أجيب لوجان أوتوماتيك و لا نيسان صنى أتوماتيك

**said24581** · 17-06-2012 06:28 PM

السلام عليكم أعضاء هذا المنتدى العظيم
الحكاية و الله اللى بطلب مساعدتكم فيها هيا
أنا معايا 80000 جنيه و أول مرة أسوق أصلا
و كنت مقرر أشترى لوجان أوتوماتيك
فهل حد شايف إن أعمل قرض من بنك علشان أقدر أشترى نيسان صنى
لأنى ممكن يكون الفرق كبيررررر
ولأ أخلينى على قد فلوسى
و عيب اللوجان من وجهة نظرى
شكلها مش عصرى خالص
و شكرا و أرجو منكم المساعدة
أفادكم الله

**mody3on** · 17-06-2012 06:38 PM

الفرق مش كبير , الصني اوسع شوية وشكلها الخارجي احدث وتكييفها احسن
واللوجان موتورها اقوى وفتيسها ستيبترونيك ( مانيوال واوتوماتيك )
والفرق 20 الف جنيه
شوف انت هل تستاهل بالنسبة لك ولا لا

**said24581** · 17-06-2012 06:42 PM

يا ريت يا جماعة أعرف وجهة نظر كل واحد من ناحيته هو
هل تستاهل الدين و لا لأ يا أصحاب الخبرة
أنا لسه بتعلم السواقة و ليست عندى المقدرة الكاملة
على تحديد التقييم الجيد والفرق بينهم لذا أنا فى حيرة
وخايف بعد ما أتعلم السولقة ألاقى إن الفرق مهول و يستاهل الجين
إنتو شايفينو يستاهل الدين و لا لأ
أفادكم الله

**wsamir** · 17-06-2012 06:46 PM

الصنى افضل من اللوجان بس اخى الكريم لا داعى للدين و الاقتراض ظروف البلد
غير انه حرام ابدا باللوجان على قد الفلوس اللى معاك و دية مش اول ولا اخر عربية ان شاء الله
ربنا يباركلك ان شاء الله

**elhalfawy_2010** · 17-06-2012 07:24 PM

اتوكل على الله واشتري اللوجان من غير ما تستلف ولا تاخذ قرض

**ahmed_m_ashraf** · 17-06-2012 10:42 PM

المشاركة الأصلية كتبت بواسطة wsamir

الصنى افضل من اللوجان بس اخى الكريم لا داعى للدين و الاقتراض ظروف البلد
غير انه حرام ابدا باللوجان على قد الفلوس اللى معاك و دية مش اول ولا اخر عربية ان شاء الله
ربنا يباركلك ان شاء الله

أنا مع الرأي ده، أنا كنت بفكر زي حضرتك في الإثنين مع فارق إن كان معيا ثمن الصني السوبر صالون كاش كمان، بس أخوكم طويل جدا وكنت محشور في الصني والدركسيون لازق في رجلى فصرفت نظر عنها نهائي. الحمد لله أنا راضي عن اللوجان تماما في المرحله دي لحد مالظروف تسمح بالنقل لحاجة أعلى من اﻹثنين.نا

**Egyzizo** · 18-06-2012 01:01 AM

على فكرة الصنى مش أوسع خالص .. الكنبة الخلفية ضيقة جداً.
أنا كنت فى نفس حيرتك وقرارى أخذته بناءاً على الفرق ده.
اللوجان أوسع بكتييييير.

الكلام ده بالنسبة للشكل القديم ، ماعرفش الجديد نظام وسعه ايه.

**S O P H O S** · 18-06-2012 01:15 AM

هو فعلا الصني الشكل القديم كان ضيق من ورا
انما فالشكل الجديد اعتقد تم تلاشي هذا العيب الي حدا كبير
موفق ان شاء الله للخير ..

**storm2020** · 18-06-2012 01:21 AM

من رايى تستنى شويه..
لان الصنى الجديده واضح جدا من التقارير الاوليه انها هتحطم الدنيا وسعرها بالنسبه لامكانيتها رائع
بالاضافه الى انها يابانى يعنى مشاكلها اقل ..عمر اطول ..اعتماديه اكتر + بقيت واسعه زى اللوجان ويمكن اكتر..
و خلال ال3 او 4 شهور الجايين الصنى الجديده هتبدا تنتشر وهنعرف عيوبها علشان بس متندمش بعد كده وتقول يا ريت ..

وبالنسبه لموضوع الاقتراض فده حسب رغبتك وظروفك الشخصيه اذا كانت تسمح او لا.. فانت ادرى بذلك.. والله الموفق

**amr.elsayed** · 18-06-2012 02:00 AM

الحقيقة انا ليا وجه نظر بعيدة شوية لكن حقولها وحضرتك سيد قرارك
انا لا انصح اى حد يكون حديث التعلم بالقيادة انه يشترى عربية زيرو العربية الزيرو اى كانت بيبقى الخربوش بحساب وبيضايق جدا
......
مش عايز اكون محبط لكن عايز اقول لحضرتك ان القيادة فى مصر محتاجة ممارسة على الاقل لمدة سنتين علشان تركب زيرو وتكون مطمئن ان سرعة رد الفعل عند حضرتك وصلت لمرحلة عالية لان فى بلدنا اهم من انك بتعرف تسوق انك تعرف تتلافى اخطاء الغير وما اكثرها الحقيقة
...........
انا اقترح على حضرتك عربية مستعملة تكون نضيفة وفى نفس الوقت سعر اعادة بيعها كويس وقطع غيارها رخيصة بحيث تمشى بيها لمدة سنة وتعرضها للبيع وهى معاك لحد ما تجيب سعر كويس وممكن قوى تجيبلك نفس السعر اللى اشترتها بيها
وانا ارشح لحضرتك عربية زى اللانوس حتى موديل 2007 بيكون كورى وعربيات كويسة جدا يمكن تقفيلها افضل من التقفيل الحالى
بالاضافة ان قطع غيارها رخيصة يعنى لا قدر الله فى حالة اى خطا او حكة او حاجة تحصل بيكون تصليحها او تغيرها رخيص وسهل
وبعد السنة دى ما تعدى تشوف اذا كان الفلوس تسمح انك تشترى الصنى فاكيد حتكون افضل لكن لو الفلوس حتخليك تتداين فبلاش واللوجان عربية محترمة وحتسمتع بيها بردو ولاحظ انك حيكون عندك مصاريف زى الترخيص وحتحتاج فرش وبعض المنظفات للعناية بالعربية وغطا وحجات زى كدة وبتجمع مبلغ
وربنا يرشدك للاختيار الافضل ان شاء الله