الموضوع: حكايتي مع بروتون جين 2 الجزء الثاني

حكايتي مع بروتون جين 2 الجزء الثاني

أعضاء المنتدى الكرام
السلام عليكم ورحمة الله

كنت حكيت اللي حصل معايا أثناء اتخاذ قرار شراء السيارة البروتون جين 2 موديل 2008 اوتوماتيك
وقد وعدتكم بأن أخبركم بجميع المصرفات التي تم صرفها عليها حتى تصبح السيارة علي سنجة عشرة
وأستعين بالله ونلخص التجربة كما يلي :-

1- في البداية عند شراء السيارة قمت بقيادتها للتأكد من نعومتها وانسيابيتها ومدي ملائمة مظهرها وبعض الأختبارات العادية المبدئية مثل رذاذ العادم والسحب وسرعة تشغيل السيارة عند إدارة مفتاح الكونتاكت وقوة التكييف وعمل جميع الكماليات والشكل العام للموتور لأنه لو في حوادث سابقة أو لو الموتور أترفع قبل كده بيظهر علي شكل الموتور أنه مش تمام من الأخر مش زى تقفيل بلده .

2- أخذتها علي محطة بنزين وتم رفع السيارة والنظر عليها من فوق لتحت للتأكد من أنها سليمة و فابريكة دواخل مع مراعاة أن تحدد أنت محطة البنزين التي تفحص عندها وتكون محطة كبيرة وخلي بالك طالما أنت بتشتري عربية مستعملة لازم تكون حاطط في حسابك انك هاتصرف عليها وطبيعة الصرف بتحدد حسب نوع ونظافة العربية وأنا بقول الكلام ده لأن غالبية محطات البنزين بتحب تريح نفسها وتطلع القطط الفاطسة في أي عربية بمجرد الشك عشان تشيل المسئولية من عليها فإنت لازم تشوف بنفسك وتحدد المشكلة ومدي قبولك لها .

وده بالضبط اللي حصل معايا لأني لقيت الراجل بتاع المحطة بيقول عايزة عفشة وطقم سرفيس والموتور 70% علما أن السيارة ماشية 50000 كم وعشان أنا جربت محطات كتير في تجارب سابقة متاخدتش بكلام العامل وركزت علي أن العربية فبريكة دواخل ودي أهم حاجة عشان أعرف أبيعها بعد كده مش عشان حاجة تانية لأن ممكن عربية فابريكة دواخل وحالتها زي الزفت وغالية وعربية تانية صاحبها مهتم بيها وعملت حادثة منه بس صلحها في حتة نظيفة وخلاها سنيورة أكيد أحسن من الفبريكة وسعرها أقل كمان عشان كده نصيحة مني بلاش تحط معيار الفبريكة ده غير من ناحية سعر إعادة البيع طالما تم تصليح السيارة بكفاءة وخصوصا ان السعر بيفرق كتييييير لأن الأساس هو الحالة العامة للسيارة .

وبالنسبة للعربية بتاعتي فالعفشة أنا جربتها في السواقة يمكن محتاجة ضبط مش عفشة كاملة وده اللي أتأكد ليا بعد كده لما أشتريتها وبالنسبة للموتور فطالما عايز طقم سرفيس من فلاتر وبوجيهات وزيوت فطبيعي يكون الموتور أقل من مستواه الطبيعي وهيتحسن كتير بعد عمل السرفيس بس مانكرش أن تقرير المحطة كان وسيلة أعتمدت عليها في الفصال وتقليل السعر اللي كان طالبه صاحب العربية .

وللي بيسأل عن السعر للبروتون جين 2 مستعمل 2008 حالة كويسة وعداد معقول ( الأتوماتيك من 60000 حتي 650000 ) ( المانويل من 55000 حتي 60000 ) ودي أسعار تقريبية وكل واحد وشطارته .

3- تم الشراء بحمد الله و الإتفاق علي السعر النهائي والأوراق المطلوبة لإتمام البيع والشراء للناس الجداد بتكون :-

(1) عقد ابتدائي عرفي وسداد مبلغ تحت الحساب .

(2) صاحب العربية يعمل شهادة مخالفات وتوكيل بالسيارة في الشهر العقاري وخلي بالك لازم التوكيل يكون أسمك فيه صحيح وواضح وكامل عشان ماتحصلش مشاكل عند التسجيل .

(3) استلام السيارة والرخصة وسداد باقي الثمن .

(4) البيع لنفسك في الشهر العقاري بموجب التوكيل وعمل عقد بيع مسجل وذلك قبل انتهاء الرخصة بشهر علي الأقل وتكلفة التسجيل لل1600 سي سي في حدود 1200 جنيه .

(5) التوجه للمرور التابع له حسب البطاقة القومية وإنهاء إجراءات ترخيص السيارة باسمك ودي ارزل خطوة لأنهم بيطلبوا شهادة مخالفات جديدة وبصمة من المرور القديم بخلاف الزحمة وملل الروتين بس إحنا كلنا أمل إن ده يتغير مع الوقت إن شاء الله .

وبكده نكون خلصنا إجراءات الشراء ونقل الملكية ونرجع لموضوعنا الاساسي ...

4- بالنسبة للمصروفات اللي اتصرفت علي عربيتي فهي تنقسم لأشياء ضرورية وأشياء أخري نزاهة ونبدأ بالأشياء الضرورية :-

(1) طقم السرفيس كامل من بوجيهات وزيت موتور وزيت فيتيس وباور وفرامل والسيور وده كلفني 500 جنيه كله علي بعضه من شارع دمشق في مصر الجديدة + 75 جنيه مصنعية .

(2) الذهاب للعفشجي لضبط وتربيط العفشة وأخذ 75 جنيه مصنعية وأخبرني أن المساعدين الأمامي سوف يحتاج تغيير بعد سنه تقريبا ولكن العفشة علي العموم جيدة جدا بعكس كلام عامل محطة البنزين .

(3) مساعدين للشنطة ورا وكلفني 175 استيراد من الحرفيين من الراعي بالتركيب .

(4) تغيير بعض اللمبات المحروقة في الفوانيس الخلفية والجانبية ولمبات الفرامل وكلفني 75 بالتركيب .

(5) تغيير مقبض الباب الأمامي لأنه كان مكسور وكلفني 90 من الراعي بالحرفيين .

(6) تغيير تيل الفرامل وكلفني 180 جنيه بالتركيب .

(7) شريطة الشيلد في الردكسيون المتحكمة في الكلاكس والمالتي فانكشن وكلفتني 650 جنيه بالتركيب من نيو ماستر في الحرفيين .

وبكده أكون خلصت الحاجات الضرورية وأجي للحاجات النزاهة بمعني ان العربية مش محتاجاهم قوي بس انا عملتهم زيادة في الإهتمام وهم :-

(1) تغيير 2 عجلة أمامي كوري العجلة بـ 410 جنيه بالتركيب يعني الإجمالي 820 جنيه .

(2) تغيير البطارية تركي كلفتني 350 جنيه بعد مادخل البطارية القديمة .

(3) رش العربية بالكامل ماعدا السقف نظافة وكلفني 1400 جنيه عند ورشة عند شارع جسر السويس محطة الجراج خلف سنترال النزهة الجديد وللعلم المنطقة الدي مليانة ورش صيانة ومحلات قطع غيار وأرخص في الصيانة وأضمن من الحرفيين .

(4) ضبط الأبواب وكلفني 30 جنيه .

(5) ترصيص وضبط زوايا وكلفني 50 جنيه .

(6) الزجاج الأمامي لأنه كان به شرخ كبير في الجنب وكلفني 500 من الثلاثية للزجاج في جسر السويس عند سوق القنال .

(7) الذهاب للمغسلة وغسل السيارة غسلة محترمة برة وجوه وكلفتني 75 جنيه .

وبكده انتهيت تماما من كل الأشياء الناقصة وبقت العربية سنيورة وكل الحاجات دي خدت مني يوم واحد من أوله ماعدا الدهان بالفرن خد 5 أيام بالضبط وديت العربية لفرن الدهان يوم السبت استلمتها الخميس نزلت في نفس اليوم وأشتريت قطع الغيار ويوم الجمعة ركبت قطع الغيار وعملت الصيانات وأستلمت العربية الجمعة بالليل .

وبحسبة بسيطة يبان إن إجمالي المصروف علي العربية :

الأشياء الأساسية الضرورية 1820 جنيه .

الأشياء النزاهة التي كان يمكن تأجيلها 3225 جنيه .

الإجمالي العام 5045 جنيه .

طبعا أنا عارف إن الرقم ممكن يخض شوية بس العربيات كده ممكن تصرف ألف جنيه وتمشي وممكن تصرف 10000 جنيه وتمشي برده أو تجري لو الكلام مضبوط وكله ودماغه .

أتمني إني أكون أفدت الأعضاء الكرام ولو في أي استفسار أنا حاضر وسامحوني لو بتأخر شوية بس ضغط الشغل والأعباء الحياتية .

هل سعر السيارة بعد اضافة المصاريف يجعلها قرار شراء صحيح ام خطا وسوء اختيار دا سوال يحتاج لرد مع الشكر