السلام عليكم ورحمة الله وبركاته
بعد اكتر من 15 سنة طحن في التعليم
اخيرا الواحد هيقول باي باي للتعليم والمذاكرة وايامها
كانو خمس سنين عذاب في الكلية والحمد لله ان الواحد اتخرج على خير
الواحد مش مصدق انه خلاص مش هيفتح كتاب تاني ولا هيلاقي بعد كام يوم Quiz ,, Midterm !!!
مع ان برضوا ايام الجامعة كانت جميلة وماتتعوضتش
بس برضوا كنا بنطحن طحنة السنين والتنانين في الامتحانات والمواد الغريبة اللى كنا بناخدها والحمد لله ان الواحد اتخرج على خير
الحمد لله اتخرجت من كلية صيدلة التقدير العام جيد وامتياز في مشروع التخرج
انا حاليا شغال في شركة جرافكس - Web Designer & Coder
بس ده طبعا مش هيكون شغلي الاساسي لان لازم اشتغل بالشهادة اللى الواحد اتخرج فيها بجانب الشغل في شركة الجرافكس فده هيساعد ده عشان الواحد يعرف يبني مستقبله كويس
قدامي كذا مجال ممكن اشتغل فيه بجانب شغلي الحالي وحابب اخد رايكم
اما اقف في صيدلة - اشتغل في مصنع ادوية - او مندوب في شركة ادوية
بالنسبة ليا رافض موضوع اني اقف في صيدلية حاسس ان مالهاش مستقبل كذلك المرتب ضعيف
المصنع سمعت انه الشغل فيه متعب وفي نفس الوقت برضوا مرتبه على قده
بفكر جديا اني اشتغل في شركة ادوية مندوب -- خصوصا ان اختي شغالة في المجال ده بقالها كذا سنة وهتساعدني فيه بشكل كبير
الى جانب اني نزلت فيه تدريب وعارف نوعا ما الدنيا هناك ماشية ازاي
والواحد بيستلم عربية والدنيا بتبقى حلوة
بس برضوا فيه ناس خوفتني وقالتلي هتحرق بالمرتب كله وهتلاقي اخر الشهر مش معاك ولا شلن !!
يعني الشغل كمندوب مرتبه عالي لكن بيبقى معاك Target معين المفروض تبيعه ولو مابعتش مرتبك بيتخصم !! فبتضطر انك تبيع للمخازن بسعر اقل من سعر السوق عشان تقدر تحقق ال Target بتاعك
وطبعا بتدفع الفرق من جيبك !! فبتيجي اخر الشهر تلاقي نفسك دافع يمكن اكتر من تلت اربع المرتب !! ؟
فانتو ايه رايكم ؟
وايه نصايحكم بالنسبة للانتقال من حياة الجامعة والمذاكرة للمسئولية والشغل والمستقبل ...
المفضلات