فى الفتيس المانيوال نقل الحركة بيتم بطريقة مباشرة عن طريق مجموعة الدبرياج .. يعنى اسطوانة الدبرياج بتكون مضغوطة ما بين الديسك و الحدافة اللى راكبة على عمود الكرنك , و بالتالى الحركة بتنتقل من الحدافة الى اسطوانة الدبرياج عن طريق الاحتكاك و من اسطوانة الدبرياج الى عمود نقل الحركة اللى داخل على الجير بوكس , و بالنظام دة لا بد ان سرعة عمود نقل الحركة هيساوى سرعة الموتور و هو دة اللى بيخلى مثلاً لو دوست فرامل من غير دبرياج العربية هتقف و الموتور يبطل.
اما بالنسبة للفتيس الاوتوماتيك الموضوع بيختلف, نقل الحركة بيتم بطريقة هيدروليكية عن طريق محول العزم او المعروف بـ (القربة) و دة بيكون فيه ريش متصلة بالموتور تعمل كأنها طلمبة و مقابل لها ريش متصلة بعمود نقل الحركة للجير بوكس و بين مجموعتين الريش فى القربة بيكون فيه زيت بحيث انه لما الريش المتصلة بالموتور تدور فترفغ من ضغط الزيت و تنتقل الحركة الى الريش المتصلة بعمود نقل الحركة للجير بوكس, الفكرة فى محول العزم دة انه ممكن يخلى سرعة الموتور مختلفة عن سرعة الجير بوكس حتى يسمح بتعشيق النقلات السلس و تخميد الاهتزازات القادمة من الموتور , و دة اللى بيخلى زى ما انت قولت انه ممكن تدوس فرامل و انت جايب ال D و العربية ما تتحركش او لو طالع مطلع من غير ما تدوس بنزين العربية مش هتتحرك , ودة بييجى على حساب العزم اللى بيتنقل من الموتور للجير بوكس حيث بيكون فيه جزء مهدر من العزم
و دة اللى بيخلى الناس يقولوا سحب المانيوال اشد من الاوتوماتيك
و دة فيديو هيوضحلك طريقة نقل الحركة من الموتور للجير بوكس فى الفتيس الاوتوماتيك ... محول العزم (القربة)
Voith Turbo Fluid Coupling - Hydrodynamics - YouTube
المفضلات