استهلاك البنزين هوندا سيفيك 83

**smsm_cato** · 25-06-2012 01:05 PM

يا جماعة بقالى فترة كبيرة الاستهلاك بتاعى حاسس انه مش مظبوط خالص انا كل يوم على الطريق الصحراوى يعنى اغلب المشى بتاعى بنسبة 90 % على الطريق السريع وال 10 % الباقيين بيبقى زى دخلة بلبيس بيبقى فى زحمة خفيفة ولمدة قصيرة مش طويلة او المشى جوة البلد وبردة لمسافات مش طويلة الاستهلاك حسبتة كذا مرة بإنى افول العربية لغاية الزور وامشى حوالى 200-300 كيلو وبعد كده افولها تانى لقيت الاستهلاك 200-210 فى الصفيحة وانا شايف ان ده كثير على موتور 1500 فى عربية بوزن الهوندا خفيفة مش تقيلة مع انى كنت بعمل نفس الاستهلاك ده ايام مكان معايا الفيات 132 وكان استهلاك كويس بالنسبة لوزن العربية وكنت معدل الموتور ببساتم 1800 والموتور زى مانتوا عارفين 2 كامة المهم روحت من فترة كبيرة بردة ظبطت الكاربيتير عند واحد متخصص وبعد كده رصصت العجل بردة عند واحد متخصص وغيرت البوجيهات من فترة مش عارف المشكلة من ايه ارجو الافادة من خبراء الهوندا وياريت حد يقولى الاستهلاك الاورجينال بتاعها كام

**ahmedeihab** · 25-06-2012 01:29 PM

سؤال علشان نقدر نجاوبك

انت معدل بيكات فى الكربيراتير ده ولا لاء بمعنى حاطط بكات اكبر علشان الجرى ولا لاء

لو معدل يبقى الاستهلاك ده حلو اوى على كده

ولو مش معدل يبقى بص على بك السرعه بتاعك اخباره ايه كويس ولا فيه مشاكل

و ياريت تروح لوحد بتاع كربيراتير غير ده

انت الاستهلاك بتاعك متوسطه 250 ل 270 كيلو فى الصفيحه ال 20 لتر

و مش كل الناس بتعرف تظبط كربيراتير الهوندا اصلا

لازم واحد بتاع هوندا

و نصيحه لو انت ملكش فى الجرى يبقى حط اصغر بيكات موجوده فى السوق هتلاقى التانك ممكن يقعد

1000 كيلو

تحياتى

^_^

**SAMEH_FOUAD** · 25-06-2012 01:39 PM

طيب شوف ياباشا الاستهلاك عندك كدة زايد لان الاستهلاك الاساسى للعربية دية 7 لتر لكل 100 كم كمتوسط استهلاك

هنقول مع العمر شوية بقت مثلا 9 لتر لكل 100 كم , ودة متوسط الاستهلاك يعنى المفروض العربية تعمل معاك 200 كم فى ال18 لتر داخل المدينة

واى حاجة خلاف ذلك يبقى ممكن يكون فية مشكلة عندك فى اكس الكربراتير فية بوش خفيف , او البيجاات عندك وحشة وعايزة تتغير

وعموما انت طريقة سواقتك اية ؟؟؟؟؟؟

**ahmedeihab** · 25-06-2012 02:44 PM

المشاركة الأصلية كتبت بواسطة smsm_cato

بالنسبة لسمسم انا سواقتى رياضية شد وجرى بس بقالى فترة طويلة مبزودش عن 100 علشان اشوف موضوع الاستهلاك ده وياريت تقولى احسن بوجيهات اركبها انا ركبت اخر مرة ngk يابانى
اما بالنسبة لاحمد الراجل اللى رحتله بتعامل معاه من زمان ومتخصص فى الكاربيتير بس وكان يوميها الرداخ بيجيب بنزين وروحت غيرت الجلدة بتاعة الرداخ وظبطه ومقاليش ان البيكات متغيرة وياريت تقولى البيكات رقمها كام وانا اتاكد بنفسى

عندك المقاسات بتتراوح من 12 ل 25

و كل واحد ركب العربيه اكيد عمل حاجه فى الكربيراتير

فا انت اتأكد و شوف بنفسك لو اعلى من 20 يبقى هات ال 15 بس متسألش على جرى

انا كان معايا ريجاتا كان البيك بتاعها 25 و استهلاك البنزين غلب البى ام ال 6 سلندر

بس انا كنت عامل افتكاسات فى الكربيراتير علشان الجرى

فا شوف انت عايز تعمل ايه و اعلمه المواصفات اهى معاك

^_^

**smsm_cato** · 25-06-2012 11:38 PM

شكرا يا احمد بس انت تقصد من 112-125
لان لما كان معايا الفيات 132 كنت حاطط الفونيات 115-120
وحكاية انسى الجرى دى يعنى هيبقى اخرى كام اصل اخوك ساعات بتاخدة الجلالة وبيحب يشد شوية وخصوصا لما واحد يرسم عليا فى الطريق واحب اعرفة ان احنا بنجرى برضة

**ahmedeihab** · 26-06-2012 12:12 AM

المشاركة الأصلية كتبت بواسطة smsm_cato

شكرا يا احمد بس انت تقصد من 112-125
لان لما كان معايا الفيات 132 كنت حاطط الفونيات 115-120
وحكاية انسى الجرى دى يعنى هيبقى اخرى كام اصل اخوك ساعات بتاخدة الجلالة وبيحب يشد شوية وخصوصا لما واحد يرسم عليا فى الطريق واحب اعرفة ان احنا بنجرى برضة

بص ناحيه الشد

هتجمع معاك شرعه بس بعد وقت طويل و هتحس انها مخنوقه كده

شوف انت عايز ايه الكوره فى ملعبك

^_^