الموضوع: موسوعة السيينا (قطع غيار - بدائل - فنيين -........)

يا ترى في حد عنده خبره في موضوع كنترول السيينا 1600
اللي يعرف يا ريت يقولي بكام واحسن حد اجيبه من عنده او لو حد يعرف يصلحه

بسم الله ما شاء الله ولا اروع من كده
ربنا يبارك في جميع العمالقة المشاركين والمؤيدين وياريت اللي يعرف معلومة ولو بسيطة ممكن تكون له عادية ولكن لغيرة تحل مشكلة كبيرة
7
7
7

اخويا كان واخد العربية ولما رجع من مشوار استمر 8 ساعات رايح جاي مع فترات راحة وبعد ما وصل عند البيت الفتيس مش عايز يجيب غيارات خالص .... احنا جنب البيت ميكانيكي محترم بص عليها وقال في جلده اتقطعت وكان الوقت ليلا معرفتش افهم قوي المهم ركبها وبقت تمام ومن غير فلوس

قلته الفتيس بحس انه سايب قالي بكره هيظبطة هشوفه هيعمل ايه وانقل لكم ان شاء الله خاصة اني هخليه يعمل كشف عليها في صوت في الباور وحاجات بسيطة كده

على فكره عشان لو حصلت مع حد خاصة بعد اي لعب في الحوض

جيت ادور العربية مش راضية تدور نهائي ولا حظت ان لمبة الرشاش مش بتنور .... الميكانيكي ضغط على فيشة الكنترول كانت سايبه رجعت اللمبة تشتغل وبقت تمام .... حاجة تافه بس لو لوحدي كنت قعدت جنبها

بالنسبة للكنترول .... في الوكاله بحوار ماسبيرو .... واحد اسمه محمد الشيخ للكربراتير والكنترول وغيرها معروف قوي في الوكاله .... كنت سألته على الكنترول لل 1400 قالي موجودب 1700 مستعمل طبعا .... ممكن تروحله وتشوف طلبك .... الاسكندراني في الحرفيين قالي اي حاجة موجوده عندي للسيينا .... برده اسال عنده

سقف العربية في جلد بطول العربية (جريد) حد يعرف يتباع فين ؟

تقرير عن العربية من صفحة (رابطة عشاق ومالكي فيات سيينا على الفيس بوك)

7
7
7
Bahaa Eldin‎
بص ياسلام ده تقرير شامل عن السيينا من زميلى ميسو فى المنتدى
بص دى معلومات عنها حتفيدك كنت كتبتها فى موضوع سابق
وعموما العربيه ناعمه جدا فى السواقه وكماليتها بتفرق لانها فيه منها كذا فئه بس الباور والتكيف اساسى فيها
واعاده البيع عادى زيها زى اى فيات

هى من تصميم شركه فيات الاوروبيه الغنيه عن التعريف طبعا بس هما حبو يصممو عربيه تغزو الاسواق الدول الناميه وفى نفس الوقت سعرها يبقى معقول فحبو يصنعوها فى الدول الناميه واتجمعت فى تركيا والبرازيل ومصر وتقريبا الهند
على فكره هى اسمها اصلا 178 نسبه الى السياره 128 اللى عملت طفره كبيره فى عالم السيارات
السيينا نجحت فى اغلب الدول وخصوصا البرازيل ولكن فى مصر حققت نجاح ولكن مش زى بره وده راجع لسوء توزيع وتسويق للسياره
العربيه نزل منها اكتر من فئه ال 1400 العاده والبلاس وال 1600 البلاس
العربيتين تقريبا واحد ما عدا الاختلاف فى فرش الابواب وسعه الموتور والمفتاح المشفر والجنوط ال 14 فى ال 1600 لزياده الثبات والاسبويلر الشنطه
العربيتين كاملين تكيف باور ازاز كهربا امامى ولكن البلاس و ال 1600 فيها سنتر والعاديه لا والبلاس وال 1600 عزل الصوت والكبوت فيها اكتر من العاديه يعنى تقعد جوه وتقفل الشبابيك وتبقى منعزل تماما عن العالم بره

السيينا مميزاتها انها قويه وعاليه عن الارض انسى انها تحك معاك فى مطب من مطبات مصر شنطتها واسعه جدا يعنى ممكن تحط فيها خروفين او عجل صغير ههههههه وكمان الكنبه مممكن تتنيها وتفتحها على الشنطه ويبقى معاك نص نقل
العربيه سواء ال 1400 او ال 1600 سريعه وممكن تجيب بيها 160 او 170 وممكن اكتر فى ال 1600 ده طبعا فى حاله ان العربيه تمام
العربيه زى اى عربيه اوروبيه موصفات الامان فيها عاليه جدا جداااا اهم شيء حمايه الركاب فى حاله حدوث حوادث لاقدر الله وفيها مفتاح لفصل البنزين اتوماتيك فى حاله حدوث حادثه تلاشيا لحدوث حرائق
كذلك فيه منها عربيات مواصفات اضافيه فيها abs وايرباج (على فكره هى بتنزل بره اساسى فيها الكلام ده لكن الوكيل هنا فى مصر شاله وخلاه بالطلب عشان يوفر تمنهم )

قطع غيارها زى اى قطع غيار فيات يعنى تعتبر زى الشاهين وتشترك معاها فى بعض قطع الغيار ولكن الفوانيس مثلا تعتبر اغلى شويه والباقى عادى زيه زى اسعار قطع غيار الكورى
طبعا السيينا ال 1400 مونو انجكشن يعنى رشاش واحد بموتور قوه 67 حصان تقريبا وال 1600 انجكشن كامل 4 رشاشات بقوه 105 حصان يعنى تعتبر سياره رياضيه عائليه
عيوب السيينا انها حساسه ومش اى حد يلعب فيها زيها زى الالمانى والاوروبى وطبعا عربيه انجكشن يعنى كمبيوتر وحساسات وضفيره وطرمبه كهربا وكده فلذلك يفضل ان اللى يشتغل فيها يكون فاهم هو بيعمل ايه ويكون شغال فى الفيات الحديث
الصالون فخم جدا فى السينا بلس او فى ال 1600 ولكن يعيبه ان الكنبه الخلفيه ضيقه بعض الشيئ
العربيه ثباتها معقول جدا جدا وصاجها تقيل ووزنها اكتر من طن و 40 كيلو وده ميزه وعيب فى نفس الوقت ميزه لانه عامل ثبات للسيياره وعيب لانه بيقلل من التسارع
العربيه زى مقولت عاليه جدا عن الارض وده برضه ميزه وعيب ميزه زى مقولت انها فى المطبات وشوارع مصر حتريحك ولكن عيب انها فى السرعات العاليه بعد ال 120 او 130 الثبات حيقل شويه ولكن يمكن التغلب على العيب ده لو حضرتك غاوى سرعات عاليه
وده تكمله
الزيادة اللى انا هازودها على ميسو هى انت لو حبيت تشترى سيينا اهم حاجة
تروح للتوكيل "اوماترا - جسر السويس "او مركز صيانة محترم زى "الصفا - جسر السويس" "الاقصى - زهراء المعادى" "البرقان - شارع العريش" "شركة النيل - ك28 مصر اسكندرية الصحراوى"
وهو هيرفعلك العربية ويعرفك كل حاجة فيها مش مهم اللى هادفعه فى الكشف بس هايريحك فيما بعد كنت سالت قبل كده فى الاقصى وكان عامل حوالى 600 جنيه

يا باشا كلامك لازم نجمل بيه موضوع الموسوعة عشان يبقى موضوع شامل