض و كانت اول خناقة ليا فى حياتى

**yyy** · 13-06-2012 08:22 AM

المشاركة الأصلية كتبت بواسطة elawany13

يوم الأحد الماضى الموافق 10-6-2012
كنت راجع من الإسكندرية على الطريق الزراعى متجها إلى طنطا
قبل دمنهور بحوالى 20 كم
وفى حوالى الساعة السادسة والنصف صباح اليوم
دخلت محطة بنزين بترومين لقيتها خاويه على عروشها وشكلها معفن قوى
وكل حاجه فيها شكلها قديم ومتهالك

ضربت كلاكس لاقيت عامل طالعلى بيتاوب على آخره وعنيه معمصة سألته هل يوجد بنزين 80 ؟
أجاب بنعم
قولتله فول العربية
وجدت ان عدادات طرمبة البنزين التى تحسب كمية الفلوس المطلوبة لا تعمل
واللى شغال فقط عداد الليترات .... مفيش اى مشكلة
تم تزويد السيارة بـ 36.6 لتر بالتمام والكمال سعر الليتر 90 قرشا
يبقى الحساب 33 جنيه
أنا دائما بدى بقشيش من نصف جنيه الى جنيه بالكتير
بس أنا إتكسفت من العامل ده علشان صحيته من النوم والوقت لسه بدرى
6.5 صباحاً
قولت زى بعضه اديت العامل 35 جنيه وقولتله الـ 2 جنيه بقشيش علشانك
فوجئت ان العامل مش عاجبه وبيقولى الليتر بـ 1 جنيه يا أستاذ
احنا لا نبيع بـ 90 قرشا وحسابك كده يبقى 37 جنيه !!!
قولتله ازاى ياعنى ديه سلعة مسعره اجبارياً ومينفعش تبيع بمزاجك وأنا مديك اكتر من حقك كمان
قالى ياعنى مش كتر خيرى انى حطيتلك بنزين !!!!!
قولتله لو محطتش بنزين هعملك محضر امتناع
قالى اعمل محضر براحتك بس لازم تدفع على الليتر 1 جنيه
أصريت على موقفى وقولتله أنا مديك 2 جنيه بقشيش ومش عاجبك كمان ... هات الـ 2 جنيه الزيادة دول
قالى فلوسك أهيه يا أستاذ ورماها على العربية
دخل فى الوقت ده سيارة فيرنا وتوكتوك قالهم الليتر بجنيه واللى مش عاجبه يمشى
المهم روحت شايل جنيه من الحساب وبقى 34 جنيه علشان أحرق دمه
كده يبقى واخد بقشيش 1 جنيه بدلاً من 2 جنيه
سيبتله الفلوس فوق طرمبة البنزين كان مشغول بقى دلوقتى مع الفيرنا
وركبت عربيتى بسرعة وشغلتها ومشيت
لقيته بيجرى ورايا روحت بسرعة قافل السنتر لاقيته بيحاول يفتح الباب الخلفى ومعرفش يفتحه...
بدأ يشتم وحاول تهشيم الزجاج الخلفى للسيارة
لحظة لما خبط جامد على الزجاج أنا إتجننت وبرج فى نافوخى طار ....
ورغم انى مش من دعاة العنف وأخذ الحق بالدراع بس ساعتها
الدم غلى فى نافوخى ووقفت فجأة بالعربية
وقررت إن أخبطه
نقلت الفتيس على المارشدير وبدأت أرجع للخلف علشان اخبطه واكسر رجله
ساعتها المدام والعيال انتابهم الخوف وقعدوا يزعقوا ....
فأستعذت بالله من الشيطان الرجيم ونقلت الفتيس على الغيار الأول وأنطلقت إلى الأمام وأنا متغاظ جدا
وعمال اشتم فيه وفى اللى جابوه وفى اللى شغلوه

كان بيبقى فيه كمين على أول دمنهور قولت أروح أبلغ هناك
وأسأل على القسم علشان أعمل محضر ملاقيتش حد من المرور على المرور خالص

لما روحت طنطا بحثت عن تليفون مباحث التموين بالبحيرة
علشان أبلغهم مش لاقى نمرتهم خالص
إتصلت بوزارة التموين والتجارة رد عليا شخص مهذب وحكيتله كل حاجه
وقالى هنتخذ اللازم يافندم وهنبلغ عن المحطة ديه

إتصلت بديوان محافظة البحيرة لاقيت الموظف اللى رد عليا قرفان من البلد وسنينها والبلطجة المنتشرة وبيقولى فيما معناها
ان احنا بقينا قليلى الحيلة وبعد مناقشات معاه وميصحش السلبية ديه قالى هبلغ مباحث التموين
إتصلت بشركة بترومين مصر وسألت عن مسئول المحطات ..
بصراحة راجل محترم جداً ومهذب جدا واعتذرلى كتير وقالى ان المحطة مش تبع الشركة مباشرة انما بنظام الوكيل ..
وديه مش من سياسة الشركة وتصرفك صحيح وعداك العيب
وقالى المفروض يكون عداد الليترات شغال وعداد الفلوس شغال
وديه سلعة مسعره اجبارياً من الحكومة وقالى انا هتصل حالاً بصاحب المحطة ولازم العامل ده يتقطع عيشه لإن اللى حصل ده مينفعش

كلنا شوفنا مشاركات كتير هنا بتدعوا الى العطف على هؤلاء العمال والأسطوانه المشروخة بتاعت هما غلابة وملهومش مرتبات
وعايشين على البقشيش واحنا المفروض نساعدهم علشان ميتحولوش لبلطجية
واضح ان احنا اللى عملناهم بلطجيه وطمعناهم فينا
حسبى الله ونعم الوكيل

المكان محطة بترومين - قبل دمنهور بحوالى 20 كم - فى الاتجاه من الاسكندرية الى طنطا
:_alshmokh08[1]:

معظم المحطات بتعمل كدة دلوقت وخصوصا وقت الازمة والناس بتدفع ومبسوطة انا كنت بعمل زيك كدة بس لسة ما اتخانقتش ...دلوقت و بما ان هو دة النظام الماشى وعلشان موجعش دماغى بقيت بنقص جنية بس يعنى لو 37 لتر زيك كدة اديلة 36 علشان ابقى بردة مااخدتش اللتر بجنية..وبالنسبة للشكوى بتهيألى المفروض تبقى فى مباحث التموين

**mrghost** · 13-06-2012 09:10 AM

بص انت كنت رميتله الفلوس اللي انت عايز تديهاله وتمشي ومتقفش لان الموضوع كان ممكن يكبر وانت معاك اطفال
الحمد لله انها جت سليمة

**joesph2010** · 13-06-2012 09:46 AM

عااااااااااااااش يا كبير اللى انت عاملته عين العقل فى كل حاجة ماعدا محاولة كسر رجليه دى لكنك كدة قابلت البلطجة ببلطجة زيه
فى ناس بتحب تسغل الظروف
المرة الجاية كلنا نتعلم نسال عن السعر فى اية حاجة قبل الشراء
(( موقف حصل معايا كانت هركب تاكسى فقط يعدى كوبرى مسطرد بس يعنى مسافة بالكثير 300 م بسال السواق هتاخد كام قالى 20 جنية قولتخ نعم دا كوبرى قالى ماليش دعوة )) دا لو كنت ركبت معاة وقالى 20 جنية كنت كسرت رجليله والعربية واحتمال اكسر نفسى بعدى ههههههههه
على العموم الف سلامة عليك يا كبير

**Ahmod** · 13-06-2012 10:06 AM

المشاركة الأصلية كتبت بواسطة elawany13

بص ياباشا
حقه ياخد 33 جنيه
وهوه عاوز بالبلطجة 37 جنيه
ياعنى عاوز 4 جنيه زيادة
!!!!

أنا عملت تليفونات وموبايلات بأكثر من الـ 4 جنيه اللى هوه عاوزهم بالبلطجة
ومستعد أخليهم 100 أو 1000 جنيه

الحكاية مش حكاية 2 جنيه ولا 4 جنيه
أنا برفض الإستهبال بكافة أشكالة
البقشيش بدفعه بمزاجى وأنا اللى بحدده
وأنا اللى بأختار ادفع بقشيش ولا مدفعش

انما لما يحددوا هما السعر بمزاجهم يبقى ده اسمه استهبال واستعباط
وبلطجه وقلة أدب

حضرتك شايف انى غلطان ؟

+1111111

عداك العيب والله !!

للاسف بسبب كتر الاستغلال والجشع خلانا ننسا اصلا يعني ايه تيبس - بقشيش - !!

اصلا المفروض البقشيش ده العميل بيطلعه كإظهار لرضاءه عن مستوى الخدمة اللى خدتها !! لكن للاسف المفهوم هنا في مصر اتغير وبقى اجباري في كل مكان !!

لدرجة انك لو مدفعتوش تحس ان العامل او الصانيعي عايز يضربك !!

انا عن نفسي سواء كنت في بنزينة / مطعم / كوفي شوب !! وخرجت منه غير راضي عن مستوى الخدمة مستحيل اعبر اي حد باي بقشيش !

الموضوع: أنا إتعرضت لحادث بلطجة فى محطة بنزين بترومين قبل دمنهور فى اتجاه القاهرة

LinkBack

أدوات الموضوع

عرض

-

-

-

-

المواضيع المتشابهه

أفضل محطة بنزين

عاجل طريق مطار القاهرة من الدائري اتجاه المعادى

سؤال عن غسيل العفشة فى محطة بنزين ؟

تحذير من محطة بنزين

خطوات انشاء محطة بنزين

الكلمات الدلالية لهذا الموضوع

المفضلات

المفضلات

ضوابط المشاركة