الموضوع: اخيرا اتخرجت يا رجالة !! ياترى هلاقي شغل ولا هقعد على القهوة ؟؟

المشاركة الأصلية كتبت بواسطة wallace

بالظبط كدا ,انا كمان كنت شغال في المجال من 2006 تقريباً زي شباب كتير بدأوا علي دروس تركي وشباب ترايدنت والويب العربي و total training ,والحمد لله الشغل كان كويس بس لمدة سنتين وبعد كدا المجال زي منتا قولت الكل دخل فيه والتصميم بقا بيتباع مقابل دومين ولا حاجة :)

أنا مش ناسي زمان يمكن 2007 كنت بواجة مشكلة في توزيع تصميم وكلمتك علي تليفونك الأرضي وساعدتني كتير وقتها ومازلت شايلك الموقف دا وبشكرك عليه مرة تانية (متأكد إنك مش فاكر أي حاجة)

يالا هيا أيام ..

بص يا أحمد شغل التصميم دا مجال تتسند عليه ويعتبر شغل إضافي وإحتياطي واتجاه إنك تزود دخلك لكن مش أساس بالتأكيد

ولما قولتلك تشتغل في الصيدلية عشان بس تاخد خبرة وبعد كدا تحدد اتجاهك

أنا لما بدأت في مجال تكنولوجيا المعلومات أشتغلت حاجات كتير مختلفة لحد محددت أتجاهي ..

ربنا يوفقك يا جميل

ياه ده احنا على كدة معرفة من زمان بقى وانا مش واخد بالي

هو انا فعلا مش متذكر اني اتكلمت معاك قبل كدة لان كان فيه ناس كتير بتتصل بيا

وانت دلوقتي سبت مجال الويب ولا شغال فيه ؟؟ ولو شغال شغال في شركة ايه ؟؟

اانا شغال حاليا في توب لاين اكيد عارفها

المشاركة الأصلية كتبت بواسطة SYD

الف مبروك يا احمد

الأول بس ريح كدة وخد نفسك
ماتقلقش
الحياة العملية هتطحنك اكتر من الكلية

فريح شوية واستعد للحياة

مبروك مرة تانية

الله يبارك فيك

هو انا مش مستعجل ولا حاجة بس هو الواحد عموما اتعود على الشغل من صغره فمش بحب قعدة البيت

بحس بالملل والزهق فانا ان شاء الله مسافر اصيف كمان كام يوم كدة اسبوع ولا حاجة

ولما ارجع بإذن الله الواحد يبدا يشتغل وربنا يسهل ان شاء الله

المشاركة الأصلية كتبت بواسطة Egyzizo

أحسن خيارين هما فتح صيدلية خاصة أو مندوب فى شركة أدوية.

فتح صيدلة في الوقت الحالي مش هقدر للاسف لان مافيش ماديات

الا لو هطلب من الوالد وبصراحة حابب اني اعتمد على نفسي وكفايا على والدي انه علمني وصرف عليا لحد ماتخرجت !! مش هاجي كمان بعد ماتخرج اقوله يعملي صيدلية !!

فالاخيار الانسب اللى انا شايفه دلوقتي اني اشتغل مندوب في شركة ادوية

المشاركة الأصلية كتبت بواسطة semi

الف مبروك يافندم ومستغرب الجرافيكس شئ والصيدلة شئ تاني :)
نصيحة ركز في احد المجالين والاتنين راي انهم كويسين ما شاء الله
الديزاين تحفة ولو شغلت فيه دماغك هتاخد مرتبات محترمة
ولو انت ديزاينر محترف ممكن يكون بينا شغل :)
وفي مجال شهادتك انت ليه مش بتفكر تفتح صيدلية
ليه مش يكون ده طموحك ان شاء الله حتى عندكم بالمنطقة وحاجه صغيرة مش كبيرة
اشتغل دلوقت بصيدلية واتعلم وبعدين افتح صيدلية
كمشروع مربح لان افضل ما في مهنة الطب والصيدلة ان الناس مش بتبطل تعيا :)

الله يبارك في حضرتك

هو بالفعل فيه ناس كتير بتستغرب لكن موضوع الجرافكس ده بدا كهواية ايام ماكنت في اولى ثانوي

بعدها خدت كورس HTML تبع المدرسة بعد كدة بدات ادخل على الانترنت واحمل ال Tutorials وحبة في حبة الواحد بدا يتعلم وياخد خبرة

لحد ماربنا كرمني بشغلانة في شركة مجموعة القطري من حوالي خمس ست سنين تقريبا

ودي خدت فيها خبرة جامدة اوي لان كان فيها ناس محترفة جدا وكانت تقريبا من اقوى شركات الويب على مستوى الوطن العربي

بعد كدة من شركة للتانية للتالتة والواحد الحمد لله بقى معروف في المجال

وانا طبعا يشرفني اني اشتغل مع حضرتك لكن انا Coder محترف اكتر مانا Designer محترف !! التصميم عموما ماقدرش اقول على نفسي محترف فيه قد مانا محترف في ال Coding بكافة انواع وطرقه "Java...... - Jquery - Css"

الصيدلية انا فكرت فيها طبعا لكنها مكلفة وانا كواحد لسه متخرج هيبقى برضوا صعب اني اكون قادر على فتح صيدلية

تاني حاجة الصدلية عايزة تتفتح في مكان فيه رجل كتير عشان تكسب فبرضوا عشان تلاقي منطقة حيوية ومافيش فيها صيدليات هتتعب وهتدور كتير

انا بفكر في الموضوع طبعا لكن مستقبلا ان شاء الله

المشاركة الأصلية كتبت بواسطة Mostafa.Ismail

انا مش فاهم منين كل من هب ودب دخا مجال الديزاين وانت حضرتك اصلا صيدلى؟!!!

اقول لحضرتك

مجال الويب ديزاين عموما بيعتمد على الخبرة والممارسة اكتر مابيعتمد على الشهادة

انا لما كنت شغال في مجموعة القطري قدام عيني واحد مهندس كومبيوتر جيه وعمل Interview وماقبلهوش !!

واكتر من 90% من موظفين الشركة كانو كلهم شهادتهم ليس لها اي علاقة بالكومبيوتر او الديزاين

وكتير بقعد مع ناس خريجين حاسبات ومعلومات وهندسة كومبيوتر وفنون جميلة

وكلهم مستواهم اقل بكتيير اوي من مستوى اي واحد اشتغل في شركات رسمية وعنده خبرة

لكن انا لما قلت كل من هب ودب دخل المجال انا كنت اقصد ان من حوالي ست او سبع سنين تقريبا

كان المصممين عددهم قليل والشركات عددها قليل واللى بيفهمو في المجال وبيشتغلو فيه قليلن

بالتالي الاسعار كانت غالية والتصميم كان بيوصل سعره ل 4 الاف ريال في بعض الشركات الرسمية الكبيرة زي ترايدنت !!

مع الوقت ومع رخص اسعار الدومينات والسيرفرات بدات الشركات تكتر

بقى سهل جدا لاي واحد انه يحجز دومين واستضافة ويفتح شركة !! يبقى الواحد لسه يدوب متعلم الفوتوشوب من شهرين ويعمل شركة ويقولك انا مصمم وبعمل وبسوي

وبدات عمليات النصب تكتر خاصا لان التعامل اغلبه من الويب فمافيش ضمان لحق المستخدم

ومن هنا الاسعار بدات تنزل تنزل تدريجي وبدات الناس تتجه للشركات ال local اللى لسه فاتحة نظرا لرخص اسعارها

ومابقاش ينفع التصميم يتباع ب 4 الاف ريال وفيه شركات بتبيعه باقل من 200 و 300 ريال !! ؟

هتقولي فرق الجودة وفرق التصميم والاخراج هقولك ماشي بس برضوا مش كل الناس بتفكر كدة

والشركات الرسمية برضوا كترت والمجال عموما بقى فيه ناس كتير ومابقاش زي الاول

منهم المحترف ومنهم المتوسط ومنهم اللى على قده

واللى متابع المجال ده من زمان هيعرف انا اقصد ايه بكلمة كل من هب ودب دخل التصميم وفتح شركة لان فعلا جيه وقت من الاوقات كنت بشوف العجب !!

بيبقو اصحاب شركات وفاتحين شركات وتلاقيهم جايين في اركان المشاكل والحلول بتاعة ترايدنت بعضويات تانية ويقولو عندنا مشاكل في الاستايل ومش عارفين نحلها !! ؟

من هنا حتى لو انت كنت متابع ترايدنت عملت قانون يمكن من حوالي اربع سنين بمنع كل العضويات التابعة للشركات بالمشاركة في اركان المشاكل

وقالت مش معقول يكون صاحب شركة بيضحك على الخلق وجاي يهايط في اركان المشاكل

فمجال الويب ديزاين عموما مابقاش زي الاول نهائيا